Read bura-pabir Zwarəngkər Shariya 17 Bible Online

Zwarəngkər Shariya 17 - bura-pabir bible

Zwarəngkər Shariya 17

¹“Giri aɗiya hamta saɗaka aka MTHLAKU na Hyelər giri ka gyal wala təma na ka nangka wala su laga na ɗimi wa, kamnyar ngəni an sur cika aka MTHLAKU na Hyelər giri.

²Nuhum mda asə wutə mdə laga akwa nca giri, wala mdə sal wala mdə mwala, akwa di laga tə MTHLAKU na Hyelər giri akwa hamta ala giri, akwa hara su na ɗimi ata nca MTHLAKU na Hyelər giri, akwa ɓəli alkawalərni,

³atar hara mafakur aka haptayeri, akwa vəngkər səli ala ɗa, wala aka pci, wala thliya, wala sasəlka, wala kəlara su na amtazi, natə MTHLAKU ku ngkata.

⁴Antə ma mdə ku sənta ala giri labar ata kər, wala ma giri ku nggatə su apani, ka giri nggaɓəla su ata kər ɓɗaku. Antə ma jili su na ɗimi ku hara apani akwa Israila jiri,

⁵ka giri mwantə mdə na hara su ngəni ɗimi ni akwa nyarfur di, ka giri ndzəndzəhtə ni har ka tsa mta.

⁶Ata kəra seɗar mji suɗa wala makər mda ata mzhi thlamta shariyar mta aka mda. Amma mda aɗi ata mzhi thlamta shariyar mta aka mda ata kəra seɗar mdə duku daci wa.

⁷Mji na seɗa ni an ata baɗitə ndzəhə mdə ni ka tsiya ɗa ntangkəma kamnyar ka tsa mta, kambəla mambila mji nu ghəla ɗa. Apani antə giri ata ngkatə jili ɗimikur ngəni akwa nca giri.

⁸Ma shariya na mwavər ku si akəma giri tə giri amzhi thlamtari wa, wala apa ata kəra mdə na ku tsi mda dzakdzakku wala karkara, wala beɗi ata kəra su, wala ata kəra mdə na ku dəkəi mda wala hilantə sur mda, ka giri mwari akwa vəi tə MTHLAKU na Hyelər giri ku carɓəla.

⁹Ka giri mwantə ndər ni akəma pristayeri, watau mjir nyarmbwar Lawi, ka alkali na akwa kəthlər saka nda. Mwar giri, adzə ɗa, antə da ata thlamta ala giri shariya na ata ndzi kalkal.

¹⁰Antə ka giri hara kalkal apa su tə mdə thlamta ala giri akwa shariya ni, akwa vəi tə MTHLAKU ku carɓəla.

¹¹Aghəla tə da ku ngkərɓəla su tə tsawu ni pəla, ka thlamta shariya ni, ata ndzi dwali ka giri nu su tə da pəla. Giri aɗiya fəlɓəla wala mbali su tə da pəla wala raka wa.

¹²Kəlara mdə na ku nggəlar ta kələngkər aka alkali wala prist na akwa kəthlər akəma MTHLAKU na Hyelər giri, ata ndzi dwali ka mdə tsi mdari. Atar apani antə giri ata mzhi ngkatə jili ɗimikur ngəni akwa Israila.

¹³Antə shanga mji ata nggatari ka thlivəra, tə mda aɗi na ata nggitə hara su apani ka damwa wa.”

¹⁴“Aghəla tə giri ku ləkwa tsəɗi tə MTHLAKU na Hyelər giri akwa hamta ala giri, ka giri ndzi mthlakari ka ndzəndzi akwa, nuhum gira asə pəla, ‘Kuji ka mburu vəi kuthli na ata hara kuthlikur ata kəra mburu, apatə shanga durayeri na kalaktə mburu kəgari.’

¹⁵Antə ma su apani ku hara, ka giri mbərsa abbər giri ata vətə kuthli natə MTHLAKU na Hyelər giri an carɓəla. Tar ka giri carɓəla mdə na ata ndzi kuthlir giri ni akwa nca maɗama' giri. Giri aɗiya vəi mətəpi, watau mdə natə tsa aɗi akwa nca maɗama' giri wa, ka tsa ndzi kuthlir giri wa.

¹⁶Amma diya, kuthli ni aɗi ata tsaptə takwayeri hang aka kərari mai, wala vu ka mji ngka ahar Masar kamnyar jakə hangkur takwayeri wa. Kamnyar MTHLAKU ku pəla ala giri abbər, ‘Giri aɗiya jaktə ngka anda wa.’

¹⁷Tsuwa kuthli ni aɗiya tsaptə mwanki hang aka kərari wa, ta da asə ndəkərəmta hangkalari kazhar nu Hyel. Tsuwa tsa aɗiya tsapta aka kərari adzərfa ka dinar hang wa.

¹⁸Ma sakatə tsa ku lətə dəkəl kuthlikur ni, ka tsa rubwaɓəla tsawayeri ngəni akwa kakaɗu kamnyar kərari, tsawayeri na rəbutə rəbutari akəla pristayeri na mjir Lawi ni.

¹⁹Antə tsa ata kəsi kakaɗə ngəni adzə ni, kamnyar ka tsa karatə ni akwa shanga ndzəndziyir mpikari, kamnyar ka tsa thliptə thlivər MTHLAKU na Hyelərni, ka ɓəlatə shanga tsawayeri na akwa.

²⁰Karatə ngəni tədəku ni ata ngkatə ni ta dzamər haptə kər abbər tsa ku təramta mambila maɗama' ni. Tsuwa ata ngkatə ni akwa pəramta akwa nu tsawu ni, antə apani tsa ka kəkayeri arni ata fəi akwa kuthlikur akwa Israila.”