Read bura-pabir Zwarəngkər Shariya 28 Bible Online

Zwarəngkər Shariya 28 - bura-pabir bible

Zwarəngkər Shariya 28

¹Antə Musa ku ləkəma ka gari ni akwa pəla abbər, “Ma giri ku kələngkər aka shanga su tə MTHLAKU na Hyelər giri ku pəla ala giri, ka ɓəlatə shanga tsawayeri arni tə I akwa hamta ala giri ashina, to, MTHLAKU na Hyelər giri ata haptə səliyir giri ta shanga durayeri na akwa duniya.

²Tsuwa shanga barkayeri ngəni ata si ata kəra giri, ma giri ku kələngkər aka shanga su tə MTHLAKU na Hyelər giri pəla.”

³“Giri ata ndzi mji na ka barka akwa kuta di, ka tsuwa akwa fakayeri ar giri.

⁴Maɗankyar tə giri ata yaɓəlari ata ndzi maɗa' na ka barka, apani tsuwa sur fakayeri ar giri, kəga maɗa' mwaɓiyayeri ar giri, watau maɗa' thlar giri, kəga maɗa' təmar giri kəga kwiyir giri ata yatədzi hang.

⁵Thlambəlayeri ar giri ata nghyi ka barka ar sur faku, ka kugwa ɗəvər giri nghyi ka susəma.

⁶Giri ata ndzi ka barka sakatə giri ku ləkwa, ka ndzi ka barka sakatə giri ku səɓəla.”

⁷“MTHLAKU ata hara ka giri nggyari dawayeri ar giri na ku thlata abbər da ata dlər giri. Da ata si ata kəra giri akwa laku duku, amma da ata titiləmtadzi akəma giri ka hwi akwa laku zumzum murfa.”

⁸“MTHLAKU ata vədzə barka aka shanga su na akwa biyayeri ar giri, ka aka kəlara su tə giri ku tsəkwar ka tsiya giri. MTHLAKU na Hyelər giri ata vədza ala giri barka akwa tsəɗi tə tsa ata hamta ala giri ni.”

⁹“MTHLAKU ata namtə giri ka giri ndzi mji na ɓɗakkarkara tə tsa carɓəla aka kərari surni, apatə tsa ku hara alkawalari ala giri, ma giri ku ɓəlatə tsawayeri ar MTHLAKU na Hyelər giri, ka nu shanga su tə tsa pəla.

¹⁰Apani antə shanga mjir duniya ata wuta abbər giri an mjir MTHLAKU, antə da ata thlivər giri.

¹¹Antə MTHLAKU ata na ala giri su na ɓɗakɓɗaku hang akwa tsəɗi tə tsa hara alkawalər hamtari aka kəkayeri ar giri ni. Tsa ata na giri maɗankyar, ka vu ka thlar giri yatədzi hang, ka hara ka giri wutə sur fakəu hang.

¹²MTHLAKU ata kəlar mbwar pwi barkayeri amtazi ka tsa hamta ala giri yimi kalkal akwa sakari, ka vədzə barka aka shanga kəthlər ar giri. Giri ata hamta təpa aka mjir tsəɗiyayeri zumzum hang, amma giri aɗi ata bara təpa akəla mji wa.

¹³MTHLAKU ata hara ka giri an ndzi ola ata kəra su, aɗi ka mji an ndzi ola ata kəra giri wa. Tədəku giri ata ndzi mji na akwa ləkəma, giri aɗi ata təri akwa su wa, ma giri ku ɓəlatə tsawayeri ar MTHLAKU na Hyelər giri, natə I akwa hamta ala giri ashina, ma giri ku nu ɗa ka hangkal ka haratə ɗa,

¹⁴ma giri aɗi pəra abwa mazəm wala abwa matsəkar, ka nu haptayeri akwa vəngkər səli ala ɗa wa.”

¹⁵“Amma ma giri aɗi kələngkər aka MTHLAKU na Hyelər giri wa, wala vədzə hangkala giri ka ɓəlatə shanga tsawayeri kəga suayeri tə tsa thlamta abbər ka mdə hara, natə I akwa hamta ala giri ashina ni wa, to, shanga asarayeri ngəni ata si ata kəra giri, ka mula ala giri.”

¹⁶“Giri ata ndzi kula barka akwa kuta di ka akwa fakayeri ar giri.

¹⁷Thlambəlayeri ar mthlir giri kəga kugwa ɗəvər giri ata ndzi kula barka.

¹⁸Maɗa' natə giri yaɓəla ata ndzi kula barka, tsuwa sur fakayeri ar giri, kəga thlar giri, kəga təmar giri, kəga kwiyir giri shang, ata ndzi kula barka.

