Read bura-pabir Zwarəngkər Shariya 3 Bible Online

Zwarəngkər Shariya 3 - bura-pabir bible

Zwarəngkər Shariya 3

¹Sakatə mburu ku shinardzi ka ndləɓəla ahar Bashan, antə Og na kuthlir Bashan ka mjirni shang ku səɓəla kamnyar dlər mburu ahar Edrai.

²Amma MTHLAKU pəla ali, “Ga aɗiya thlivər ɗa wa, kamnyar I ku kurtə ka hamta ni, kəga mjirni, kəga tsəɗiyirni shang akwa tsiya giri. Ka giri hara alari su tə giri hara aka Kuthli Sihon na kuthlir mjir Amor na hara kuthlikur ahar Heshbon.”

³Apani antə MTHLAKU na Hyelər mburu ku hamta Kuthli Og ka shanga mjirni akwa tsiya mburu. Antə mburu ku tsəgəi ɗa har tə wala mdə duku aɗi na mbila akwa nca ɗa ka mpikə wa.

⁴Antə mburu ku dlutsə shanga kauyayeri na arni akwa saka nda. Di aɗi na mbila akwa katangga ni wala duku na kula mburu dlutsə wa. Antə hangkur shanga kauyayeri tə mburu səma akwa mpa ni an ngkwakumari, watau shanga bwar Argob, ka shanga bwar kuthlikur ar Og na akwa Bashan.

⁵Shanga bərniyayeri ngəni an bərniyayeri na akwa katangga na nal nal, ka nyarfayerari ol'ola, tsuwa udzəm dzəka nyarfayeri ni mdə nam ka liya. Ata kəra kauyayeri ngəni tsuwa, kauyayeri aɗi na raka raka hang na kula katangga.

⁶Antə mburu ku ɓdləmta di swakti, tsu apatə mburu hara aka Kuthli Sihon ahar Heshbon. Mburu ku ɓdləmta shanga kauyayeri ka kurəmta shili, kəga mwanki, kəga maɗankyar shang.

⁷Amma mburu ku fatə shanga mwaɓiyayeri, ka shanga suayeri tə mburu dlutsa akwa kauyayeri ni aka kəra mburu.

⁸Ata saka na ndaga mburu ku dlutsə tsəɗiyayeri na akwa tsiya kuthlyayeri ngəni suɗa na ar mjir Amor ni, watau tsəɗi na abwar raghəi ka Thlyagha Jodan ni, baɗita adzə Thlyagha Arnon ka mwanta adzə Gar Hermon.

⁹Mjir Sidon ana kəga Gar Hermon abbər Siriyon, mjir Amor tsuwa ana kəga thləmari abbər Senir.

¹⁰Mburu ku səm shanga kauyayeri na təbwar garayeri ka mpa, ka shanga Gileyad, ka shanga Bashan, har ka tsadza aka Saleka ka Edrai, na akwa tsəɗi kuthlikur ar Og na akwa Bashan.

¹¹Kuthli Og ar Bashan shini an mbila akwa nca mjir nyarmbwar gurjamayeri na mjir Refa ni. Mdə nam akwati harər Kuthli Og ka pela laga ɓɗaku tə mdə marɓəla. Saɓəlkurər akwati harərni an dzar kərathlu suɗa, ka baukurari kərathlu pal. Har ba kulini akwati ni tsu anda akwa bərni Rabba akwa tsəɗiyir mjir Amor.

¹²Antə Musa ləkəma ka pəla aka mjir Israila abbər, “Saka tə yeru dlutsə tsəɗi ngəni, antə I hamta aka nyarmbwar Ruben, ka na ar Gad, su na baɗita ahar Arower na ata mnya Thlyagha Arnon, ka retar bwar garayeri ar tsəɗi Gileyad, kəga kauyayeri na kalaktə ni.

¹³Aka retar mjir nyarmbwar Manasse, I ku hamta ala ɗa shanga mambila Gileyad, ka shanga tsəɗi Bashan, vəi tə Og hara kuthlikur ata kər.” Hwatu waci mda ana kəga shanga bwar Argob na akwa Bashan ni abbər tsəɗi mjir Refa.

¹⁴Antə Yayir na akwa nyarmbwar Manasse ku kətə bwa na ar Argob, watau tsəɗi Bashan, har ka mwari akwa kəla tsəɗiyir mjir Geshur ka mjir Maaka. Antə tsa ku vəɓəla thləma kauyayeri ni ka thləmari, watau Diyayeri ar Yayir, apatə mda ana kəga har ba ashina.

