Read bura-pabir Zwarəngkər Shariya 21 Bible Online

Zwarəngkər Shariya 21 - bura-pabir bible

Zwarəngkər Shariya 21

¹Antə Musa ku ləkəma ka gari ni akwa pəla, “Nuhum mda asə wutə mshiyir mdə laga tə mdə tsi ka psəmta ata bəbal akwa mtaku kula mda adza, akwa tsəɗi tə MTHLAKU na Hyelər giri akwa hamta ala giri ni, tsuwa mda asəndə mdə na tsi ni wa.

²Antə ma su ku hara apani, ka mji ol'olər giri kəga alkaliyayeri ləɓəla, ka da mwari akwa vəi tə mshi ata ni, ka da dzatə cijukur kauyayeri na kudzəhə ka vəi tə mshi ni ata.

³Antə mji ol'olər di na kudzəha ta shang ka mshi ni ata kətə mbəkəl thla natə mda aɗi ɗar kəthlər ka tsa wa, tsuwa mda aɗi ɗar vəta alari udzəm thlar kukula wa.

⁴Mji ol'olər di ni ata mwantə mbəkəl thla nda akwa mular tə yimi aɗi ana hwi akwa wa, vəi tə mda aɗi ɗar kukulari, wala thləkari wa, ka mdə ɓələmta wulyari.

⁵Antə pristayeri na akwa nyarmbwar mjir Lawi ni, ata ləɓəla tsuwa ka da mwari anda, kamnyar MTHLAKU na Hyelər giri ku carɓəla ɗa ka da hara kəthlər alari, tsuwa ka da vəngkər barka akwa thləmari. Tsuwa tsa carɓəla ɗa kamnyar ka da shwalatə beɗi na thlata akwa daɓwa mji, ka thlamta shariyar mdə na ku dəkəi mda, wala hilantə sur mda.

⁶Antə shanga mji ol'olər di na kudzəhə ka vəi tə mshiyir mdə ni ata ni, ata kəcingkər tsiya ɗa aka mbəkəl tə mdə ɓələmta wulyari akwa mular ni,

⁷ka da pəla, ‘Aɗi yeru an tsi mdə ngəni wa, tsuwa nca yeru aɗi wutə mdə na haratə ɗimikur ar tsi mdə ngəni wa.

⁸MTHLAKU, ka gə tifəmta aka mjir nga Israila, mji tə gə pəli ɗa. Tsuwa ga aɗiya vəngkər bikər tsi mdə ngəni kula biku ni ata kəra mjir ngə ni wa.’ Antə mda ata yafitə ɗa ata kəra mtər mdə ngəni.

⁹Atar nu suayeri ngəni, ka hara suayeri na kalkal akəma MTHLAKU, antə giri ata kəcimta bikər tsi mdə ngəni akwa nca giri.”

¹⁰“Ma sakatə giri ku ləɓəla kamnyar mpa dawayeri ar giri, antə MTHLAKU na Hyelər giri ku hamta ɗa ala giri, tə giri ku ngkəgəi ɗa ka da ndzi mafa.

¹¹Nuhum mdə laga akwa nca giri asə wutə mwala na dakwi akwa nca ɗa, tə tsa ku nggukta, har tə tsa akwa bara ka tsa kəl ni ka tsa ndzi mwalankiɗa.

¹²Ma su apani ku hara, ka tsa mwantə mwala ni aviyarngkiɗa, ka tsa vu ka mdə shimta kəra mwala ni, ka pamta mpəlari.

¹³Antə mwala ni ata pali zhaɓərni, ka tsa ndzəndzi aviyarngkiɗa har thliya pal, akwa tuwa mtər mama'ni ka baba'ni. Aghəla nda sal ni ata mzhi ləmbwa adzə mwala ni, ka tsa ndzi salngkiɗa, ka mwala ni ndzi mwalankiɗa.

¹⁴Amma ma tsa aɗi nggatə msərakur mwala ni wa, ka tsa psi ni ka tsa təra mwari akwa vəi tə tsa hira. Tsa aɗiya ɗəl mwala ni wa, wala namtə ni apa mafa wa, təng tə tsa ku pi ka tsa apa mwalankiɗa.”

¹⁵“Ma mdə ka mwanki suɗa, amma tsa hir mwala na duku təramta mwala na dukwari. Antə japwa ɗa ku yaɓəla alari maɗashili, amma ɓzər mwala dəra ni an yarakəmar kutakəi ni.

¹⁶Ma vir tə mdə ni ata bara ndəkəmta sur kifa arni aka maɗashilərni, tsa aɗiya namtə ɓzər mwala miwa ni apa tsa an yarakəma ata vəya ɓzər mwala dəra na yarakəma ni wa.

¹⁷Dwali ka tsa wul darajar olkur ɓzər mwala dəra na yarakəma ni, atar hamta alari bwa suɗa ar shanga su tə tsa kəgari, kamnyar tsa an seɗa na ntangkəma ar dunar salkurərni. Antə su na ku ndzi kamnyar yarakəma ata ndzi alari.”

¹⁸“Ma mdə na ka ɓzər na ka kərari ɓəɓal na hir thlentə hangkala mda, ɓzər na aɗi ana kələngkər aka baba'ni wala mama'ni wa, natə wala tə da akwa ɗi ni, tsa aɗi akwa nggatə ndər wa,

¹⁹to, ka baba'ni ka mama'ni ngkəi ni, ka da mwantə ni aɓəla aka mji ol'olər kuta di akwa nyarfur diyir ɗa.

²⁰Antə da ata pəla aka mji ol'ol ni abbər, ‘Ɓzər yeru ngəni akwa hara kər ɓəɓalkur ka thlentə hangkala mda. Tsa aɗi ana kələngkər ala yeru wa. Tsa ɓzər na hilhilari, hir wika!’

²¹Antə shanga mji shilər di ni ata ndzəndzəhtə ni ka pela, har ka tsa mta. Apani antə giri ata ngkatə ɗimikur akwa nca giri. Antə shanga mjir Israila ata nggatə su ata kər, ka thlivəra.”

²²“Ma mdə na ku ɓzamtə su tə kalkal ka mdə thlamta alari shariyar mta, antə mdə ku tsi ni, ka hahəi mshiyirni ata nfwa,

²³mda aɗiya zhar ka mshiyirni ni pi ata nfu ni wa. Ka mdə harəmta ni tsu vir nda. Kamnyar kəlara mdə natə mdə ku hahəi mshiyirni ata nfwa, tsa an su na ɗimi akəma Hyel. Antə giri aɗiya ɓzamtə tsəɗi natə MTHLAKU na Hyel giri akwa hamta ala giri apa kifə ni wa.”