Read bura-pabir Zwarəngkər Shariya 15 Bible Online

Zwarəngkər Shariya 15 - bura-pabir bible

Zwarəngkər Shariya 15

¹Antə Musa ləkəma ka gari ni akwa pəla, “Akwa kurər məva na murfəkur ka giri yafitə təmbəl ar giri na ata kəra mji.

²Nggədza laku tə giri ata yafitə təmbəl ni akwa. Kəlara mdə na ku hamta surni təpa aka nvwani na mdər Israila, tsa ata zhari alari suari daci. Tsa aɗi ata dlu suari akəla ɓzərma'ni kəra wa, kamnyar MTHLAKU ku psəmnya sakar zhar təmbəl aka mda.

³Ga ata mzhi dlu su tə gə təpata aka mətəpi, amma dwali kara yafitə su gə təpata aka ɓzərma' nga na mdər Israila, wala an yiɗauri.”

⁴“MTHLAKU na Hyelər giri ata vədzə barka ala giri akwa tsəɗi tə tsa ata na ala giri ka giri ndzi mthlakari ni. Antə mda aɗi akwa nca giri na ata ndzi ngguɗi wa,

⁵ma giri kələngkər aka MTHLAKU na Hyelər giri, ka nu su ka hangkal akwa ɓəlatə shanga tsawayeri arni natə I hamta ala giri ashina ni.

⁶Kamnyar MTHLAKU na Hyelər giri ata vədzə barka ala giri apatə tsa ku hara alkawalari ala giri. Antə giri ata sə hamta təpa aka durayeri hang, amma giri aɗi ata təpa su akəla mji wa. Tsuwa giri ata sə hara kuthlikur ata kəra tsəɗiyayeri hang, amma mji aɗi ata hara kuthlikur ata kəra giri wa.”

⁷“Ma mdər tur su aɗi akwa nca giri, watau akwa nca maɗama' giri, akwa kauyayeri na akwa tsəɗi tə MTHLAKU na Hyelər giri akwa hamta ala giri ni, giri aɗiya namtə ɗəffa giri ɓəɓal, ka nggəlar ta dlar ni wa.

⁸Amma ka giri kəlar tsiya giri bwang, ka təpata alari shanga su tə tsa akwa turari akəla giri.

⁹Ka giri hara hangkal ta giri asə dzama na ɗimi abbər, ‘Ai məva na murfəkur, na an məvar yafitə su ni, ku hara kudzəha,’ har ka giri hərtə kəma giri aka ɓzərma' giri na akwa tura, ka nggəlar ta hamta alari su. Kamnyar ma tsa ku mwantə tuwar ni aka MTHLAKU, mda ata si wuta abbər giri ku hara biku.

¹⁰Ka giri hamta alari kula nggungguni, antə MTHLAKU na Hyelər giri ata vədzə barka aka kəthlərər giri ka kəlara su tə giri ata harari.

¹¹Kamnyar mda andzi kula wutə mdər tur su akwa tsəɗi ni wa, an su na hara tə I akwa tsawa ala giri, abbər ka giri kəlar tsiya giri bwang aka maɗama' giri na akwa tur su, ka aka mji na kula su akwa tsəɗiyir giri ni.”

¹²“Ma mdə sal wala mdə mwala na durər giri Ibrani, ku ɗələmta kərni ala ga apa mafa, tsa ata hara kəthlər ala ga ar məva ngkwa, akwa məva na murfəkur ka gə psi ni ka tsa təra.

¹³Ma sakatə ga ku psi ni, ga aɗiya zhar ka tsa təra kula su akwa tsiyari wa.

¹⁴Ka gə hamta alari cautayeri ka tsiya gə bwang, kalkal ka hangkur su tə MTHLAKU hamta ala gə barkar wutari. Ka gə hamta alari cautayeri akwa nca təmayeri ar nga, ka kwiyayeri ar nga, ka mthli tə gə dəkəmta ata laliyir nga, ka yimər anap tə gə dlərɓəla.

¹⁵Ka giri ɗangta abbər, hwatu giri mafayeri akwa tsəɗi Masar, antə MTHLAKU ku msərantə giri. An su na hara tə I akwa hamta ala giri tsawu ngəni ashina ni.”

¹⁶“Amma ma mafar ngə ni pəla, ‘I aɗi akwa bara ka mwa ndəkə wa’, kamnyar tə tsa hir nga kəga mjir kutakəyir nga, tsuwa tsa akwa nggatə msərakur ndzəndzi ka giri,

¹⁷to, kara kətə mafar ngə ni, ka gə mwantə ni anyarfur nga, kara ɗiɗimta thləmari ka afa. Antə tsa ata ndzi ar nga akwa shanga ndzəndziyir mpikari. Tsuwa tsu apani antə ga ata harari aka mafar nga na mdə mwala.

¹⁸Akwa sakatə ga ata psi mafar nga, ga aɗiya kəta apa ata ndzi mwavər ala gə ka gə psi ni wa, kamnyar tsa ku hara məva ngkwa akwa kəthlər ala ga. Kamnyar kəthlər tə tsa kuri ala ga akwa məva ngkwa ni ku təramta kəthlər tə lebərayeri suɗa ata harari ala ga. Antə ma giri ku hara apani, MTHLAKU na Hyelər giri ata vədzə barka aka shanga su tə giri ata harari.”

¹⁹“Ka giri pwi yarakəma na sal ar thlar giri, ka təmar giri, ka kwiyir giri, aka MTHLAKU na Hyelər giri. Giri aɗiya hara kəthlər ar fakəu ka thla na yarakəma wa, tsuwa giri aɗiya shimta shishir gamayeri na yarakəma wa.

²⁰Amma kəlara səɓəlar məva, giri kəga kutakəyir giri ata ra ɓɗə kumər mwaɓiyayeri na yarakəma ni akəma MTHLAKU na Hyelər giri, ata vəi tə tsa carɓəla abbər ka mdə vəngkər səli alari.

²¹Amma ma mwaɓi ni ka nangka, wala nggurdəkəi, wala mdlyang, wala kəlara nangka na ɗimi, giri aɗiya hara saɗaka aka MTHLAKU na Hyelər giri kəgari wa.

²²Giri ata mzhi tsi jili mwaɓi ngəni akwa kauyayeri ar giri ka giri ɓɗəmnya kumari aviyar giri. Kəlara mda ata mzhi səmari, wala tsa kəcəkəcari wala tsa aɗi kəcəkəcari wa, tsu apatə giri ana ɓɗə kumər jikəl wala kimar.

²³Amma giri aɗiya səm mamshir ɗa wa, ka giri pumta mamshari ata di apa yimi.”