Read bura-pabir Zwarəngkər Shariya 33 Bible Online

Zwarəngkər Shariya 33 - bura-pabir bible

Zwarəngkər Shariya 33

¹Ngəni an barka natə Musa na mdər Hyel ku vədza aka mjir Israila akəmata tsa mta.

²Tsa pəla, “MTHLAKU ku səghəi ata Gar Sinai, ka mbəla apatə pci ana səɓəla təbwar Seyir akwa Edom, ata kəra Gar Paran. Tsa si ka mji na ɓɗakkarkara dəpu dəpu adzə ni, ka kyanggyara u'u akwa mba akwa tsi mazəmari.

³Jiri, tsa hir mjirni, shanga mji tə tsa ku carɓəla aka kərari, tsa ana ɓəlatə mpika ɗa. Da ana zuzuri ata di akəma səlari, akwa dlu ndər akəlari.

⁴Ngəni an tsawa tə Musa hamta ala yeru, tsa an kifa na ka daraja aka mjir Israila.

⁵Hyel ku ndzi kuthlir mjirni Israila sakatə mji ol'olər Israila tsaptədzi, kəga shanga nyarmbwayeri ar Israila.”

⁶Nggədza su tə Musa pəla ata kəra nyarmbwar Ruben. “Ka mdə zhar mjir nyarmbwar Ruben, mda aɗiya shamta ɗa wa, amma ka mjirni ndzi yiɗauwa daci.”

⁷Nggədza su tə tsa pəla ata kəra mjir nyarmbwar Yahuda, “Psi thləma ga, MTHLAKU, aka tuwar mjir Yahuda, ka gə paktə ɗa ka mambila mjir ɗa, Ka gə na ɗa dunar mpamta mpa, ka gə dlar ɗa ata kəra dawayeri arɗa.”

⁸Ata kəra nyarmbwar mjir Lawi tsa pəla, “Ka gə hamta Thlummim ar nga aka mjir Lawi, ka Urim ar nga aka mjir jirkur, mji tə ga ku ngkərtə ɗa ahar Massa, mji tə ga ku beɗi ka da ata mnya yimər Meriba.

⁹Kamnyar mjir Lawi ku kələngkər ala ga, ka kəsi alkawalər nga ɓɗaku. Da ana kələngkər ala gə ka jirkur, təramta aka mjir yar ɗa, ka yangkura ɗa, ka maɗa' ɗa.

¹⁰Da ana thlipə tsawayeri ar nga aka mjir Yakub, ka tsawur nga aka mjir Israila. Da ana pwi sur shiwur na msəra akəma ga, ka saɗaka mbamba ata kəra bagaɗi saɗaka ar nga.

¹¹Vədzə barka aka mjir Lawi, MTHLAKU, ka gə dlu kəthlərayeri ar tsiya ɗa, usa. Hadləmta shanga dawayeri arɗa, ka shanga mji na ana nggəlar ɗa, ta da asə jaktə thlatə ka damwa.”

¹²Ata kəra mjir nyarmbwar Benjamin, tsa pəla, “Da an mji tə MTHLAKU hirhir ɗa, da akwa ndzi lapiya adzə ni. Tsa ana tsəlpitə mpika ɗa pci ka viri, antə da ana ndzi akwa humbari tədəku.”

¹³Ata kəra mjir nyarmbwar Yusuf tsa pəla, “Ka MTHLAKU vədzə barka aka tsəɗiyir ɗa, ka tsa pughəi ala ɗa kəlangkəu na ɓɗakta shang, ka yimi na ana səɓəla akwa kira di,

¹⁴ka tsa na ɗa sur fakəu na ɓɗakta ta shang, na ana kəla ka ng'ha ata pci, ka suayeri na ɓɗakɓɗaku tə mda ana wuta akwa kəlara thliya,

¹⁵ka ampani na ɓɗakta shang, na ana thlata akwa garayeri na aɗi təng waci, ka cautayeri na ɓɗakɓɗaku hang tə garayeri na ba ka ba ana hamta,

¹⁶ka cautayeri na ɓɗakta shang tə di ana hamta, ka shanga ampaniyayeri na akwa, ka ɓɗakkur ar mdə na wutədzi ata nfu laga raka na akwa mba. Ka barkayeri ngəni səghəi ata kəra Yusuf, ata murkəma mdə natə mdə carɓəla akwa nca maɗama'ni ka tsa ndzi akəma.

