Read bura-pabir Zwarəngkər Shariya 27 Bible Online

Zwarəngkər Shariya 27 - bura-pabir bible

Zwarəngkər Shariya 27

¹Antə Musa ka mji ol'olər Israila ku tsawa aka mji abbər, “Ka giri ɓəlatə shanga tsawayeri tə I akwa hamta ala giri ashina.

²Ma vir tə giri ku fəlɓəla Thlyagha Jodan, ka ləkwa tsəɗi tə MTHLAKU na Hyelər giri akwa hamta ala giri, ka giri nci pelayeri na ol'ola, ka giri fəi dza ɗa ka həi mwapu.

³Ata da antə giri ata rubwamta shanga tsawayeri ngəni. Ma sakatə giri ku fəlɓəla, ka ləkwa tsəɗi natə MTHLAKU na Hyelər giri akwa hamta ala giri, tsəɗi na ɓɗaku, na ata ya su, apatə MTHLAKU na Hyelər kəkayeri ar giri ku hara ala giri alkawalari,

⁴sakatə giri ku fəlɓəla Thlyagha Jodan ni, ka giri nci pelayeri ngəni tə I akwa tsawa ala giri ashina ni ata kəra Gar Ebal. Tsuwa ka giri fəi dza ɗa ka həi mwapu.

⁵Tsuwa ka giri həntə bagaɗi aka MTHLAKU na Hyelər giri ka pelayeri tə mda aɗi tsəkwar dza ɗa ka liya wa.

⁶Giri ata həntə bagaɗi aka MTHLAKU na Hyelər giri ka pela natə mda aɗi marəmta wa, ka giri hamta saɗaka mbamba ata aka MTHLAKU na Hyelər giri.

⁷Tsuwa anda antə giri ata hamta saɗakar jakə mwardzi, ka giri səm susəma ka hara kucali akəma MTHLAKU na Hyelər giri.

⁸Ata pela natə giri fəi dzari ka həi mwapu ni, antə giri ata rubwamta shanga tsawayeri ni, tsuwa ka rəbutə ni ləɓəla ata bəbal.”

⁹Antə Musa ka mjir Lawi na pristayeri pəla aka mjir Israila abbər, “Psi gir thləma giri, mjir Israila! Ashina giri ku ndzi mjir MTHLAKU na Hyelər giri.

¹⁰Antə ka giri kələngkər aka MTHLAKU na Hyelər giri, ka giri ɓəlatə shanga tsawayeri arni tə I akwa hamta ala giri ashina ni.”

¹¹Antə Musa tsawa aka mjir Israila tsu vir nda abbər,

¹²“Ma sakatə giri ku fəlɓəla Thlyagha Jodan, ka mjir nyarmbwayeri ngəni thləthlata ata Gar Gerizim akwa sakatə mda akwa psəmnya barkayeri aka mji, watau mjir nyarmbwar Simeyon, ka ar Lawi, ka ar Yahuda, ka ar Issakar, ka ar Yusuf, ka ar Benjamin.

¹³Tsuwa ka mjir nyarmbwar Ruben, ka ar Gad, ka ar Asher, ka ar Zebulun, ka ar Dan, ka tsuwa ar Naftali, thləthlata ata Gar Ebal, akwa sakatə mda akwa psəmnya shuwumtadzi aka mji ni.

¹⁴Antə mjir Lawi ata haptə kuraku ka da pəla aka mjir Israila abbər,

¹⁵“ ‘Ka Hyel shuwumta kəlara mdə na ku martə haptu ka udzəm, wala fatəɓəla haptu ka liya ɓɗaku laga, ka ɗuwar ni akwa vəi laga ɗiɗi. Kamnyar ngəni an sur cika aka MTHLAKU.’ ” “Antə shanga mji ata pela, ‘Amin!’ ”

¹⁶“ ‘Ka Hyel shuwumta kəlara mdə na ku rutə baba'ni, wala mama'ni.’ ” “Antə shang mji ata pəla, ‘Amin!’ ”

¹⁷“ ‘Ka Hyel shuwumta kəlara mdə na ku tərar pelar kəla ɗa ka ntəwulərni.’ ” “Antə shanga mji ata pəla, ‘Amin!’ ”

¹⁸“ ‘Ka Hyel shuwumta kəlara mdə na ku shamta mdə na mdlyang akwa laku.’ ” “Antə shanga mji ata pəla, ‘Amin!’ ”

¹⁹“ ‘Ka Hyel shuwumta kəlara mdə na ku ndwaləmta jirkur ar mətəpi, wala ar mdə na muta, wala mwala na kughung.’ ” “Antə shanga mji ata pəla, ‘Amin!’ ”

²⁰“ ‘Ka Hyel shuwumta kəlara mdə na ku tsi səliyir baba'ni, atar pi ka kəlara pal akwa nca mwankirni.’ ” “Antə shanga mji ata pəla, ‘Amin!’ ”

²¹“ ‘Ka Hyel shuwumta kəlara mdə na ku pi ka mwaɓi.’ ” “Antə shanga mji ata pəla, ‘Amin!’ ”

²²“ ‘Ka Hyel shuwumta kəlara mdə na ku pi ka ngkwarma'ni, wala ngkwa'da'ni.’ ” “Antə shanga mji ata pəla, ‘Amin!’ ”

²³“ ‘Ka Hyel shuwumta kəlara mdə na ku pi ka mama' mwalankiɗa.’ ” “Antə shanga mji ata pəla, ‘Amin!’ ”

²⁴“ ‘Ka Hyel shuwumta kəlara mdə na ku tsi ntəwulərni akwa ɗuwari.’ ” “Antə shanga mji ata pəla, ‘Amin!’ ”

²⁵“ ‘Ka Hyel shuwumta kəlara mdə na ku dlu kwabar dzəɓ mnya kamnyar ka tsa tsi mdə na kula biku.’ ” “Antə shanga mji ata pəla, ‘Amin!’ ”

²⁶“ ‘Ka Hyel shuwumta kəlara mdə na aɗi dlu tsawayeri ni ka ɓəlatə ɗa wa.’ ” “Antə shanga mji ata pəla, ‘Amin!’ ”