¹⁵Aka Makir kəga kutakəyirni, I ku hamta ala ɗa Gileyad.

¹⁶Aka mjir nyarmbwar Ruben ka na ar Gad, I ku hamta ala ɗa bwa na thlata ahar Gileyad har ka mwanta adzə Thlyagha Arnon, ka kəla ɗa ata ɗəffa thlyagha ni. Antə su na thlata anda har ka mwanta adzə Thlyagha Yabbok na an kəla tsəɗi mjir Ammon ni, ata ndzi arɗa shang.

¹⁷Tsuwa I ku hamta ala ɗa Araba, ka mular Thlyagha Jodan, antə kəla ɗa ata thlyagha ni, watau su na baɗita adzə Manda Galili har ka mwanta adzə Manda Una, har ka mwanta adzə kusar Gar Pisga təbwar raghəi.

¹⁸Musa ku ləkəma ka gari aka mjir nyarmbwar Ruben, ka ar Gad, ka na ar retar mjir nyarmbwar Manasse abbər, “Akwa sakatə I hamta ala giri tsawa abbər, ‘MTHLAKU na Hyelər mburu ku hamta ala giri tsəɗi ngəni ka tsa ndzi ar giri. Shanga mji shili na ku mzhi mwari akwa mpa ata ɗəmhədzi kamnyar mpa, ka da mwari aɓəla bwanda Thlyagha Jodan. Da ata dlu kəma akəla maɗama' giri na mjir Israila, ka da dlar ɗa.

¹⁹Tar mwankir giri, kəga maɗa' giri, kəga mwaɓiyayeri ar giri, antə giri ata zharari akwa kauyayeri natə I ku kurtə hamta ala giri, kamnyar I ku sənda abbər giri ka mwaɓiyayeri hang.

²⁰Tar ma sakatə MTHLAKU ku hamta ndzəndzi lapiyakur aka maɗama' giri na mjir Israila, apatə tsa ku hamta ala giri. Tsuwa tar ma sakatə da ku ləkwa tsəɗi tə MTHLAKU na Hyelər giri akwa hamta ala ɗa aɓəla bwanda Thlyagha Jodan ni, antə giri ata ngka akwa tsəɗi tə I hamta ala giri.’ ”

²¹“Ata saka nda I ku tsawa aka Joshuwa abbər, ‘Ai gə ka nca ga ku wutə shanga su tə MTHLAKU na Hyelər giri ku hara aka kuthlyayeri ngəni suɗə ni. Tsu apani tsuwa antə MTHLAKU ata hara aka kəlara kuthlikurayeri natə giri ata ləkwa tsəɗiyir ɗa.

²²Giri aɗiya thlivər ɗa wa, kamnyar MTHLAKU na Hyelər giri an ata mpa kamnyar giri.’ ”

²³“Ka giri ɗangta abbər sakanda I ku hara adduwa aka MTHLAKU abbər,

²⁴‘MTHLAKU na ka Duna ta Shang, nggədza ngəni an ntangkəmar ncanta ali olkur nga ka kuthlikur ar nga. Hyel damwa aɗi amtazi wala akwa duniya ni na ata mzhi haratə suayeri ngəni ol'ol ni apa tə gə hara ni ya?

²⁵I akwa kiɗa akəla ga abbər ka gə zhar ra bu kəi fəlɓəla Thlyagha Jodan ni, kəi wutə tsəɗi na ɓɗaku na ka garayeri, ka garayeri ar Lebanon.’ ”

²⁶“Amma ɗəffa MTHLAKU ku ɓzi adzə ra kamnyar giri, antə apani tsa aɗi psi thləmari aka tuwarna wa. Antə tsa pəla ali, ‘Ku mzhi. Ga aɗiya jaktə hara adduwa ata kəra su ngəni ni wa.

²⁷Ndləɓəla ata kəra Gar Pisga ka gə wutə tsəɗi ni ka nca ga akwa kəlara bwa, təbwar raghəi, ka təbwar ramta, ka təbwar yala, ka təbwar anəm. Ka gə wulɓəla tsəɗi ni ɓɗaku, kamnyar ga aɗi ata fəlɓəla Thlyagha Jodan ngəni wa, zhar ka ləkwa tsəɗi ni wa.

²⁸Amma ka gə tsawa aka Joshuwa, ka gə dunautə ni, kamnyar tsa an ata pwar mji ngəni ka da fəlɓəla Jodan ni, ka ndzi mthlakər tsəɗi ni.’

²⁹Apani antə mburu ku ndzəndzi akwa mular ka kəma mburu awul di Beth Peyor.”