Read bura-pabir Zwarəngkər Shariya 18 Bible Online

Zwarəngkər Shariya 18 - bura-pabir bible

Zwarəngkər Shariya 18

¹“Mjir Lawi na pristayeri, watau shanga mji na akwa nyarmbwar Lawi, aɗi ata wutə bwar ɗa akwa tsəɗi ni ata kəma duku kəga mambila mjir Israila wa. Arɗa nəɓwar ɗa an shanga saɗaka mbamba ka mambila sakayeri tə mda ana səntə ka hamta aka MTHLAKU, suayeri ngəni an ata ndzi susəmər ɗa.

²Da aɗi ata wutə kifa ar tsəɗi ni apatə maɗama' ɗa kəgari wa. Nəɓwar ɗa an ndzəndziyir pristkur ar MTHLAKU, apatə tsa ku hara ala ɗa alkawalari.

³Nggədza suayeri na ata ndzi nəɓwar pristayeri akwa nca saɗakayeri tə mji hamta, wala saɗakar thla wala təma, mda ata hamta pathlahari, ka mnyaraghəi, ka busari aka pristayeri.

⁴Tsuwa mda ata na ɗa yarakəmar sur faku, apa mthli, yimər anap, ka mal zaitun, har kəga shishir təma tə mdə pamta ntangkəma.

⁵Kamnyar akwa shanga nyarmbwayeri ar giri, MTHLAKU na Hyelər giri ku carɓəla mjir nyarmbwar Lawi kəga kəkayeri arɗa ka da hara kəthlər ar pristkur alari ba saka madi.”

⁶“Kəlara mdər Lawi na ata bara pali diyirni akwa kəlara sakatə tsa hira, tsa ata mzhi thlata akwa di tə tsa akwa hwatu, ka mwari akwa vəi tə MTHLAKU ku carɓəla kamnyar vəngkər səli.

⁷Antə tsa ata mzhi hara kəthlər ar pristkur aka MTHLAKU na Hyelərni anda, apatə mambila maɗama' ni akwa harari akəma MTHLAKU.

⁸Tsuwa tsa ata wutə hangkur susəma kalkal ka ar mambila pristayeri, ata kəra kwaba tə mjir kutakəyirni ata ɗələmta sur ɗa ka thlenta alari.”

⁹“Ma sakatə giri ku ləkwa tsəɗi natə MTHLAKU na Hyelər giri akwa na ala giri ni, giri aɗiya thlipə hara surcikayeri ar mji na anda ni wa.

¹⁰Giri aɗiya hir ka mdə wuta akwa nca giri mdə na ata hara saɗaka mbamba ka ɓzərni wala ngkwarni wa, wala mdər hakdzi wa, wala mdər mutukur wa, wala mdər hara surndatə mdə wa, wala mdər wulsu na ata hara akəmazi wa, wala mdər hara su ka dunar shatan wa,

¹¹wala mdər hara kuzəku aka mdə wa, wala mdər gari ka mambələr mji na ku mtə wa.

¹²Kamnyar kəlara mdə na ku hara su nayeri ni, tsa ku ndzi sur cika aka MTHLAKU. Kamnyar an kamnyar sur cika nayeri ni antə MTHLAKU na Hyelər giri akwa kədləɓəla durayeri ngəni akəma giri ni.

¹³Antə apani tar ka giri ndzi kula mda awutə sur nggəla adzə giri, ka giri ndzi ka jirkur aka MTHLAKU.”

¹⁴Antə Musa ləkəma akwa pəla, “Kamnyar mji tə giri ata ra kədləɓəla ɗa akwa tsəɗiyir ɗa ni ana ra hakdzi adzə ɗeaghayeri kəga mjir tsa di, amma ar giri, MTHLAKU na Hyelər giri aɗi kələngkər ala giri ka giri hara wa.

¹⁵MTHLAKU na Hyelər giri ata sə carɓəla ala giri naɓi laga akwa nca maɗama' giri tsu apatə tsa ku carɓəla ra. Tsa antə giri ata psi thləm alari.”

¹⁶“Kamnyar ngəni an su tə giri kiɗa akəla MTHLAKU na Hyelər giri vir tə giri tsaptədzi ata Gar Horeb ni. Kamnyar vir nda giri pəla, ‘Yeru aɗi ata bara jaktə nggatə kuraka MTHLAKU na Hyelər yeru akwa gari ala yeru kəra wa, wala jaktə wutə jili u'u ngəni ol ni wa. Kamnyar ma yeru ku jaktə nggatə kurakari, wala jaktə wutə u'u ni, yeru ata mta.’

¹⁷Antə MTHLAKU pəla ali, ‘Su tə da pəla ni kalkal.

¹⁸I ata carɓəla pal akwa nca maɗama' ɗa na ata ndzi naɓi tsu apa ga. I ata pu ndərərna akwa mnyari, antə tsa ata pəla ala ɗa shanga su tə I ku tsawa alari.

¹⁹Antə kəlara mdə na aɗi psi thləm aka ndərayeri tə tsa ata pəlari akwa thləmi ni wa, I ka kəri an ata yu mnyari ata kər.

²⁰Amma kəlara naɓi na ata namta apa tsa akwa gari akwa thləmi, amma aɗi I an pəla ka tsa gari ni wa, wala naɓi na ku gari akwa thləma haptayeri, naɓi ndaga ata mta.’ ”

²¹“Nuhum giri asə pəla akwa ɗəffa giri abbər, ‘Apa madi tə yeru ata mzhi nggaɓəla abbər ndər ngəni aɗi thlata akəla MTHLAKU wa ri?’

²²Ma naɓi na ku gari akwa thləma MTHLAKU, antə su tə tsa pəla ni aɗi sə hara wa, wala aɗi ndzi jiri wa, to, ndər ndaga aɗi MTHLAKU an pəla wa. Naɓi ndaga akwa gariyir kərari surni, antə giri aɗiya thlivər ni wa.”