Read bura-pabir Zwarəngkər Shariya 2 Bible Online

Zwarəngkər Shariya 2 - bura-pabir bible

Zwarəngkər Shariya 2

¹Antə yeru ku shinardzi ka ləkwa mwari akwa mtaku atar lakur Manda Duwathlu apatə MTHLAKU ku pəla ali. Antə yeru ku hara vir hang akwa kalaktə bwar garayeri ar Seyir.

²Antə MTHLAKU pəla ali,

³“Giri ku fəi akwa kadlər kalaktə bwar garayeri ngəni. Kulini shinar girdzi ka giri nu təbwar yala.

⁴Ka gə tsawa aka mji ni abbər ka da nu təbwar tsəɗi yangkura ɗa na mjir nyarmbwar Isuwa, na ka ndzi akwa Seyir. Wala tə da akwa thlivər giri, ka giri hara su ka hangkal,

⁵giri aɗiya bara mpar ɗa wa. Kamnyar I aɗi ata hamta ala giri tsəɗiyir ɗa wa, wala apa baukur kur səla giri pal. Kamnyar I ku kurtə hamta bwar garayeri ni aka nyarmbwar Isuwa ka tsa ndzi apa kifər ɗa.

⁶Shanga susəma tə giri ata səmari ka yimi tə giri ata sa ri, giri ata masmasari akəla ɗa ka liyar adzərfa.”

⁷Kamnyar MTHLAKU na Hyelər giri ku vədza ala giri barka akwa shanga kəthlər tsiya giri. Tsa asəndə shanga mwar giri na akwa mtaku ni. MTHLAKU na Hyelər giri ku ndzəndzi ata vəi duku ka giri akwa məva ngəni nfwarkumari ni, giri aɗi ni ka su wa.

⁸Antə yeru ku ləkəma ka mwa, ka thlamta yangkura yeru na mjir nyarmbwar Isuwa, na ka ndzi akwa tsəɗi Seyir, ka zhar lakur Araba na thlata ahar Elath ka Eziyongeber. Sakatə yeru shinardzi ka tamtə laku na nu təbwar mtakər Mowab,

⁹antə MTHLAKU pəla ali, “Giri aɗiya damitə mjir Mowab wa, wala bara mpar ɗa wa, kamnyar I aɗi ata na ala giri wala bwa laga raka akwa kuta tsəɗiyir ɗa ka tsa ndzi ar giri wa. I ku kurtə ka hamta Ar ka tsa ndzi tsəɗiyir mjir nyarmbwar Lot.”

¹⁰Waci mjir Emim an akwa di ni, mji laga na gurjam gurjam, dlama dlama, ka tsuwa saɓəl saɓəl apa mjir Anak.

¹¹Tsuwa mdə ku səndə mjir Emim ka mjir Refa abbər da an maɗa' Anak, amma mjir Mowab andər kəga ɗa abbər mjir Emim.

¹²Waci mjir Hori an ndzəndzi akwa tsəɗi Seyir ni, amma mjir nyarmbwar Isuwa ku si ka kədləmta ɗa, ka kurəmta hang akwa nca ɗa, ka ndzəndzi anda, tsu apatə aghəla nda mjir Israila ku hara aka mjir tsəɗi Kanana, natə MTHLAKU hamta aka mjir Israila ka tsa ndzi tsəɗiyir ɗa.

¹³Antə Musa ku ləkəma ka gari ka pəla, “Antə tsu apatə MTHLAKU ku tsawa ala yeru antə yeru ku thlatə ka mwari aɓəla bwanda Thlyagha Zered.”

¹⁴Hangkur məva tə yeru hara akwa mwar yeru na thlata ahar Kadesh Barneya ka mwari ahar Zered ni an məva makkumari ka ncisu. Antə shanga mji shili na ku mzhi mwari akwa mpa na akwa zaman ndaga ku mtəgəmtadzi akwa mtaku ni tsu apatə MTHLAKU ku pəla.

¹⁵Jiri, MTHLAKU ku nggəlar ɗa. Tsa akwa bara ɗi ɗa, har tar ma tsa ku kurəmta ɗa shang kazhar vəi fəliyir ɗa ni.

¹⁶Sakatə shanga mji na ku mzhi ləkwa mpa ku kurəmtadzi,

¹⁷antə MTHLAKU pəla ali abbər,

¹⁸“Ashina giri ata təramta ata kəla tsəɗi Mowab atəbwar Ar.

¹⁹Ma sakatə giri ku mzhitə tsəɗiyir mjir Ammon, giri aɗiya damitə ɗa wa, wala bara mpar ɗa wa. Kamnyar I aɗi ata hamta ala giri bwa laga wala raka akwa kuta tsəɗiyir mjir Ammon ka tsa ndzi apa kifa ar giri wa, kamnyar I ku kurtə hamta tsəɗi ni aka mjir nyarmbwar Lot ka tsa ndzi arɗa.”

