Read bura-pabir Zwarəngkər Shariya 26 Bible Online

Zwarəngkər Shariya 26 - bura-pabir bible

Zwarəngkər Shariya 26

¹Antə Musa ləkəma ka gari ni akwa pəla, “Aghəla tə giri ku ləkwa tsəɗi tə MTHLAKU na Hyelər giri akwa hamta ala giri ka tsa ndzi ar giri ni, sakatə giri ku dlutsa, ka ndzəndzi akwa,

²ka giri kətsə yarakəmar shanga sur fakər giri tə giri thləkamta akwa tsəɗi tə MTHLAKU na Hyelər giri akwa hamta ala giri ni. Ka giri pu suayeri ni akwa thlambəl, ka mwanta akwa vəi tə MTHLAKU na Hyelər giri ku carɓəla kamnyar ka mdə vəngkər səli alari ata.

³Ka giri mwari adzə prist na akwa kəthlər ata saka na ndaga, ka waskəi pəla alari, ‘Ashina I akwa bara ncanta aka MTHLAKU na Hyelər nga abbər I ku si akwa tsəɗi natə tsa ku hara alkawalər hamtari aka kəkayeri ar mburu.’ ”

⁴Antə prist ni ata dlu thlambəl ni akəla waskəi ka tsa vəi akəma bagaɗi aka MTHLAKU na Hyelər giri.

⁵Antə giri ata hamta amsa akəma MTHLAKU na Hyelər giri, ka pəla, “ ‘Hwatu kəkar yeru an mdər Aram, na hir kadla ka duna. Tsa ləghəi ahar Masar, ka ndzəndzi anda apa mətəpi ka mji yiɗauwa, anda antə tsa ndzi dur na ol ka duna, dur na ka kuthlikur ka mji hang.

⁶Antə mjir Masar rutəmta yeru, ka hara ala yeru bwani, ka pu yeru akwa kəthlər na mwavər.

⁷Antə yeru ku tuwa aka MTHLAKU, tsa na Hyelər kəkayeri ar yeru, tsuwa MTHLAKU ku nggatə tuwar yeru ka wutə bwani tə yeru akwa sari, ka ghəra tə yeru akwa ka ɗimikur tə da akwa hara ala yeru.

⁸Tsuwa MTHLAKU ku fwaɓəla yeru akwa Masar, ka tsiyari na ka duna antə tsa ku msərantə yeru, ka sur thlivəra na ola, ka seɗayeri na ata ndatə mda, kəga kəthlərayeri ar ndatə mda.

⁹Antə tsa səntə yeru akwa vəi ngəni, ka hamta ala yeru tsəɗi ngəni, tsəɗi na ɓɗaku, na ata ya su.

¹⁰Antə MTHLAKU, kulini I ku səntə yarakəmar sur faku, sur fakəu natə ga an hamta ala yeru.’ ” “Antə giri ata pwi thlambəlayeri ni akəma MTHLAKU na Hyelər giri, ka zuzuri ka vəngkər səli alari.

¹¹Antə giri, kəga mjir Lawi, kəga mətəpiyayeri na akwa nca giri, ata hara kucali kamnyar shanga suayeri na ɓɗakɓɗaku tə MTHLAKU na Hyelər giri, ku hamta ala giri kəga mjir kutakəyir giri.”

¹²“Akwa kəlara məva na makərkur, watau məvar hamta zaka, ka giri hamta zaka ar sur fakər giri aka mjir Lawi, ka mji na mətəpi, ka maɗa' na muta, ka mwanki na kughung, kamnyar ka da səma ka ndli akwa kauyayeri ar giri.

¹³Aghəla nda ka kəlara mda akwa nca giri pəla aka MTHLAKU na Hyelər giri abbər, ‘I ku fwaɓəla zaka natə I pwi ɓɗakkarkara aharngkəya ni, ka hamta aka mjir Lawi, mji na mətəpi, ka maɗa' na muta, ka mwanki na kughung, kalkal apatə ga ku tsawa ali. I aɗi ɓəli wala pal akwa nca tsawayeri ar ngə ni wa, tsuwa I aɗi fwari ata kəra ɗa wa

¹⁴I aɗi səm su wala raka akwa kuta zaka sakatə I akwa tuwa mshi wa. Tsuwa I aɗi tsəkwar su wala raka akwa sakatə I dlimbur wa, wala kəɓəla su laga akwa kutari ka hamta aka mshi wa. MTHLAKU, gə na Hyelərna, I ku kələngkər ala gə ka haratə shanga su tə gə tsawa ali.

¹⁵Akwa vəi ndzəndziyir nga na amtazi ni ka gə haghəi nca ga akwa duniya, ka gə vədzə barka aka mjir nga Israila, ka aka tsəɗi tə gə hamta ala yeru ni, apatə ga ku kahyel ar hamtari aka kəkayeri ar yeru ni, tsəɗi na ɓɗaku ka na ata ya su ni.’ ”

¹⁶“Ashina MTHLAKU na Hyelər giri akwa tsawa ala giri abbər ka giri ɓəlatə shanga tsawayeri ka suayeri tə mdə thlamta abbər ka mdə hara. Antə ka giri vədzə hangkala giri akari, ka giri nu tsawayeri ni kalkal ka ɗəffa giri shang, ka mpika giri shang.

¹⁷Ashina giri ku pəla ka mnya giri abbər MTHLAKU an Hyelər giri, ka tsuwa abbər giri ata mwa akwa lakurni, ka ɓəlatə tsawayeri arni, ka suayeri tə mdə thlamta abbər ka mdə hara, ka giri kələngkər aka su tə tsa pəla.

¹⁸Tsuwa ashina MTHLAKU ku pəla ka mnyari abbər giri an mjirni na ka daraja ta shang, apatə tsa ku hara alkawalari ala giri, antə ka giri ɓəlatə shanga tsawayeri arni.

¹⁹Tsuwa MTHLAKU ku pəla ka mnyari abbər tsa ata haptə səliyir giri ta shanga durayeri tə tsa alakta. Tsa ata hara ka mji fwal giri, ka thləma giri tuwa, ka giri ndzi ka səli, ka giri ndzi mji na ɓɗakkarkara aka MTHLAKU na Hyelər giri, apatə tsa ku hara alkawalari.”