Read bura-pabir Zwarəngkər Shariya 23 Bible Online

Zwarəngkər Shariya 23 - bura-pabir bible

Zwarəngkər Shariya 23

¹Antə Musa ləkəma ka gari akwa pəla abbər, “Kəlara mdə natə mdə ku tasɓəla ni, wala thlamta vəi salkurari, tsa aɗi ata ləkwa tsaptədzi ar mjir MTHLAKU wa.”

²“Mdə na miɗar aɗi ata ləkwa tsaptədzi ar mjir MTHLAKU wa. Tsuwa har ka mwanta akwa zaman na kumkur kəkayeri arni aɗi ata ləkwa tsaptədzi ar mjir MTHLAKU wa.”

³“Mdər Ammon wala mdər Mowab aɗi ata ləkwa tsaptədzi ar mjir MTHLAKU wa. Antə har ka mwanta akwa zaman na kumkur, mda aɗi akwa nyarmbwar ɗa na ata ləkwa tsaptədzi ar mjir MTHLAKU wa.

⁴Ngəni an kamnyar tə da aɗi mwari ka thlakəma giri ata laku ka susəma ka yimi sakatə giri səɓəla akwa Masar wa. Nggədza tsuwa da ku kəgatə Balaam na ɓzər Beyor na ahar Pethlor na akwa Mesopotamiya ka tsa shuwumta giri.

⁵Amma MTHLAKU na Hyelər giri aɗi nggar Balaam wa, tsa shinantə shushukur ni tə tsa ndzi barka ala giri, kamnyar MTHLAKU na Hyelər giri ni hir giri.

⁶Giri aɗiya hara su na ata dlar ɗa wa, wala hara su na ata vu ka da wutə ləkəma akwa shanga ndzəndziyir mpika giri wa.”

⁷“Giri aɗiya cikə mdər Edom wa, kamnyar tsa an ɓzərma' giri. Tsuwa giri aɗiya cikə mdər Masar wa, kamnyar waci giri ku ndzi mətəpi akwa tsəɗiyir ɗa.

⁸Maɗa' ɗa na akwa zaman na makərkur, giri ata mzhi dlu ɗa akwa tsaptədzi ar mjir MTHLAKU.”

⁹“Ma sakatə giri ku nci vəi fəliyir giri kamnyar mpa dawayeri ar giri, ka giri ɓəlatə kər giri ta hara kəlara ɗimikur.

¹⁰Ma pal akwa nca sojayeri ar giri ku diɓərantə kərni aviri, atar suni abbər tsa akwa pi ka mwala ka pumta yimər dzari, to, ka tsa ləɓəla kazhar vəi fəliyir ɗa ni, ka tsa ndzi tsu aɓəla.

¹¹Amma ma tahaku ku hara, ka tsa pəra ka yimi, antə ma sakatə kalkal pci ata təri, tsa ata mzhi ngka akwa vəi fəliyir ɗa ni.”

¹²“Ka giri namtə timbəli aɓəla vəi fəliyir giri ni, tə giri ata ləɓəla parang kamnyar kəthlər kəgari.

¹³Ka giri kətə sur lara ku akwa nca kari tə giri ata kəthlər kəgari, kamnyar kəlara sakatə giri ku ləɓəla kamnyar təhəmta civi, ka giri lamta ku ka hartə civi ni akwa.

¹⁴Kamnyar MTHLAKU na Hyelər giri ana mwa akwa kuta vəi fəliyir giri ni kamnyar ɓəlatə giri. Antə dwali tar ka kuta vəi fəliyir giri ni ndzi kəcəkəcari, ta tsa asə wutə sur cika akwa nca giri ka tsa shinadza ala giri bwahili.”

¹⁵“Ma mafa ku msər akəla mthlakərni ka hwi ka sə bara vəi ɗuwardzi adzə giri, giri aɗiya ngka ka tsa aka mthlakərni ni wa.

¹⁶Tsa ata mzhi ndzi akwa nca giri, akwa kəlara di tə tsa carɓəla, antə giri aɗiya hara alari bwani wa.”

¹⁷“Mdər Israila, sal wala mwala, aɗiya hara karwakur wala kilakur akwa vəi mbwar vəngkər səli wa.”

¹⁸“Giri aɗiya sənta akwa mbwar MTHLAKU na Hyelər giri kwaba tə giri wuta akwa karwakur wala kilakur wa, wala tsa an mdə sal wala an mdə mwala, kamnyar ntəmta su tə tsa kətə alkawalari wa. Kamnyar su nayeri ni japu an sur cika aka MTHLAKU na Hyelər giri.”

¹⁹“Giri aɗiya hamta təpa aka ɓzərma' giri ka bara riɓa ata kər wa, wala ata kəra təpar kwaba, wala ata kəra susəma, wala kəlara su madi tə mda ata mzhi wutə riɓa ata kər.

²⁰Giri ata mzhi hamta təpa aka mətəpi ka bara riɓa ata kər, amma aɗi akəla mdər giri na mdər Israila wa. Antə apani MTHLAKU na Hyelər giri ata vədza barka aka shanga su tə giri ata harari akwa tsəɗi tə giri ata ləkwari ka ndzi mthlakari ni.”

²¹“Ma giri ku hara alkawal aka MTHLAKU na Hyelər giri, giri aɗiya shamta saka akwa lakur nghyaɓəlari wa, kamnyar MTHLAKU na Hyelər giri ata yuwari akəla giri. Antə ma giri aɗi nghyaɓəla alkawal ni wa, ata ndzi ala giri biku.

²²Amma ma giri aɗi kətə alkawal laga wa, biku aɗi ata ngkəi giri wa.

²³Ka giri vədzə hangkala giri aka suayeri tə mnya giri an pəla, ka giri wuta abbər giri ku haratə ɗa. Kamnyar giri an hir ka hara alkawal ni ka mnya giri aka MTHLAKU na Hyelər giri.”

²⁴“Ma ga ata təramta akwa fakər anap ar ntəwulər nga, ga ata mzhi səm yar anap ni hang apatə ga ata barari. Amma ga aɗiya vu yari wala pal akwa thlambələr ngə wa.

²⁵Ma ga ku ləkwa fakər ntəwulər nga sakatə mthlir ni tsu ata hyel, ga ata mzhi ɓəltsə kəra mthli ni akwa tsiya ga, amma ga aɗiya thli mthlir ntəwulər ngə ni ka thlahu wa.”