Read bura-pabir Zwarəngkər Shariya 31 Bible Online

Zwarəngkər Shariya 31 - bura-pabir bible

Zwarəngkər Shariya 31

¹Antə Musa ku ləkəma akwa ngkər ndərayeri ngəni aka mjir Israila.

²Tsa pəla ala ɗa, “Kulini məvi ku hara aru pal ka sərkumari. Antə I aɗi akwa mzhi pwar giri kəra wa. Tsuwa MTHLAKU ku kurtə pəla ali abbər I aɗi ata fəlɓəla Thlyagha Jodan wa.

³MTHLAKU na Hyelər giri surni an ata təramta akəma giri ka tsa fəlɓəla thlyagha ni, ka tsa kurəmta durayeri na anda. Antə giri ata mzhi dlutsə tsəɗiyir ɗa. Tsuwa Joshuwa ata pwa akəma giri ka tsa fəlɓəla thlyagha ni, apatə MTHLAKU ku pəla.

⁴Antə MTHLAKU ata hara aka mji na anda su tə tsa hara aka Sihon ka Og, kuthlyayeri ar mjir Amor, kəga tsəɗiyir ɗa, sakatə tsa kurəmta ɗa ni.

⁵Antə MTHLAKU ata hamta ɗa ala giri. Antə giri ata hara ala ɗa kalkal apatə I tsawa ala giri.

⁶Ka giri ntsətədzi, ka ndzi ɓəɓal, giri aɗiya thlivər wa, wala yakatə wa, kamnyar MTHLAKU na Hyelər giri surni an ata mwa ata kəma duku kəga giri. Tsa aɗi ata zhar giri shi giri wa, wala fwari ata kəra giri wa.”

⁷Antə Musa ku kəgaɓəla Joshuwa ata nca shanga mjir Israila ka pəla alari, “Ka gə ntsətədzi, ka ndzi ɓəɓal, kamnyar ga an ata pwar mji ngəni ka da ləkwa tsəɗi tə MTHLAKU ku kahyel aka kəkayeri ar giri abbər tsa ata hamta ala ɗa. Tsuwa ga an ata hamta ala ɗa tsəɗi ni akwa tsiya ɗa ka ndzi arɗa.

⁸MTHLAKU an ata təramta akəma ga ka tsa pwar nga. Tsa aɗi ata təra kazhar ngə wa, wala fwari ata kəra gə wa. Antə ga aɗiya thlivər wa, wala hara shishiɓa wa.”

⁹Antə Musa ku rəbutə tsawayeri ngəni ka hamta aka pristayeri na mjir Lawi, natə da an mjir kəl Akwati Alkawal ar MTHLAKU, ka aka mji ol'olər Israila.

¹⁰Musa ku tsawa ala ɗa abbər, “Akwa tsikəra kəlara məva murfa, natə an kalkal ka sakatə mdə thlamta kamnyar yafitə təmbəl ni, ka giri karatəmta tsawu ngəni akwa sakar Kucali ar Səvayeri.

¹¹Akwa sakatə shanga mjir Israila ku tsaptədzi akəma MTHLAKU na Hyelər giri akwa vəi tə tsa carɓəla, ka gə karata ala ɗa tsawu ngəni akwa thləma ɗa.

¹²Ka gə tsaptə mji, shili ka mwanki, maɗankyar kəga mətəpiyayeri na akwa kauyayeri ar giri, kamnyar ka waskəi nggatə ka thliptə laku tə tsa ata ndzi ka thlivər ɗəffa MTHLAKU na Hyelər giri akwa ɗəffari, tsuwa ka tsa vədzə hangkalari, ka ɓəlatə shanga ndərayeri na akwa tsawu ni.

¹³Ka giri hara apani, kamnyar ka maɗa' giri na aɗi səndə wa nggata, ka thliptə laku tə da ata mwa akwa thlivər ɗəffa MTHLAKU na Hyelər giri, akwa shanga ndzəndziyir giri akwa tsəɗi tə giri ata fəlɓəla Thlyagha Jodan ka ndzi mthlakari ni.”

¹⁴Antə MTHLAKU pəla aka Musa, “Sakar mtər nga abaka hara. Antə ndəra aka Joshuwa ka giri si ata kəma duku akwa Tentər Kəɓa ni, kamnyar kəi hamta alari kəthlər ar pwar mji.” Antə Musa ka Joshuwa ku təra mwari akwa Tentər Kəɓa ni.

¹⁵Antə MTHLAKU ncantə kərni ala ɗa akwa dlamba na thləlidzi. Tsuwa dlamba ni thləthlata anyarmbwar Tent ni.

