Read bura-pabir Zwarəngkər Shariya 32 Bible Online

Zwarəngkər Shariya 32 - bura-pabir bible

Zwarəngkər Shariya 32

¹“Vəyayeri na amtazi, Psi gir thləma giri, I ata gari. Gə na duniya, ngga su tə I ata pəlari.

²Ndzi ka surthlipərna təra ata kəra giri apa yimərhyel, ka gariyirna təri apa kəlangkəu, apa kwandza ata kəra kusar miraku, apa kwandza ata kəra su na haɗa ptsa.

³Kamnyar I ata psəmnya thləma MTHLAKU. Hamta gir olkur aka Hyelər mburu!

⁴Tsa an Pelar Ɗuwardzi na ola, kəthlərərni an nghyinghyari, tsuwa shanga lakurni ka jirkur. Hyel an ka jirkur, kula ɗimikur, tsa ana hara su na kalkal ka jirkur tsuwa.

⁵Amma giri ku ncantə hilhilkur alari, antə giri aɗi maɗa'ni kəra wa, kamnyar giri ku ndzi ka nangka. Giri ku ndzi zaman ar mji na hilhilari ka na mbalmbalari.

⁶Apani antə giri akwa hara aka MTHLAKU ya, durayeri damwa, mji kula dzama? Aɗi tsa an baba' giri na alaktə giri wa ya, na namtə giri ka nci giri?

⁷Ɗangtə giri sakayeri na təramta waci, dzam ata kəra zamanayeri na təramta. Yu giri baba' giri ka tsa ngkər ala giri mji ol'olər giri, antə da ata pəla ala giri.

⁸Sakatə Na ka Səli ta Shang hamta kifa aka mji, sakatə tsa ndəkəi mjir duniya, ka ncimta kəlayeri akwa daɓwa mji, kəlara dur ka hyelərni.

⁹Kamnyar MTHLAKU ku namtə mjirni an nəɓwarni, ka vəi Yakub abbər tsa an kifərni.

¹⁰“Tsa wutə ni akwa mtaku na kula yimi, akwa mtaku na kula mda, kula ampani. Antə tsa kalaktə ni ka wulwul kərari, ka ɓəlatə ni apa ɗəvər ncari.

¹¹MTHLAKU ndzi apa duku, na ana wul kəra maɗa'ni, apa duku na ana kəlar ɓəɓəkayerari ka thlipə fəla aka maɗa'ni, ka kathli ɗa ata ɓəɓəkayerari, ta da asə təri ata di.

¹²MTHLAKU shini an pwar mjirni hyel ar mji damwa aɗi adzə ni wa.

¹³“Tsa nci Israila amta ata kəra gar ar tsəɗi ni, ka ndlantə ni ka sur faku. Tsa kəlantə ni ka məma ar pelar kəra gar ka mal tə mda ana wuta akwa nfwayeri na ptsa ata gar,

¹⁴Tsa ndlantə ɗa ka kindərmu ka uwa hadlu ar thla ka təma ka kwi, ka tsuwa malkumər gamayeri ka maɗa' gamayeri na təksətəksari, ka gyalayeri kəga kwiyayeri ar Bashan na lapiya. Tsa ndlantə ɗa ka alkama na ɓɗakta shang, tə da sangkər yimər anap na ɓɗakta ta shang.

¹⁵Amma Yeshurun na mjir Israila ku səm ka ndli, ka təksa ka duna, ka hara kər ɓəɓalkur. Da təksa, ka ndzi ka duna, ka dza ɗa akwa mbəlmbəla. Da fwari ata kəra Hyel na vəi ɗa ka rutəmta Pelar Ɗuwardzi na ana msərantə ɗa.

¹⁶Da vu ni akwa səlkər haptayeri arɗa, tsuwa da ku ɓzamtə ɗəffari ka sur cika.

¹⁷Da ku hara saɗaka aka shatanayeri, aɗi aka Hyel wa, aka haptayeri natə da aɗi ɗar səndə ɗa wa, haptayeri na haɗa səɓəla haptayeri tə kəkayeri arɗa aɗi ɗar thlivərari wa.

