Read bura-pabir Zwarəngkər Shariya 29 Bible Online

Zwarəngkər Shariya 29 - bura-pabir bible

Zwarəngkər Shariya 29

¹Nayeri ni an ndərayeri ar alkawal tə MTHLAKU tsawa aka Musa ka tsa pəla aka mjir Israila akwa tsəɗi Mowab, aghəla alkawal tə tsa hara ka da ata Gar Horeb.

²Antə Musa ku kəga shanga mjir Israila ka pəla ala ɗa, “Giri ku wutə ka nca giri su tə MTHLAKU hara akwa tsəɗi Masar, su tə tsa hara aka kuthlir Masar ka aka kwakunayeri arni, ka aka shanga tsəɗiyirni.

³Nca giri ku wutə bwaniyayeri na ol'ola, kəga seɗayeri ar ndatə mda, kəga surndatayeri na ol'ola.

⁴Amma har ba ashina MTHLAKU aɗi na giri kər ar nggaɓəla su, wala ncar wulɓəla su, wala thləmər nggatə su wa.

⁵Hyel pəla, ‘I ku pwar giri akwa mtaku məva pal pal nfwarkumari, amma ləpter giri wala ɓaɓiyir giri aɗi hal wa.

⁶Giri aɗi kwasə buradi, wala sa yimər anap, wala sur sa na mwavərari wa, amma I ku na ala giri susəma laga na təramta ɗa, tsu nggwa ka giri sənda abbər I an MTHLAKU na Hyelər giri.’ ”

⁷“Saka tə mburu ku mzhitə vəi ngəni, antə Sihon na kuthlir Heshbon ka Og na kuthlir Bashan ku səɓəla ka da dlər mburu. Amma mburu ku nggyari ɗa.

⁸Mburu ku dlutsə tsəɗiyir ɗa ka hamta apa sur kifa aka mjir nyarmbwar Ruben, ka ar Gad, ka retar mjir nyarmbwar Manasse.

⁹Antə apani ka giri nu su ka hangkal, ka giri ɓəlatə su tə mdə mbwi akwa alkawal ni, kamnyar ka giri wutə jaka akwa shanga su tə giri ata harari.”

¹⁰“Ashina, nggədza giri shang athləthlata akəma MTHLAKU na Hyelər giri, mji ol'olər nyarmbwayeri ar giri, kəga kwakunayeri, kəga mji ol'ola, kəga mji na ata kəra kəthlər, ka shanga mji shilər Israila,

¹¹mwanki kəga maɗankyar, ka mətəpiyayeri na akwa nca giri, na akwa nta udzəm ka kəi yimi ala giri.

¹²Ashina giri azi kamnyar ka giri mbwi alkawal ka MTHLAKU na Hyelər giri, alkawal natə MTHLAKU na Hyelər giri ata harari akwa daɓwa giri ka tsa, natə mda ata kahyel akwa.

¹³Kamnyar ashina MTHLAKU akwa bara ka tsa ncanta abbər giri ku ndzi mjirni, tsuwa tsa ku ndzi Hyelər giri, apatə tsa ku hara alkawalari ala giri, ka apatə tsa ku hara alkawalari aka kəkayeri ar giri, watau Ibrahim, ka Ishaku, ka Yakub.

¹⁴Aɗi ka giri shi giri antə MTHLAKU akwa hara alkawal ngəni na ka kahyel akwa ni wa,

¹⁵amma har kəga kəkayeri ar giri na aɗi azi adzə mburu ashina wa.”

¹⁶“Giri ka kər giri ku səndə laku tə mburu ndzi akwa tsəɗi Masar, ka laku tə mburu təramta akwa tsəɗiyayeri damwa.

¹⁷Giri ku wutə suayeri arɗa na sur cika, kəga haptayeri arɗa na ɗimi ɗimi tə mdə nam ka udzəm, ka na ka pela, ka na ka adzərfa, ka tsuwa na ka dinar, akwa nca ɗa.

