Read bura-pabir Zwarəngkər Shariya 25 Bible Online

Zwarəngkər Shariya 25 - bura-pabir bible

Zwarəngkər Shariya 25

¹“Ma beɗi ku thlata akwa daɓwa mji suɗa har tə da ku mwantə ndər ni akwa shariya, antə alkaliyayeri ku thlamta ndər ni ka ncaɓəla abbər mdə na kula biku ni an ka jirkur, ka tsuwa mdə na ka biku ni an kula jirkur.

²Ma mdə wuta abbər kalkal ka mdə ɓu mdə na ka biku ni ka kwandeng, alkali ni ata vu ka mdə ni pəpəi ata di, ka mdə dlaɓu ni ka kwandeng akəmari, ka hangkur mnya purpu ni ndzi kalkal ka mwavərkur biku tə tsa hara ni.

³Mda ata mzhi ɓu ni mnya kwandeng nfwarkumari, amma aɗiya təramta ngəni wa. Kamnyar ma hangkur mnya purpu ni ku təramta ngəni, səliyir mdəkur ar nvwa giri na mdər Israila ni ata mta ata nca giri.

⁴Ga aɗiya hartə mnya thlar tsuhwa akwa sakatə tsa akwa dəka ala gə mthli wa.”

⁵“Ma mdə ka ɓzərma'ni akwa ndzəndzi ata vəi duku, antə dukwa ɗa ku mti kula ɓzər, to, mwalar mshi aɗiya ləɓəla kazhar nca maɗama' mdərkəyirni, ka ra kəl mətəpi wa. Ka ɓzərma' mshi ni ləmbwa adzə ni, ka tsa kəl ni, ka hara alari su tə kalkal ka ɓzərma' mshi hara aka mwalar mshi.

⁶Antə ɓzər sal na ntangkəma tə mwala ni yaɓəla ata ndzi aka ɓzərma'ni na mtə ni, kamnyar ta thləma ɓzərma'ni ni asə sha akwa Israila.

⁷Antə ma ɓzərma' mshi ni aɗi hir kəl mwala ni wa, mwala ni ata mwari akəma mji ol'olər kuta di ni ka pəla ala ɗa, ‘Ɓzərma' salngkəya ku nggəlar ka thləma ɓzərma'ni ləkəma akwa Israila. Tsa aɗi ata hir hara kəthlər ar ɓzərma' sal ali wa.’

⁸Antə mji ol'olər kuta di ni ata kəga ni ka da gari alari. Ma har ba sakani tsa ləkəma ka pəla, ‘I aɗi ata bara kəl ni wa’,

⁹to, ka mwalar mshi ni mwari akəma ɓzərma' mdərkəyirni ni ata nca mji ol'olər kuta di ni, ka tsa ntsuɓəla ɓaɓiyir mdə ni pal, ka tsa tiftə mtili ata kəma mdə ni, ka tsa pəla, ‘Apani antə mda ata hara aka mdə na ku nggəlar vəi dur aka ɓzərma'ni.’

¹⁰Antə mda ata kəga mjir nyarmbwar mdə ngəni akwa Israila abbər, ‘Nyarmbwar mdə tə mdə ntsuɓəla ɓaɓiyirni.’ ”

¹¹“Ma mji shili suɗa akwa mpa, antə mwalar mdə na duku shahədzi abbər ka tsa mbuli salngkiɗa akwa tsiya mdə tə da akwa mpa ni, tə tsa ha tsiyari ka fatə shipəla mdə na duku ni,

¹²to, ka giri nthləmta tsiya mwala ni, mda aɗiya kətadzə ni wa.”

¹³“Ga aɗiya ndzi ka aunar ngkərtə kəgəɓkur su zumzum suɗa akwa thləvur ngə wa, watau na olari ka na rakari wa.

¹⁴Giri aɗiya ndzi ka aunar ngkərtə kəgəɓkur su zumzum suɗa aviyar ngkiri wa, watau na olari ka na rakari wa.

¹⁵Ka gə ndzi ka sur ngkərtə kəgəɓkur na jirari ka na kalkalari, ka auna na jirari ka na kalkalari, kamnyar ka far ngə fəi akwa tsəɗi tə MTHLAKU na Hyelər giri akwa hamta ala giri ni.

¹⁶Kamnyar shanga mji na ana hara jili su nayeri ni, ka shanga mji na ana hara dlərpəkur, ana ndzi sur cika aka MTHLAKU na Hyelər giri.”

¹⁷“Ka giri ɗangtə su tə mjir Amalek hara ala giri ata laku sakatə giri akwa səɓəla akwa Masar.

¹⁸Dangtə giri laku tə da pungkərdzi ata kəra giri sakatə giri ku ghəri, tə duna giri ku kuri. Da kurəmta shanga mjir giri na ku ghəri ka ndzi abwahili kamnyar tə da amzhi mwa kəra wa. Da aɗi ka thlivər Hyel akwa ɗəffa ɗa wa.

¹⁹Kamnyar ngəni ma sakatə MTHLAKU na Hyelər giri ku hamta ala giri tsəɗi ni, tə giri ku ndzi mthlakari, tə shanga dawayeri na kalaktə giri aɗi akwa damitə giri ka mpa kəra wa, to, ka giri tsəgəi shanga mjir Amalek, ka shamta thləmari ata kəra duniya. Giri aɗiya fwari wa!”