Read bura-pabir Zwarəngkər Shariya 16 Bible Online

Zwarəngkər Shariya 16 - bura-pabir bible

Zwarəngkər Shariya 16

¹Antə Musa ləkəma ka gari akwa pəla, “Ka giri ɓəlatə viri Kucalər Fəlɓəla Kəi aka MTHLAKU na Hyelər giri akwa thliyar Abib, kamnyar akwa thliya ngəni aviri antə MTHLAKU na Hyelər giri fwaɓəla giri akwa Masar.

²Giri ata hara saɗakar Kucalər Fəlɓəla Kəi aka MTHLAKU na Hyelər giri ka thla, wala təma, wala kwi, akwa vəi tə MTHLAKU ku carɓəla ka mdə vəngkər səli alari ata.

³Giri aɗiya kwasə buradi na ka yist ata kəma duku ka kumər saɗaka ni wa. Giri ata hara vir murfa akwa kwasə buradi na kula yist, watau buradiyir bwani, kamnyar vir nda ka huva antə giri səɓəla akwa tsəɗi Masar. Apani ka giri ləkəma ka hara ngəni tədəku kamnyar ɗangtə sakatə giri səɓəla akwa tsəɗi Masar.

⁴Antə mda aɗi ata bara ka mdə wutə yist akəla giri akwa tsəɗiyir giri shang akwa kuta vir murfə ni wa. Tsuwa giri aɗiya zhar kumər saɗaka tə giri tsi vir nda tahaku ar vir na ntangkəma ni, ka tsa pi har ka vir kur wa.”

⁵“Giri aɗiya hara saɗakar Kucalər Fəlɓəla Kəi akwa kəlara di tə MTHLAKU na Hyelər giri hamta ala giri wa.

⁶Amma tar ata vəi tə MTHLAKU na Hyelər giri ku carɓəla ka mdə vəngkər səli alari ata. Anda antə giri ata hamta saɗakar Fəlɓəla Kəi ni, tahaku sakatə pci abaka təri, tsu apa ata sakar səɓəlar giri akwa Masar nda.

⁷Giri ata ɓwatə kum ni ata vəi tə MTHLAKU na Hyelər giri carɓəla. Antə səɓəla ɗəpari ɗəɗəpa ka waskəi ngka akwa tentərni.

⁸Giri ata ləkəma ka kwasə buradi na kula yist ni mnyar vir ngkwa, antə akwa vir na murfəkur, ka giri tsaptədzi kamnyar vəngkər səli aka MTHLAKU na Hyelər giri. Antə vir nda giri aɗiya hara kəthlər wala raka wa.”

⁹“Ka giri jikaɓəla sati murfa, giri ata baɗitə jikari ka sakatə giri baɗitə nthlə mthli.

¹⁰Antə giri ata baɗitə hara Kucalər Thli Sur Faku kamnyar nar olkur aka MTHLAKU na Hyelər giri, atar hamta sur hamta ar hirər ɗəffu. Waskəi ata hamtari kalkal ka hangkur barka tə tsa wuta akəla MTHLAKU na Hyelər giri.

¹¹Antə giri ata hara kucali akəma MTHLAKU na Hyelər giri, ata vəi tə tsa carɓəla kamnyar ka mdə vəngkər səli alari ata. Giri ata hara kucali ni ata kəma duku kəga maɗa' giri, kəga buɗayeri ar giri shili ka mwanki, kəga mjir Lawi na akwa kauyayeri ar giri, har kəga mətəpiyayeri, kəga mutayeri, kəga kughungayeri na akwa nca giri.

¹²Ka giri ɗangta abbər waci giri mafa akwa tsəɗi Masar. Antə apani ka giri ɓəlatə tsawayeri ngəni.”

¹³“Aghəla tə giri ku dəkəmta mthlir giri ata lali, ka dlərɓəla yimər anap ar giri, ka tsagaptə ɗa avi, ka giri hara Kucalər Səvayeri mnyar vir murfa.

¹⁴Giri ata hara kucali ndaga ata kəma duku kəga maɗa' giri shili ka mwanki, kəga buɗayeri ar giri shili ka mwanki, kəga mjir Lawi, kəga mətəpiyayeri, kəga mutayeri, kəga kughungayeri na akwa kauyayeri ar giri.

¹⁵Giri ata hara vir murfa akwa hara kucalər vəngkər səli aka MTHLAKU na Hyelər giri ni ata vəi tə tsa ata carɓəla ni. Kamnyar MTHLAKU na Hyelər giri ku vədza barka aka shanga sur fakər giri ka shanga suayeri tə giri hara, antə kalkal ka giri hara kucali.”

¹⁶“Ka makər akwa kuta məva antə shanga mji shilər giri ata si akəma MTHLAKU na Hyelər giri ata vəi tə tsa ata carɓəlari, akwa sakar Kucalər Buradi na Kula Yist, ka akwa sakar Kucalər Thli Sur Faku, ka tsuwa akwa sakar Kucalər Səvayeri. Da aɗiya si akəma MTHLAKU kula su akwa tsiya ɗa wa.

¹⁷Ka waskəi hamta apatə tsa amzha, ata kəra hangkur barka tə tsa wuta akəla MTHLAKU na Hyelər giri.”

¹⁸“Ka kəlara nyarmbwa carɓəla mji tə da ata putə ɗa ka da ndzi alkaliyayeri ka mji ol'ola akwa kəlara di tə MTHLAKU na Hyelər giri ku hamta ala giri. Antə ka mji nayeri ni hara shariya ar jirkur aka mji.

¹⁹Giri aɗiya shinamta jirkur wa, wala nca zumzumkur wa. Tsuwa giri aɗiya dlu sur dzəɓ mnya wa, kamnyar sur dzəɓ mnya ana hartə nca mdə na ɗəɗu, ka vu ni ka tsa ndwaləmta jirkur ar mdə na ka jiri.

²⁰Tar jirkur, jirkur shini antə giri ata nuwari, kamnyar ka giri ndzi ka mpika, har ka fa kifər tsəɗi tə MTHLAKU na Hyelər giri akwa hamta ala giri ni.”

²¹“Ma sakatə giri akwa nam bagaɗi aka MTHLAKU na Hyelər giri, giri aɗiya ncidzə udzəm na dludzi ka haptu Ashera wa.

²²Giri aɗiya nci pela laga abbər tsa haptu tə giri ata vəngkər alari səli wa, kamnyar MTHLAKU na Hyelər giri ku nggəlar su ngəni.”