¹⁹Giri ata ndzi kula barka sakatə giri ku ləkwa, ka ndzi kula barka sakatə giri ku səɓəla.”

²⁰“MTHLAKU ata thlenta ala giri asarayeri, ka ndəndatə hangkala giri, ka hara ka giri ndzi ka ɗəffə ɓzəɓza akwa shanga su tə giri akwa harari, har tar ma giri ku higəlantədzi ka kurəmtadzi kula shamta saka, kamnyar ɗimikur tə giri hara atar nggəlar ni ni.

²¹MTHLAKU ata vu ka shilku na ɗimi bartə giri har ka tsa kurəmta giri shang kazhar tsəɗi tə giri akwa ləkwari ka ndzi mthlakari ni.

²²MTHLAKU ata tsa giri ka shilkər fufu na ata thlarəmta dza giri, ka dzəkdzəku, ka shilkər kəthla, ka mbəlku, ka mtathla, ka pci na ghaɗaku, ka ulta, ka dəmən ka mbawa. Antə asarayeri ngəni ata ləkəma ka na giri bwani har tar ma giri ku kurəmtadzi.

²³Vəi na amtazi ata ndzi apa sur hartə kəra mbwa tə mdə nam ka əmza, kamnyar ngkatə yimi, antə di ata ula ka ndzi ɓəɓal apa liya mənggəl.

²⁴MTHLAKU ata namtə yimərhyel na ana pungkərdzi ata kəra fakayeri ar giri ni ka tsa ndzi bərbər. Antə bərbər ata thlata amtazi ka səghəi ata giri, ka kurəmta giri.”

²⁵“MTHLAKU ata hara ka dawar giri nggyari giri. Giri ata ləɓəla akwa laku duku kamnyar pwa ata kəra ɗa ka mpa, amma giri ata titiləmtadzi akəma ɗa ka hwi akwa laku zumzum murfa. Antə asar na wutə giri ni ata ndzi sur nthlə hyel aka shanga mji na ku wutə giri.

²⁶Antə mshiyir giri ata ndzi susəma aka shanga ɗikayeri kəga mwaɓi mtaku, har mda aɗi ata wutə mdə na ata kədləmta ɗa wa.

²⁷MTHLAKU ata hara ka jili kuɗu na wutə mjir Masar ni, kəga haju, kəga ɓəɓa na akurkur wa shang hartə dza giri.

²⁸MTHLAKU ata tsa giri ka shilkər cicukur, ka ar mdlyangkur, ka ndəndatə hangkala giri.

²⁹Tsuwa wala ata kərathlər pci giri ata tətəm su tsu apatə mdlyang ana tətəm su akwa kuthlu. Su aɗi wala duku tə giri ata harari, amma ka suari ləkəma wa. Tədəku mji ata hara ala giri bwani, ka da thla giri ka dlutsə sur giri, tsuwa mda aɗi na ata hir dlar giri wa.”

³⁰“Giri ata mbwangkər ngyika ata kəra ɓzərngkwa, amma mdə damwa zum an ata sə pi ka tsa. Giri ata latə kəi, amma giri aɗi ata ɗar ndzi akwa wala raka wa. Giri ata ncimta fakər anap, amma giri aɗi ata ɗar nggatə msərakurari wa.

³¹Mda ata sə tsi thlar giri ata nca giri, amma giri aɗi ata ɗar kumari wa. Mda ata dlutsə kwarar giri ata nca giri, tsuwa tsa aɗi ata jaktə ngka ala giri wa. Mda ata hamta təmar giri aka dawayeri ar giri, tsuwa mda aɗi na ata dlar giri wa.

³²Mda ata fatə maɗa' giri shili ka mwanki ata nca giri, ka mwantə ɗa akwa mafakur akwa tsəɗi damwa. Tədəku giri ata bara ka giri wutə ɗa, amma shang gapani, kamnyar giri aɗi ka dunar hara su ata kər wa.

³³Mji tə giri asəndə ɗa wa an ata sə səməmnya sur fakər giri, ka shanga su tə giri ku ghəra akwa tsuhwari. Su aɗi tə giri ata wutari wa, tar bwani ka mafakur tədəku.

³⁴Antə suayeri tə nca giri ata wutari ata vu har ka giri hara cicu.

³⁵MTHLAKU ata hara ka kuɗayeri na mwavər mwavər səɓəla ata ɓunja giri kəga nggilanga giri, kuɗayeri na akurkur wa, kuɗu na ata hartə dza giri baɗita ata səla giri har kəra giri.”

³⁶“MTHLAKU ata fatə giri kəga kuthlir giri tə giri ka kəra giri an carɓəla, ka mwantə giri shang akwa tsəɗi mji laga natə giri kəga kəkayeri ar giri aɗi səndə wa. Antə anda giri ata vəngkər səli aka haptayeri ar udzəm ka pela.