¹⁶Antə MTHLAKU pəla aka Musa abbər, “Aɗi ata fəi wa, ga ata təra ra ghərəmtaghəra ata kəma duku kəga kəkayeri ar nga na waci. Amma aghəla nda, mji ngəni ata baɗitə vəngkər səli aka haptayeri ar tsəɗi tə da akwa ləkwari ni. Da ata fwari ata kəri, ka ɓəli alkawal natə yeru hara akwa daɓwa yeru kəga da.

¹⁷Vir nda, ɗəffi ata sə ɓza ata kəra ɗa ka duna, antə I ata fwari ata kəra ɗa, kəi ɗuwamtadzi ala ɗa, antə mda ata kurəmta ɗa. Tsuwa asarayeri kəga bwaniyayeri ata sə si ata kəra ɗa, har tə da ata sə pəla, ‘Diya asarayeri ngəni akwa wutə mburu ni kamnyar tə Hyelər mburu aɗi adzə mburu wa ni!’

¹⁸Jiri, vir nda I ata ɗuwamtadzi ala ɗa kamnyar kəmanggarkur tə da hara ali atar shinamta kəma ɗa ka nu haptayeri.”

¹⁹“Antə kulini, rəbutə ha ngəni, ka gə thlipta aka mjir Israila, har ka da mzhi harari, kamnyar ka tsa ndzi seɗarna ata kəra ɗa.

²⁰I ata mwantə ɗa akwa tsəɗi ngəni na ɓɗaku, na ata ya su ni, apatə I ku kahyel ar hamtari aka kəkayeri arɗa. Amma aghəla tə da ku səm susəma, ka ndli, ka təksa anda, da ata shinamtadzi ka nu haptayeri akwa vəngkər səli ala ɗa. Da ata nggəlar ra ka ɓəli alkawalərna.

²¹Antə ma sakatə asarayeri kəga bwaniyayeri zumzum hang ku si ata kəra ɗa, ha ngəni ata sə ndzi seɗa ata kəra ɗa, kamnyar tsa aɗi ata sha akwa mnya kəkayeri arɗa wa. Kamnyar I ku səndə dzamər ɗa ata kəra su tə da ata mzhi harari təng akəmata I amwantə ɗa akwa tsəɗi tə I kahyel ar hamtari ala ɗa ni.”

²²Tsu vir nda antə Musa ku rəbutə ha ni ka thlipa aka mjir Israila.

²³Antə MTHLAKU pəla aka Joshuwa na ɓzər Nun abbər, “Ka gə ntsətədzi, ka ndzi ɓəɓal, kamnyar ga an ata pwar mjir Israila ka mwantə ɗa akwa tsəɗi tə I kahyel ar hamtari ala ɗa. Tsuwa I ata ndzi adzə nga.”

²⁴Antə Musa ku rəbutə shanga tsawayeri ngəni akwa kakaɗu. Sakatə tsa ku kuri rəbutə ni

²⁵antə tsa pəla aka mjir Lawi natə da an mjir kəl Akwati Alkawal ar MTHLAKU ni abbər,

²⁶“Kətə giri Kakaɗər Tsawa ngəni, ka giri vəi adzə Akwati Alkawal ar MTHLAKU na Hyelər giri ni, kamnyar ka tsa ndzi seɗarna ata kəra giri.

²⁷Kamnyar I asəndə laku tə kəra ɗa ɓəɓal akwa, ka laku tə da hir thlentə hangkala mda akwa. Antə ma giri ata nggəlar ndərər MTHLAKU təng tə I tsu azi akwa nca giri ka mpika, suari ata sə ndzi məmə ri ma sakatə I ku mti?

²⁸Antə tsapta ali shanga mji ol'olər nyarmbwayeri ar giri akəmi, kamnyar kəi zwarəngkər ala ɗa ndərayeri ngəni akwa thləma ɗa, tsuwa kəi kəga vəi na amtazi ka duniya ka da ndzi seɗarna ata kəra ɗa.

²⁹Kamnyar I ku sənda abbər aghəla mtərna, jiri, giri ata sə hara dlərpəkur, ka shinamtadzi kazhar laku tə I tsawa ala giri. Antə akwa virayeri na ata si akəmazi asar ata sə si ata kəra giri, kamnyar giri ata sə hara su na ɗimi ata nca MTHLAKU, ka mbwantə ɗəffari atar suayeri tə giri nam ka tsiya giri.”

³⁰Antə Musa ku ngkər ndərayeri na akwa ha ar tsikərari ni aka shanga mjir Israila na tsaptədzi.