¹⁷Tsa ka daraja apa gyal na yarakəma, dunarni ndzi apa təmbəla gyal mtaku. Apatə gyal mtaku ana kəthlər ka təmbəlayerari ka dlərəmta dawayeri arni, antə mjir nyarmbwar Yusuf ata kəthlər ka mjir Ifrayim na dəpu kum kuma, ka mjir Manasse na dəpu dəpu, ka kədləmta durayeri ciju kazhar ɗa, ka mwantə ɗa akwa datər duniya.”

¹⁸Aka kəra mjir nyarmbwar Zebulun, tsa pəla, “Hara gir kucali, giri na mjir nyarmbwar Zebulun, akwa ləɓəlar giri kamnyar fəli, ka giri na mjir nyarmbwar Issakar akwa kəyayeri ar giri.

¹⁹Da ata kəgatə mji ata garər ɗa, ka da hamta saɗakayeri na kalkal anda. Kamnyar da ata wutə gəna ata kəra yimi ni, ka gəna na ɗuwarɗuwarari akwa wuyaku.”

²⁰Ata kəra mjir nyarmbwar Gad, tsa pela, “Ka barka ndzi aka mdə na ku jakə olkur tsəɗi Gad, Gad ata ndzəndzi ka sək su apa tsəngi, ka tsa thləhumta shaha mji wala fəi kəsəm kugwar kəra mda.

²¹Tsa ku carɓəla tsəɗi na ɓɗakta shang aka kərari, kamnyar bwa ndaga antə mdə ɗəmhə kamnyar mdər pwara, sakatə mjir pwara tsaptədzi ata kəma duku kəga mjir Israila ka da hara su na ata kəskəra MTHLAKU, ka ɓəlatə tsawayeri arni.”

²²Ata kəra mjir nyarmbwar Dan, tsa pəla, “Dan an ɓzər tsəngi, akwa kurni na akwa Bashan, tsa ata fəlɓəla ata kəra dawayeri arni.”

²³Ata kəra mjir nyarmbwar Naftali, tsa pəla, “Naftali, ar nga ga ku ndlə ka ɓɗakkur ar MTHLAKU, antə gə nghyinghyari ka barkayeri arni, ga ata dlu bwar anəm ka pudza aka mnya Mandar Galili.”

²⁴Ata kəra mjir nyarmbwar Asher, tsa pəla, “Asher an ka barka ta shang akwa nca maɗashili, Hara ka tsa ndzi mda tə maɗama'ni hirhira. Hara ka nfur zaitun arni ya hang, har ka tsa kəcimta səlari akwa malari.

²⁵Hara ka udzəmayeri ar dzəka nyarfurni, ndzi liya ka əmza. Hara ka dunari kəɓa ka hangkur məvari.”

²⁶“Yeshurun, su aɗi tə mda agira ka Hyel wa, tsa na ana mwa ata hyel kamnyar dlar nga, tsa na ana mwa ata dlambayeri ka kuthlikur.

²⁷Hyel na ba saka madi an vəi ndzəndziyir nga, tsa ana hangkir tsiyari na ba saka madi akira ga ka tsa rwati nga. Tsa ana kədləmta dawayeri ar nga akəma ga, ka tsa pəla, ‘Kurəmta ɗa!’

²⁸Apani mjir Israila akwa ndzəndzi lapiya, mjir nyarmbwar Yakub akwa ndzəndzi lapiya, akwa tsəɗiyir mthli ka yimər anap, kamnyar vəi na amtazi ata pughəi kəlangkəu.

²⁹Msəra ala giri, giri na mjir Israila! Kamnyar aɗi apa giri wa, mji tə MTHLAKU an mbantə ɗa. Tsa surni an partau ar dlar giri ka katsakar ar hamta ala giri nggyari su. Dawayeri ar giri ata sə zuzuri akəma giri, antə giri ata ntsəntsarəmta ɗa akira səla giri.”