¹⁸Da fwari ata kəra Pelar Ɗuwardzi na msərantə ɗa, da fwari ata kəra Hyel na na ala ɗa mpika.

¹⁹“MTHLAKU ku wutə su ngəni, ka rutəmta ɗa, kamnyar ɗəffari na ɓza ata kəra maɗa'ni shili ka mwanki.

²⁰“Antə Hyel pəla, ‘I ata ɗuwamtadzi ala ɗa, kəi wul laku tə da ata sə tsikərari akwa kamnyar da zamanər mjir pwaktə mda, maɗankyar na kula jirkur.

²¹Da vu ra akwa səlkər su na aɗi Hyel wa, ka vu tə ɗəffi ku ɓza adzə haptayeri arɗa. Apani tsuwa I ata vu ɗa akwa səlkər mji na aɗi su ma wa, kəi vu ɗa akwa səlkər mji na caku.

²²Kamnyar ɗəffi akwa mba ra ata kəra ɗa, tsa ata mbamta wala su na aghəi akwa kula, Tsa ata mbamta duniya ka su na akwa, ka hatə u'u ata kira garayeri.

²³I ata tsaɓəngkər asarayeri ata kəra ɗa, I ata kuri afərna shang ata kəra ɗa.

²⁴I ata vu ka mi thlarəmta dza ɗa, ka shilku na mwavər kwasəmnya ɗa, ka asar na ɗimi higəlantə ɗa. I ata thlentə mwaɓiyayeri ar mtaku ata kəra ɗa, kəga suayeri na ka gwar na ana mwa ata di.

²⁵Mji na aɓəla, katsakar ata tsəgəi ɗa mji na ambwa thlivər ata ngkəi ɗa, I ata kurəmta maɗadakwi kəga maɗankwi, maɗa' na ata uwa kəga mji na ka shishi mwapu.

²⁶I pəla I ata titiləmta ɗa, kəi vu ka mdə fwari ata kəra ɗa akwa nca mji.

²⁷Amma I akwa thlivər mnya dawayeri, ta dawayeri ni asə pəla, “Ka dunar ɗəva ar yeru antə yeru səm ɗa, shanga su ngəni aɗi MTHLAKU an hara wa!” ’ ”

²⁸“ ‘Mjir Israila aɗi ka hangkal wa, da aɗi ana nggaɓəla su wa.

²⁹Ma da an ɗəɗu, sakani da ku nggaɓəla su ngəni ka nggaɓəla laku tə da ata sə tsikəra ɗa akwa.

³⁰Apa madi tə mdə duku ata mzhi kədləmta mji dəpu, ka mji suɗa kədləmta mji dəpu kum ri? Tar ma Pelar Ɗuwardzər ɗa an ɗələmta ɗa, tar ma MTHLAKU ni an hamta ɗa.

³¹Kamnyar pelar ɗa aɗi apa Pelar mburu wa wala dawayeri ar mburu ku sənda apani.

³²Kamnyar nfur anap arɗa an hwulfər anap ar Sodom na thlata akwa fakayeri na ahar Gomora. Yar anap arɗa ana ndzi ka gwar, gwandzalayerari shang ɗəɗahu.

³³Yimər anap arɗa ndzi apa gwarər pwapu, ka gwar na ɗimi apa ar jataviyari.’ ”

³⁴“I ɗuwamta suayeri ngəni akwa ɗəffi, ka dləɓ səri ata kəra ɗa katagu.

³⁵Ntə dawa an surna, I ata ntəmtari, saka ata si tə dlyadlirka ata fatə səla ɗa, kamnyar vir asarər ɗa abaka hara, antə mda ata shamta ɗa akwa məcikər nca.

³⁶MTHLAKU ata kətadzə mafayeri arni, tsa ata ncanta abbər mjirni kula biku, ma sakatə tsa wuta abbər duna ɗa ku kuri tə mda aɗi na mbili avi, wala mafa wala kamba wa.

