Read bura-pabir Zwarəngkər Shariya 30 Bible Online

Zwarəngkər Shariya 30 - bura-pabir bible

Zwarəngkər Shariya 30

¹Antə Musa ku ləkəma ka gari ni akwa pəla abbər, “I ku pwi cara akəma giri, cara na akwa daɓwa barka ka shuwumtadzi. Antə ma sakatə shanga suayeri ngəni ku wutə giri, ma giri ku ɗangtə akwa ɗəffa giri, akwa kəlara vəi tə MTHLAKU na Hyelər giri ku titiləmta giri,

²ma giri ku ngka adzə MTHLAKU na Hyelər giri, giri kəga maɗa' giri, ka kələngkər alari ka ɗəffa giri shang, ka mpika giri shang, apatə I ku tsawa ala giri ashina,

³to, MTHLAKU na Hyelər giri ata jaktə ngka ala giri ka barkayeri ni. Tsa ata kətadzə giri, ka fwaɓəla giri akwa nca durayeri tə tsa titiləmta giri akwa nca ɗa ni, ka tsa jaktə tsaptə giri ata kəma duku.

⁴Wala ma tsan titiləmta giri akwa tsəɗiyayeri na ciju akwa datər duniya, MTHLAKU na Hyelər giri ata tsaptə giri, ka ngka ka giri.

⁵MTHLAKU na Hyelər giri ata jaktə ngka ka giri akwa tsəɗiyir kəkayeri ar giri, ka giri ndzi mthlakari. Tsa ata hara ka giri wutə ləkəma akwa kəlara bwa, ka yatədzi hang ka təramta kəkayeri ar giri na ndzi azi waci.

⁶MTHLAKU na Hyelər giri ata thlamta ala giri kaciya ar ɗəffu, kamnyar ka giri kəsi alkawalərni ka ɗəffa giri shang, ka hir ni ka ɗəffa giri shang, ka mpika giri shang, kamnyar ka giri ndzi ka mpika.

⁷Antə MTHLAKU na Hyelər giri ata pungkər shanga shushukur nayeri ni ata kəra dawayeri ar giri na akwa nggəlar giri ka hara bwani ala giri ni.

⁸Antə giri ata kələngkər aka ndərər MTHLAKU, ka ɓəlatə shanga tsawayeri arni natə I akwa hamta ala giri ashina ni.

⁹MTHLAKU na Hyelər giri ata hara ka giri wutə ləkəma akwa kəlara su tə giri ata harari. Tsa ata na giri maɗankyar hang, ka mwaɓiyayeri hang, ka vu ka sur fakayeri ar giri yatədzi hang. Kamnyar MTHLAKU ata jaktə nggatə msərakur hara ka giri wutə ləkəma apatə tsa ku nggatə msərakur kəkayeri ar giri waci.

¹⁰MTHLAKU na Hyelər giri ata hara ala giri apani ma giri ku kələngkər alari, ka ɓəlatə tsawayeri arni, kəga suayeri tə tsa thlamta abbər ka mdə hara, ka shanga suayeri tə mdə rəbuta akwa Kakaɗər Tsawa ngəni ni, ma giri ku ngka adzə MTHLAKU na Hyelər giri, ka ɗəffa giri shang, ka mpika giri shang.”

¹¹“Kamnyar jiri, tsawayeri ngəni tə I akwa hamta ala giri ashina ni aɗi təra duna giri wa, wala təra kərathla giri wa.

¹²Tsa aɗi akwa vəi na amtazi wa, ta giri asə pəla, ‘Wan ata ləmtazi ka səntə ni ala mburu, ka mburu nggatə ka ɓəlatə ri?’

¹³Tsuwa tsa aɗi aɓəla bwanda manda wa, ta giri asə pəla, ‘Wan ata mwari aɓəla bwanda manda ka səntə ni ala mburu, ka mburu nggatə ka ɓəlatə ri?’

¹⁴Kamnyar ai ndər ni kudzəhə ka giri. Tsa akwa mnya giri, ka tsuwa akwa ɗəffa giri, kamnyar ka giri mzhi ɓəlatari.”

¹⁵“Nggədza ashina I akwa pwi mpika ka ɓɗakkur, ka mta ka ɗimikur.

¹⁶Ma giri ata kələngkər aka tsawayeri ar MTHLAKU na Hyelər giri, tə I akwa hamta ala giri ashina, ma giri ata hir MTHLAKU na Hyel giri, ka mwa akwa lakurni, ka ɓəlatə tsawayeri arni, kəga suayeri tə tsa thlamta abbər ka mdə hara, giri ata ndzi ka mpika, ka yatədzi hang. Tsuwa MTHLAKU na Hyelər giri ata vədza ala giri barka akwa tsəɗi tə giri akwa ləkwari ka ndzi mthlakari ni.

¹⁷Amma ma ɗəffa giri ku shinamtadzi, ka nggəlar ta nggatə su, ma giri ku təra, ka vəngkər səli aka haptayeri, ka hara mafakur ala ɗa,

¹⁸to, I akwa pəla ala giri ashina abbər, jiri, giri ata mtəgəmtadzi. Giri aɗi ata fəi akwa tsəɗi na aɓəla bwanda Jodan tə giri ata ləkwari ka ndzi mthlakari ni wa.

¹⁹I akwa kəga vəi na amtazi ka duniya ka da hara seɗa ata kəra giri ashina, abbər I ku pwi akəma giri mpika ka mta, ka barka ka shushukur. Antə carɓəla giri mpika kamnyar ka giri, kəga kəkayeri ar giri ndzi ka mpika.

²⁰Ka giri hir MTHLAKU na Hyelər giri, ka giri kələngkər alari, ka giri bartə ni ɓɗaku, kamnyar tsa an mpika giri. Atar hara apani antə giri ata fəi akwa tsəɗi tə tsa hara alkawalər hamtari aka kəkayeri ar giri ni, watau Ibrahim, ka Ishaku, ka Yakub.”