Read bura-pabir Zwarəngkər Shariya 22 Bible Online

Zwarəngkər Shariya 22 - bura-pabir bible

Zwarəngkər Shariya 22

¹Antə Musa ku ləkəma ka gari akwa pəla, “Ma ga ku wutə thla wala təmar ntəwulər nga akwa lətə mtaku, ga aɗiya zhar ni wa. Kalkal ka gə ngka ka tsa aka ntəwulər nga.

²Amma ma mthlakari ni aɗi kudzəha wa, wala tsuwa ma ga asəndə ni wa, ga ata mzhi ləvəi kəgari aharngkiri, ka tsa ndzi akəla ga har tar ma sakatə mthlakari ku si akwa pakari, antə ga ata hamta ni alari.

³Apani antə ga ata hara ka kwarar ntəwulər nga, ka ləptərni, ka kəlara sur ntəwulər nga na ku sha tə ga ku wuta. Ga aɗiya hamta kəma gə wa.”

⁴“Ma ga ku wutə kwara wala thlar ntəwulər nga ndla akwa laku, ga aɗiya zhar ni wa. Ka gə dlar ni ka ra thlentə ni ata səlari.”

⁵“Mwanki aɗiya ha ləptər mji shili wa, tsuwa mji shili aɗiya ha ləptər mwanki wa. Kamnyar kəlara mdə na ana ha su apani tsa ata ndzi sur cika aka MTHLAKU na Hyelər giri.”

⁶“Ma ga ku karəngkər aka mbwar ɗika ata nfwa wala ata di, ka maɗa' wala thlithli akwa, ka məmari apəpəi ata kəra ɗa, ga aɗiya fatə maɗa'ni ni purəm kəga məmari ni wa.

⁷Ga ata mzhi fatə maɗa'ni ni, amma ka gə zhar məmari ka tsa təra, kamnyar ka su mwa lapiya ala ga, tsuwa far nga ata hara saɓəl.”

⁸“Ma ga ku həntə mbwa bilən ka thlirtə kərari, ka gə kalaktə tenga kəra mbwa ni ka dənggələsu, ta mdə asə təri ata ka mta, ka mdə vəngkər ala gə biku ar tsi mdə na təri ni.

⁹Ga aɗiya thləka hwulfayeri zumzum suɗa akwa fakər anap ar ngə wa. Kamnyar ma ga ku hara, ga ata ni ka sur fakər ngə ni ka yar nfur anap na akwa ni, kamnyar mda ata mwantə ɗa japu akwa Vəi na Ɓɗakkarkara.”

¹⁰“Ga aɗiya paktə thla ka kwara ka da ndəkər garma pal wa.”

¹¹“Ga aɗiya ha ləptu natə mdə tsa ka lilin ata kəma duku ka puwar shishir təma wa.”

¹²“Ka gə nduɓtə bugzərayeri akwa kuɗəmayeri nfwar ar ləptər nga.”

¹³“Ma mdə na ku kəl mwala. Antə aghəla tə tsa ku pi ka tsa, tsa pəla tsa aɗi ata hir ni kəra wa,

¹⁴ka ləkwa mnya ɗimi ata kərari abbər tsa ku hara sur səli, akwa hilantə thləmari ata bəbal abbər, ‘I ku kəl mwala ngəni, amma sakatə I bara ni ar sal ka mwalakur, təng I wuta abbər tsa aɗi ɓzərngkwa na kula səndə sal wa.’

¹⁵Ma su apani ku hara, to, ka baba' ngkwa ni ka mama'ni kətə zhaɓər vəi piyir ɗa na ka mamshi ka da mwanta akəma alkaliyayeri kəga mji ol'olər kuta di kamnyar ncanta abbər ngkwa ni aɗi səndə sal wa.

¹⁶Antə baba' ngkwa ni ata pəla aka mji ol'olər kuta di ni abbər, ‘I ku hamta ngkwarna aka mdə ngəni ka tsa kəla, amma kulini tsa ahirni kəra wa.

¹⁷Nggədza tsuwa tsa ku hilantə thləma ngkwa ni, akwa pəla, “I aɗi wutə seɗar ncanta abbər ngkwar ngə ni kula səndə sal wa.” Amma nggədza seɗa na ata ncanta abbər ngkwarna aɗi səndə sal wa.’ Antə mjir yar ngkwa ni ata pəbəlar zhaɓər ngkwa ni akəma mji ol'olər kuta di ni.

