Read bura-pabir Zwarəngkər Shariya 24 Bible Online

Zwarəngkər Shariya 24 - bura-pabir bible

Zwarəngkər Shariya 24

¹“Ma mdə na laga ku kətə mwala, tə tsa ndzi mwalankiɗa, antə aghəla nda tsa wuta abbər mwala ni aɗi kəskərari wa, kamnyar tə tsa ku wutə su laga ɗimi adzə ni. Antə tsa nar kakaɗər ndəka aka mwala ni, ka kədləɓəla ni kazhar kəyirni.

²Aghəla tə mwala ni ku ləɓəla, antə tsa təra kara kəl sal damwa.

³Antə sal na suɗkur ni tsuwa ku nggəlar ni, ka nar kakaɗər ndəka akwa tsiyari, ka kədləɓəla ni kazhar kəyirni, wala ma sal ni an mtə kazhar ni,

⁴to, aɗi kalkal ka salngkiɗa na ntangkəma na nggəlar ni ni jaktə kəl ni aghəla tə mwala ni ku diɓərantə kərni ni wa, kamnyar ngəni an sur cika akəma MTHLAKU. Antə giri aɗiya hara su na ata səntə biku akwa tsəɗi tə MTHLAKU na Hyelər giri akwa hamta ala giri apa kifa ni wa.”

⁵“Ma mdə haɗa kəl mwala, mda aɗiya vu ni ka tsa mwari akwa mpa wa, wala na alari kəthlər laga wa. Mda ata zhar ni ka tsa ndzi avi mnyar məva pal kula hara kəthlər, kamnyar ka tsa nar msərakur aka mwalankiɗa.”

⁶“Ga aɗiya dlu bur ka hangku akəla mda ka gə vəi adzə nga kamnyar ka gə mzhi təpata alari su wa. Wala an hangku shini ma, ga aɗiya hir wa, kamnyar dlu su apani an kalkal ka dlu mpikari.”

⁷“Ma mdə ku ngkəi mdə na akwa həl ɓzərma'ni na mdər Israila, kamnyar ka tsa namtə ni mafa, wala ka tsa ɗələmta ni, ka giri tsi həl ngəni. Apani antə giri ata ngkatə ɗimikur ngəni akwa nca giri.”

⁸“Ka gə hara hangkal ka shilkər kəsəm dza, ka gə hara hangkal, ka gə nutə shanga su tə pristayeri na mjir Lawi ni tsawa ala ga, ka gə hara su shang kalkal apatə I tsawa ala ɗa.

⁹Ka gə ɗangtə su tə MTHLAKU na Hyelər nga hara aka Maryamu ata laku sakatə giri akwa səɓəla akwa Masar.”

¹⁰“Ma ga ku hamta təpa aka ntəwulər nga, ga aɗiya ləvəi aharngkiɗa kamnyar dlu su tə tsa ata na ala ga abbər ka gə kəsi ata vəya təpa ni wa.

¹¹Ka gə səktə ni aɓəla, ka mdə tə gə təpa alari su ni səɓəla ka su tə tsa akwa bara ka gə kəsi ni.

¹²Ma mdə ni aɗi ka su wa, tə su tə tsa amzhi hamta ala ga an ləptər shambar arni, to ga aɗiya hir ka ləptərni ni pi akəla gə wa.

¹³Ka gə ngka alari ka ləptu ni ka mnya tahaku, kamnyar ka tsa mzhi wutə sur pudza ka heni lapiya. Apani tsa ata mzhi kiɗə barka ala ga, tsuwa MTHLAKU na Hyelər giri ata wuta abbər ga ku hara su na kalkalari.”

¹⁴“Ga aɗiya zambatə mdər kəthlər ala gə na mdər bwani ka mdər tur su wa, wala tsa an nvwa nga na mdər Israila, wala an mətəpi na ka ndzi akwa di laga akwa tsəɗiyir giri.

¹⁵Kəlara vir tə tsa ku hara kəthlər ala ga, ka gə ntəmta ni tsu vir nda akəmata pci atəri, kamnyar tsa mdər tur su antə tsa akwa vəkər kari. Ma ga aɗi ntəmta ni akwa sakari wa, tsa ata tuwa tə ga aka MTHLAKU, antə mda ata sə wuta abbər ga an ka biku.”

¹⁶“Mda aɗiya tsi mjir ya kamnyar bikər maɗa' ɗa wa, wala tsi maɗankyar kamnyar bikər mjir yar ɗa wa. Kəlara mda ata mta kamnyar biku tə tsa an hara ka kərari surni.”

¹⁷“Ga aɗiya ndwaləmta su na kalkal tə ka mdə hara aka mətəpi wala muta wa, wala dlu zhaɓər mwala kughung ka kəsi ata vəya təpa wa.

¹⁸Ka gə ɗangta abbər waci giri ku ndzi mafa akwa tsəɗi Masar, antə MTHLAKU na Hyelər giri msərantə giri. An su na hara tə I hamta ala giri tsawu ngəni ni.”

¹⁹“Ma sakatə ga akwa fəi sur fakər nga, antə gə fwari julang laga akwa fakə ni, ga aɗiya jaktə ngka kamnyar kəlari wa. Ka gə zhari aka mji na mətəpi, ka maɗa' na muta, kəga mwanki na kughung, kamnyar ka MTHLAKU na Hyelər giri vədza barka aka shanga su tə ga ata harari.

²⁰Ma sakatə ga ku ɓwi yar nfur zaitun ar nga, ga aɗiya jaktə nu tsiyayerari kamnyar ɗəmi na mbili ata wa. Ka gə zhari aka mji na mətəpi, ka maɗa' na muta, kəga mwanki na kughung.

²¹Ma sakatə ga ku ɗəmi yar anap akwa fakər nga ka pal, ga aɗiya jaktə ngka kamnyar hwilkə su na mbiləmta wa. Ka gə zhari aka mji na mətəpi, ka maɗa' na muta, kəga mwanki na kughung.

²²Ka gə ɗangta abbər waci giri ku ndzi mafa akwa tsəɗi Masar. An su na hara tə I hamta ala giri tsawu ngəni ni.”