³⁷Antə Hyel ata pəla, ‘Ama haptayeri arɗa ni ri, pela tə da ana ɗuwamtadzi akəmari ni?

³⁸Ama haptayeri na kwasəmnya malkumər saɗakayeri ar ɗa ka sangkər yimər anapər saɗakar sur sa arɗa nə ri? Ma da aɗi, ka da thlatə ka da dlar ɗa ka da ɗuwamta ɗa ta asarayeri ni!’ ”

³⁹“ ‘Nggaɓəla ja kulini, abbər I an tsa, Hyel damwa aɗi wa, tar iya. I andər tsiyari, I andər mbantari, I andər hara mbəlku, I andər kuriyari, mda aɗi na ka dunar mbuli mda akwa tsi wa.

⁴⁰Kamnyar I ku haptə tsi amtazi, ka kahyel apatə I aɗi ba saka madi,

⁴¹ma sakatə I ku tsələmta katsakar arna, tə tsa ləkwa mbəlmbəla, tə I ku kəsi ni akwa tsi kamnyar hara shariya, I ata ntəskur ata kəra dawayeri arna, kəi ntəmta watsəɓər mji na nggəlar ra.

⁴²I ata hara ka afayeri arna wika ka mamshi, ka katsakar arna ɓɗə kum, ka mamshir mji tə mdə thlagamta wulya ɗa, ka ar mji tə mdə ngkatsa akwa mpa. Katsakar arna ata nthlənthləmta, kəra mji na ol'olər dawayeri arna.’ ”

⁴³“ ‘Haptə giri kurakər kucali, shanga vəyayeri na amtazi, kamnyar tsa ata ɗi dawayeri arni na pumta mamshir mafayeri arni, tsa ata kəcimta bikər tsəɗi ni ka mjirni.’ ”

⁴⁴Antə Musa ka Joshuwa na ɓzər Nun ku jaktə nutə ndərayeri na akwa ha ni kamnyar ka mjir Israila nggata.

⁴⁵Sakatə Musa ku kuri pəla shanga ndərayeri ngəni aka shanga mjir Israila,

⁴⁶antə tsa pəla, “Ka giri kəsi ndərayeri ngəni akwa ɗəffa giri, shanga ndərayeri tə I akwa psəmnya ala giri ashina ni. Tsuwa ka giri hamta tsawayeri ngəni aka maɗa' giri, ka da nu ndərayeri na akwa tsawu ni, ka ɓəlatə ɗa ɓɗaku.

⁴⁷Kamnyar ngəni aɗi ndər na ndzang wa, tsa an mpika giri. Atar kələngkər aka ndərayeri ngəni antə far giri ata fəi akwa tsəɗi tə giri ata fəlɓəla Thlyagha Jodan kamnyar ka giri dluwa ka ndzi mthlakari ni.”

⁴⁸Tsu vir nda antə MTHLAKU pəla aka Musa abbər,

⁴⁹“Ndləɓəla akwa garayeri ar Abarim na akwa tsəɗi Mowab, awul bərni Yariko. Ka gə lətə Gar Nebo, kamnyar ka gə mzhi wutə tsəɗi Kanana, natə I ata hamtari aka mjir Israila ka tsa ndzi kifər ɗa ni.

⁵⁰Anda ata gar ni antə ga ata mta ka mwari adzə kəkayeri ar nga, tsu apatə ɓzərma' nga Haruna ku mti ata Gar Hor, ka mwari adzə kəkayeri arni.

⁵¹Kamnyar japwa giri aɗi ndzi ali ka jirkur akəma mjir Israila sakatə giri ata mnya yimayeri ar Meriba na akwa Kadesh akwa Mtakər Zin wa. Tsuwa giri aɗi haptə səliyirna apa Hyel na ɓɗakkarkara akəma mjir Israila wa.

⁵²Antə apani, ga ata wutə tsəɗi ni tə gə ciju, amma ga aɗi ata ləkwa tsəɗi tə I akwa hamta aka mjir Israila wa.”