¹⁸Ka giri wuta abbər mda aɗi akwa nca giri, wala mdə sal wala mdə mwala, wala kutakəi wala nyarmbwa laga akwa nca giri ashina, natə ɗəffari ata shinardzi kazhar MTHLAKU na Hyelər mburu, ka ra vəngkər səli aka haptayeri ar durayeri ndaga wa. Giri aɗiya hir ka mdə wutə mdə laga akwa nca giri na ata ndzi apa nggilanga nfwa na ana hamta yarni ka gwar ɗəɗahu wa.

¹⁹Ma mdə na ku nggatə ndərayeri na ar alkawal ngəni, ka kəta abbər mdə ku kurtə ka vədza alari barka, antə su aɗi na ata wutə ni kəra wa, tə tsa ləkwa dzama akwa ɗəffari abbər, ‘Wala I an ləkəma akwa hara su tə ɗəffi hira, su aɗi na ata wutə ra wa’, to, su ngəni ata sənta asar ata kəra shanga giri, mji na pwa ka mji na ɗimi shang ata kəma duku.

²⁰MTHLAKU aɗi ata yafitə jili mdə ngəni wa. Ata vəya ngəni, ɗəffə bwarbwarkur na mwavər ar MTHLAKU an ata si ata kərari. Antə shanga asarayeri tə mdə kamnya thləma ɗa akwa kakaɗə ngəni ni ata si ata kərari, tsuwa MTHLAKU ata shamta thləmari ata kəra duniya.

²¹MTHLAKU ata kəɓəla mdə ngəni ni kazhar nyarmbwayeri ar Israila, ka pungkər alari shanga asarayeri tə mdə rubwamta thləma ɗa akwa Kakaɗər Tsawu ngəni ni.”

²²“Akwa zaman na ata sə si, kəkayeri ar giri kəga mətəpiyayeri na ata sə thlata akwa tsəɗiyayeri na ciju, ata sə wutə laku tə tsəɗi ni hila akwa, ka bwaniyayeri tə MTHLAKU hara aka tsəɗiyir giri ni.

²³Shanga tsəɗi ni ata mbamtadzi ka u'u mwapu na ana shiwura, ka una. Antə su aɗi tə mda amzhi thləkari ata wa, tsuwa su aɗi na amzhi ptsa ata wa, wala kusar aptsa anda wa. Tsəɗi ni ata ndzi tsu apa Sodom ka Gomora, ka Adma ka Zeboyim, natə MTHLAKU shamta ɗa sakatə ɗəffari ku ɓzi ka duna ni.

²⁴Jiri, shanga mjir duniya ata ndatədzi ka pəla, ‘Man hara tə MTHLAKU hara su apani aka tsəɗi ngəni ri? Man hara tə tsa ncantə ɗəffə bwarbwarkur apani nə ri?’

²⁵Antə mda ata pəla ala ɗa abbər, ‘Ai kamnyar tə da ɓəli alkawalər MTHLAKU na Hyelər kəkayeri arɗa, alkawal tə tsa hara ka da sakatə tsa fwaɓəla ɗa akwa tsəɗi Masar.

²⁶Da təra, ka ra hara mafakur aka haptayeri, ka vəngkər səli ala ɗa, haptayeri natə da ka kəra ɗa aɗi səndə ɗa wa, tsuwa aɗi tsa an vəi ɗa wa.

²⁷Kamnyar ngəni antə ɗəffa MTHLAKU ku ɓzi ka duna ata kəra tsəɗi ngəni, tə tsa ləkwa sənta alari shanga asarayeri tə mdə rəbuta akwa kakaɗə ngəni ni.

²⁸Apani sakatə ɗəffa MTHLAKU ku ɓzi ka duna, antə tsa ntsumta ɗa akwa tsəɗiyir ɗa kamnyar bwarbwarkur ɗəffari na akwa mba ni, ka titiləmta ɗa akwa tsəɗi damwa, apatə da aɗi ashina.’

²⁹Suayeri na ar ashir an ar MTHLAKU na Hyelər mburu, amma suayeri tə mdə ku kəlari ata bəbal an ar mburu, kəga kəkayeri ar mburu ba saka madi, kamnyar ka mburu ɓəlatə shanga tsawayeri ni.”