¹⁸Antə mji ol'olər kuta di ni ata kətə sal ni ka da dlaɓu ni ka purpu.

¹⁹Tsuwa da ata hakatə sal ni ka tsa ntə liyar adzərfa aru pal, ka tsa hamta aka baba' ngkwa ni. Kamnyar mdə ni ku hilantə thləma ngkwar Israila na aɗi səndə sal wa. Antə ngkwa ni ata ləkəma ka ndzi mwalankiɗa, tsuwa akwa shanga ndzəndziyir mpika ɗa, sal ni aɗi ka dunar nggəlar ngkwa ni wa.”

²⁰“Amma ma mdə nggaɓəla abbər su tə salər ngkwa ni pəla ni an jiri, tsuwa mda aɗi wutə seɗa ar ncanta abbər ngkwa ni ɓzərngkwa na kula səndə sal wa,

²¹to, alkaliyayeri ni ata mwantə ngkwa ni anyarfur baba'ni. Antə mji shilər kuta diyirni ni ata səɓəla ka da ndzəndzəhtə ni ka pela har ka tsa mta, kamnyar tsa ku haratə sur səli akwa Israila atar pi ka sal akəmata tsa akəldzi sakatə tsa tsu aviyar baba'ni. Apani antə giri ata ngkatə ɗimikur ngəni akwa nca giri.”

²²“Ma mdə ku ngkəi mdə laga akwa pi ka mwalar mdə damwa, japwa ɗa mda ata tsi ɗa, sal na pi ka mwala ni, ka mwala ni. Apani antə giri ata ngkatə jili ɗimikur ngəni akwa Israila.”

²³“Ma mdə ku ngkəi mdə laga akwa pi ka mwala akwa kuta di, mwala tə mdə laga ku zhuta,

²⁴to ka mdə mwantə ɗa aɓəla ata hildi, ka mji ndzəndzəhtə ɗa ka pela, har ka da mta. Ar ɓzərngkwa ni mda ata tsi ni kamnyar tə tsa aɗi hara kuraku ka mji səvə ni wa, amma da akwa kuta di. Ar sal ni tsuwa mda ata tsi ni kamnyar tə tsa ku hilantə ngkwar ntəwulərni. Apani antə giri ata ngkatə jili ɗimikur ngəni akwa nca giri.”

²⁵“Ma mdə sal laga ku kəɓa ka ɓzərngkwa laga akwa mtaku, ɓzərngkwa natə mdə laga ku mbwangkər alari ngyika. Antə sal ni ngkəi ni ka dunar ɗəva, ka pi ka tsa, to, sal na pi ka mwala ni shini antə mda ata tsiyari.

²⁶Mda aɗi ata hara su aka ɓzərngkwa ni wa, kamnyar tsa aɗi hara biku na ku mzhi ka mdə tsi ni wa, kamnyar su ngəni ndzi apa mdə na lətə kəra ntəwulərni ka mpa ka tsi ni.

²⁷Kamnyar təng tə mdə ni ku ngka ɓzərngkwa ni akwa mtaku, nuhum ngkwa ni ku hara kuraku abbər ka mdə mbuli ni, amma mdər dlara aɗi wa.”

²⁸“Ma mdə laga ku wutə ɓzərngkwa na aɗi ka ngyika ata kərari wa, antə tsa ngkəi ni ka dunar ɗəva, ka pi ka tsa. Ma mdə ngkəi ɗa akwa hara su ni,

²⁹to mdə na pi ka ngkwa ni ata ntəmta liyar adzərfa ntəfkumari aka baba' ngkwa ni, ka ngkwa ni ndzi mwalankiɗa. Kamnyar tə mdə ni ku ngka ngkwa ni ka dwali ka hilantə ni, tsuwa akwa shanga ndzəndziyir mpika ɗa, sal ni aɗi ka dunar nggəlar ngkwa ni wa.”

³⁰“Mda aɗiya pi ka mwalar baba'ni wa, kamnyar ngəni ata səntə rutə aka baba'ni.”