Read bura-pabir Zwarəngkər Shariya 20 Bible Online

Zwarəngkər Shariya 20 - bura-pabir bible

Zwarəngkər Shariya 20

¹“Ma sakatə giri ku ləɓəla kamnyar mpa dawar giri, antə giri wutə ɗa ka takwayeri kəga wagənayeri ar taku, ka sojayeri na hangta ar giri, giri aɗiya thlivər ɗa wa, kamnyar MTHLAKU na Hyelər giri na fwaɓəla giri akwa tsəɗi Masar ata ndzi ata vəi duku kəga giri.

²Akəma ta giri amwari akwa mpa, ka prist mwari akəma, ka tsa gari aka sojayeri ni.

³Tsa ata pəla ala ɗa, ‘Psi gir thləma giri, mjir Israila! Ashina giri ata ləɓəla kamnyar mpa dawayeri ar giri. Giri aɗiya shishiɓə wa, wala thlivər wa, wala yakatə wa, wala kədza kamnyar ɗa wa,

⁴kamnyar MTHLAKU na Hyelər giri an ata mwari kəga giri, ka tsa hamta ala giri nggyari su.’ ”

⁵“Antə mji na ol'olər sojayeri ni ata pəla aka sojayeri ni, ‘Mda aɗi na haɗa kuri latə kəyirni, amma tsa aɗi hamta aka Hyel katagu wa ya? Ma aɗi, ka mdari ngka avi, ta nuhum tsa asə mta akwa mpa ni ka mdə damwa an sə hamta kəi ni aka Hyel.

⁶Tsuwa mda aɗi na haɗa ncimta nfur anap arni, amma tsa aɗi baɗitə səm ampaniyari katagu wa ya? Ma aɗi, ka mdari ngka avi, ta nuhum tsa asə mta akwa mpa ni ka mdə damwa an sə nggatə msərakurari.

⁷Tsuwa mda aɗi na ku mbwangkər ngyika aka mwala, amma tsa aɗi dlu ni katagu wa ya? Ma aɗi, ka mdari ngka avi, ta nuhum tsa asə mta akwa mpa ni ka mdə damwa an sə kəl mwala ni.’ ”

⁸“Mji na ol'olər sojayeri ni ata ləkəma ka gari ala ɗa abbər, ‘Mda aɗi akwa nca giri na ku thlivəra, wala akwa shishiɓə ya? Ma aɗi, ka mdari ngka avi, ta tsa asə fəi shaha maɗama' ni tsuwa.’

⁹Ma sakatə mji na ol'ol ni ku kuri gari aka sojayeri ni, ka da carɓəla ala ɗa mji na ata pwar kəlara zara.”

¹⁰“Ma sakatə giri ku hara kudzəhə ka di tə giri ata dlərari ni, ka giri thlentə mji ka labar ar bara ɗa ka msərakur.

¹¹Antə ma da ku dlu ndər ni, ka hamta kərɗa ala giri, to, shanga mjir di ni ata ndzi mafar giri, ka da hara kəthlər mafakur ala giri.

¹²Amma ma mjir di ni ku nggəlar ta dlu ndər ar msərakur ni, tə da pəla da ata mpa giri, ka giri kalaktə di ni ka sojayeri ar giri.

¹³Ma sakatə MTHLAKU na Hyelər giri ku hamta di ni akwa tsiya giri, ka giri tsəgəi shanga mji shili na akwa di nda ka katsakar.

¹⁴Giri ata mzhi fatə mwankir ɗa, kəga maɗa' ɗa, kəga mwaɓiyir ɗa, ka mambila su shang na akwa di nda. Suayeri ngəni an ata ndzi nəɓwar giri akwa mpa ni. Antə giri ata mzhi kəthlər ka suayeri ngəni tə giri fatə ni aka kəra giri, suayeri tə MTHLAKU na Hyelər giri hamta ala giri.

¹⁵Apani antə giri ata hara ka kəlara kauyayeri na ciju, watau kauyayeri natə aɗi ar mji na kudzəhə ka giri wa.”

¹⁶“Amma kauyayeri ar durayeri natə MTHLAKU na Hyelər giri akwa hamta ala giri ka da ndzi ar giri ni, giri aɗiya zhar su na ka mpika akwa wa.

¹⁷Ka giri kurəmta ɗa shang, watau mjir Hitti, ka mjir Amor, ka mjir Kanana, ka mjir Perizzi, ka mjir Hivi, ka mjir Yebusi, apatə MTHLAKU na Hyelər giri ku tsawa ala giri.

¹⁸Ka giri kurəmta ɗa shang ta da asə thlipta ala giri surcikayeri tə da ana hara aka haptayeri arɗa, har ka da sə vu giri akwa hara biku aka MTHLAKU na Hyelər giri.”

¹⁹“Ma giri ku fəi akwa kalaktə di, tə giri akwa mpa abbər ka giri səm ɗa, giri aɗiya kətə kəma ka nthləgəmta nfwayeri tə da ana səma akwa diyir ɗa wa, kamnyar giri ata mzhi səm yar nfwayeri ni. Antə giri aɗiya nthləgəmta ɗa wa. Kamnyar nfwayeri na akwa mtaku aɗi mji tə giri apəla giri ata mwanta ala ɗa mpa wa.

²⁰Giri ata mzhi nthləi nfwayeri damwa natə mda aɗi ana səm yar ɗa wa, ka hara kəthlər kəgari akwa kalaktə di ni ka sur ndlə məciɓa, har ka giri səm di ni.”