²⁰Tsuwa mdə ku kurtə səndə tsəɗi ngəni abbər tsa an tsəɗiyir mjir Refa. Shang waci mjir Refa an ndzəndzi anda, amma mjir Ammon ana kəga ɗa Zamzummim.

²¹Da ma da mji na gurjam gurjam, dlama dlama, ka tsuwa saɓəl saɓəl apa mjir Anak. Amma MTHLAKU ku shamta ɗa kamnyar ka mjir Ammon mzhi ndzi akwa vəi ndzəndziyir ɗa.

²²Antə MTHLAKU ku hara ka da tsu apatə tsa hara ka mjir nyarmbwar Isuwa, antə da ku ndzəndzi akwa vəi ndzəndziyir ɗa har ba ashina.

²³Tsu an jili su na hara sakatə mjir Kaftor na thlata ahar Krete mwari ka dlərəmta mjir Avvim na ka ndzi akwa kauyayeri ar Gaza, ka ndzəndzi akwa vəi ndzəndziyir ɗa.

²⁴Antə MTHLAKU pəla, “Thlatə giri, ka giri psi laku, ka giri fəlɓəla Thlyagha Arnon. Kamnyar kulini, I ku hamta Sihon na kuthlir mjir Amor, na akwa hara kuthlikur ahar Heshbon, japu ka tsəɗiyirni akwa tsiya giri.

²⁵Baɗita ashina I ata vu ka shanga mji na akwa duniya ni thlivər giri ka yakata. Kəlara sakatə da ku nggatə labar ata kəra giri, da ata damitədzi ka duna har ka dza ɗa kədza.”

²⁶Antə Musa ləkəma ka pəla, “Saka tə mburu tsu anda akwa Mtakər Kedemoth, I ku thlentə mji ka da mwari adzə Kuthli Sihon na ahar Heshbon, ka labar ar lapiyakur, abbər

²⁷‘Ndzi ka yeru təramta akwa tsəɗiyir nga. Yeru ata nu laku daci, yeru aɗi ata pəramta abwa mazəm wala abwa matsəkar wa.

²⁸Shanga susəma tə yeru ata səmari ka yimi natə yeru ata sari, yeru ata masmasari ka kwaba. Ar yeru, su tə yeru akwa barari an təng ka gə dlar yeru ka yeru təramta akwa tsəɗiyir nga.

²⁹Antə usa, dlar yeru ka yeru təramta akwa tsəɗiyir nga, tsu apatə mjir nyarmbwar Isuwa na ka ndzi ahar Seyir, ka tsuwa mjir Mowab na ka ndzi ahar Ar, ku kələngkər tə yeru təramta akwa tsəɗiyir ɗa. Kamnyar yeru akwa bara ka yeru fəlɓəla Thlyagha Jodan, ka mwari akwa tsəɗi tə MTHLAKU na Hyelər yeru ata na ala yeru.’ ”

³⁰“Amma Sihon na kuthlir mjir Heshbon aɗi hir ka mburu təramta wa, kamnyar MTHLAKU na Hyelər mburu ku namtə ɗəffari ka kərari ɓəɓal, kamnyar ka tsa hamta ni akwa tsiya mburu, apatə tsa ku hara kulini.”

³¹“Antə MTHLAKU pəla ali, ‘Wul, I ku hamta Kuthli Sihon ka mjirni akwa tsiya giri, Antə kulini, ka giri baɗitə pwa ata kəra ɗa ka mpa, har ka giri dlutsə tsəɗiyirni ka giri ndzəndzi akwa.’

³²Antə Kuthli Sihon ku səɓəla kəga mjirni ka da mpa mburu ahar Yahaz.

³³Amma MTHLAKU na Hyelər mburu ku hamta ni akwa tsiya mburu, tə mburu ku tsi ni kəga maɗashilərni, ka shanga mjirni.

³⁴Vir nda mburu ku səməmnya shanga kauyayeri ka mpa, ka kurəmta shili ka mwanki kəga maɗankyar. Mdə wala duku aɗi na ku mbil ka mpikə wa.

³⁵Təng mwaɓiyayeri antə mburu fata, ka shanga suayeri tə mburu dlutsa aka kəra mburu akəla mjir kauyayeri ni.

³⁶Tsuwa MTHLAKU na Hyelər mburu ku dlar mburu tə mburu ku səm di Arower na ata mnya Thlyagha Arnon, ka di laga na akwa mular, har ka pudza aka Gileyad. Di aɗi na akwa katangga na ku mula ala mburu wa.

³⁷Tar tsəɗiyir mjir Ammon daci antə mburu aɗi mwari adzə kudzəhə wa, tsəɗi na ata mnya Thlyagha Yabbok, ka kauyayeri na abwar garayeri, ka mambila vəyayeri natə MTHLAKU ku tsawa ala mburu abbər mburu aɗiya ləkwa wa.”