³⁷Antə hyala mji ata nthlə ɗa ata kəra su na wutə giri. Antə giri ata ndzi sur ruta, ka sur kumshi akwa nca mjir tsəɗiyayeri tə MTHLAKU ata mwantə giri akwa ni.”

³⁸“Giri ata thləkamta hwulfa hang akwa fakayeri ar giri, amma giri ata thli su raka, kamnyar ntsəkwa ata sə ɓɗəmnyari.

³⁹Giri ata ncimta fakər anap ka wulwul ɗa, amma giri aɗi ata ɗar sa yimari wa, wala tsaptə yari wa, kamnyar kulamnya ata ɓɗəmnya ɗa.

⁴⁰Giri ata ndzi ka nfur zaitun akwa kəlara bwa akwa tsəɗiyir giri, amma giri aɗi ata wutə malari ka kəthlər kəgari wa, kamnyar yar zaitun ni ata ɓumta akəmata da angha.

⁴¹Giri ata yaɓəla maɗashili kəga maɗankwi, amma giri ata ni ka da, kamnyar mda ata sə fatə ɗa apa mafayeri ka mwantə ɗa akwa tsəɗi damwa.

⁴²Shanga nfwayeri ar giri kəga sur fakər giri, ntsəkwayeri ata sə ɓɗəmnyari.”

⁴³“Mətəpiyayeri na akwa nca giri ata sə ləkəma ka ndzi akəma giri tədəku, antə ar giri, giri ata ləkəma ka ngka ka bwahili.

⁴⁴Mətəpiyayeri an ata sə hamta təpa ala giri, amma ar giri, giri aɗi ata mzhi wutə su tə giri ata təpata ala ɗa wa. Da an ata ndzi ata kəra giri, antə giri ata ndzi akira ɗa.

⁴⁵Shanga asarayeri ngəni ata sə ata kəra giri, ka nu giri, har tar ma shanga giri ku kuri. Suayeri ngəni ata wutə giri kamnyar tə giri aɗi kələngkər aka MTHLAKU na Hyelər giri wa, tsuwa giri aɗi ɓəlatə tsawayeri arni kəga su tə tsa thlamta abbər ka mdə hara wa.

⁴⁶Da ata ndzi ata kəra giri apa seɗa ka surndata kamnyar tsaktə giri kəga kəkayeri ar giri ba saka madi.

⁴⁷Kamnyar giri aɗi hir vəngkər səli aka MTHLAKU na Hyelər giri ka kucali ka ɗəffu mwapu ata kəra hangkur shanga su tə tsa na giri wa.

⁴⁸Antə apani giri ata hara mafakur aka dawayeri natə MTHLAKU ata thlenta ata kəra giri. Giri ata hara mafakur ala ɗa ka mi ka thləli, ka akwa durakur ka tura ar shanga su. Tsa ata vu ka da hara ala giri bwani har tar ma giri ku kurəmtadzi karkar.

⁴⁹MTHLAKU ata səntə dur laga ata kəra giri, dur na thlatə ciju akwa datər duniya, dur na ata səghəi ata kəra giri ka ɓəɓatəkur apa duku, mji tə giri aɗi səndə mnyar ɗa wa.

⁵⁰Da ata ndzi mji na mwavər, mji na aɗi ana wutə olkur mdə wa, wala kətadzə maɗankyar wa.

⁵¹Antə da ata ɓɗəmnya mwaɓiyayeri ar giri, ka kwasəmnya sur fakər giri, har tar ma giri ku kurəmtadzi karkar. Da aɗi ata zhar ala giri mthli, wala yimər anap, wala mal zaitun, wala kənayeri, wala mbəkəl təmayeri ar giri wa, har tar ma mi ku kurəmta giri.

⁵²Da ata kalaktə giri ka mpa akwa kauyayeri ar giri, har tar ma shanga məciɓər giri na nal nal tə giri ana vəkər kari ni, ku ndlagamtadzi akwa shanga tsəɗi tə MTHLAKU na Hyelər giri akwa hamta ala giri.”

⁵³“Ma sakatə dawayeri ku kalaktə kauyayeri ar giri ka mpa, ka hara ala giri bwani kəri kəri, to, har giri ata sə ɓɗə kumər dza maɗa' giri natə giri an ya. Jiri, kamnyar mi na ata sə wutə giri, giri ata sə ɓɗə kumər dza maɗashilər giri kəga maɗankwiyir giri, natə MTHLAKU na Hyelər giri an hamta ala giri.

⁵⁴Wala mdə na ka dzari ngyingyaɓu ta shang akwa nca giri, mdə na aɗi ana hir ka su damitə dzari wa, tsa ata sə huni susəmərni aka ɓzərma'ni, ka aka mwalankiɗa, har ba aka maɗa'ni na mbiləmta.

⁵⁵Tsa aɗi ata na ala ɗa kumər dza maɗa'ni natə tsa akwa ɓɗari ni wa, kamnyar an kura susəma tə tsa kəgari akwa saka ngəni tə dawayeri ku kalaktə diyir giri ni.

⁵⁶Mwala na ka dzari ngyingyaɓu ta shang akwa nca giri, na aɗi ana hir ka su damitə dzari wa, mwala na ngyingyaɓu ka duna tə tsa aɗi ana hir ka tsa ntsari di ka kuta səlari wa, tsa ata sə huni susəmərni aka salngkiɗa tə tsa hirhira, ka aka ɓzərni, ka ngkwarni.

⁵⁷Har wala mthlaku na səɓəla təkəma aghəla ɓzər tə tsa yaɓəla ni, tsa ata ɗuwamtadzi ka ɓɗəmnya ɗa kamnyar susəma aɗi tə tsa aɗari wa. Ngəni an kamnyar mwavərkur bwani tə dawayeri na kalaktə diyir giri ka mpa ni akwa hara ala giri.”

⁵⁸“Ma giri aɗi vədzə hangkala giri ka nu shanga tsawayeri na akwa kakaɗə ni, ka thlivər thləm na ka səli ka na ana ndatə mda, watau thləma MTHLAKU na Hyelər giri ni wa,

⁵⁹to, MTHLAKU ata thlentə shilku na mwavər ata kəra giri, kəga kəkayeri ar giri, ka bwaniyayeri na mwavər ka duna, na akurkur wa, kəga shilku na mwavər na aɗi ata hir kur wa.

⁶⁰Tsa ata pungkər ala giri shanga shilkayeri ar Masar, shilkayeri natə giri akwa thlivərari ni, antə da ata bartə giri.

⁶¹Tsuwa MTHLAKU ata thlentə shanga jili shilku na aɗi ata kəra giri, har kəga jili bwaniyayeri natə mda aɗi kamnya thləma ɗa akwa kakaɗər tsawu ngəni wa, har tar ma giri ku kurəmtadzi karkar.

⁶²Wala tə waci giri ku hara hang apa sasəlka na amtazi, giri ata sə mbil yiɗauwa daci, kamnyar giri aɗi kələngkər aka MTHLAKU na Hyelər giri wa.

⁶³Apatə MTHLAKU ku nggatə msərakur hara ala giri ɓɗakkur, ka hara tə giri ku yatədzi hang, apani tsuwa antə tsa ata nggatə msərakurər hilantə giri ka kurəmta giri. Tsuwa mda ata ntsumta giri akwa tsəɗi tə giri akwa ləkwari ka ndzi mthlakari ni.”

⁶⁴“MTHLAKU ata titiləmta giri akwa nca shanga tsəɗiyayeri na akwa duniya, baɗita ata kəl na abwani har ka vədza aka datari na abwanda. Anda antə giri ata vəngkər səli aka haptayeri tə mdə nam ka udzəm, kəga na ka pela, haptayeri natə wala giri, wala kəkayeri ar giri aɗi səndə ɗa wa.

⁶⁵Antə akwa nca tsəɗiyayeri ndaga, giri aɗi ata wutə su kasəla wa, har ma vəi tə giri ata mzhi vəi səla giri ka ghərɓəlaghəra aɗi wa. Tsuwa MTHLAKU ata na giri ɗəffər damitədzi, ka nca na ku ghəri akwa wul su, ka ɗəffu na kula hamta jiri.

⁶⁶Tədəku giri ata ndzi akwa damitədzi, ka ndzi akwa thlivəri pci ka viri, parang saka giri akwa dzamər mta.

⁶⁷Ma ɗəɗəpa giri ata pəla, ‘Apa ka namtə ka ngəni ndzi tahaku!’ Ma tahaku ku hara tsuwa giri ata pəla, ‘Apa ka namtə ka ngəni ndzi ɗəɗəpa!’ Giri ata pəlari apani kamnyar ɗimikur thlivər tə giri akwa, ka jili suayeri tə nca giri akwa wutari.

⁶⁸MTHLAKU ata ngka ka giri ahar Masar akwa sharər yimi, ata laku tə tsa pəla abbər giri aɗi ata jaktə nuwari kəra wa ni. Anda giri ata sə bara ɗələmta kər giri shili ka mwanki akwa mafakur aka dawayeri ar giri, amma mda aɗi na ata hir masə giri wa.”