Read bura-pabir Zwarəngkər Shariya 34 Bible Online

Zwarəngkər Shariya 34 - bura-pabir bible

Zwarəngkər Shariya 34

¹Antə Musa ku thlatə kazhar bəbal na akwa Mowab ni ka ləmta akwa Gar Nebo, har ka mzhitə kəra Gar Pisga, na akwa wul Yariko. Anda antə MTHLAKU ncanta alari shanga tsəɗi ni, su na tamta adzə tsəɗi Gileyad har ka pudza aka tsəɗi Dan,

²ka shanga tsəɗi Naftali, ka ar Ifrayim, ka ar Manasse, ka shanga tsəɗi Yahuda har ka pudza aka Manda Meditereniya.

³Tsuwa tsa ku ncanta alari bwar Negev, ka mular na thlata akwa Zowar ka tsadza aka Yariko na an bərni nfur dipənau.

⁴Antə MTHLAKU pəla aka Musa abbər, “Ngəni an tsəɗi natə I ku kahyel aka Ibrahim, ka Ishaku, ka Yakub, abbər I ata hamtari aka kəkayeri arɗa. I ku zhari nga ka gə wutə ka nca ga, amma ga aɗi ata fəlɓəla ka mwari akwa wa.”

⁵Antə Musa na mafar MTHLAKU ku mti anda akwa tsəɗi Mowab, apatə MTHLAKU ku pəla.

⁶Antə mdə ku harəmta ni akwa tsəɗi Mowab, akwa mular laga na awul Beth Peyor, Amma ba ashina mda aɗi na ku səndə vəi tə kulərni ni ata wa.

⁷Musa ka məvari aru pal ka sərkumari sakatə tsa mta. Musa mtə sakatə tsa tsu ɓəɓal ka dunar salkurərni, ka ncari tsu akwa wutə su yur.

⁸Antə mjir Israila ku tuwa Musa mnyar vir makkumari akwa bəbal ar Mowab.

⁹Antə Joshuwa na ɓzər Nun ku nghyi ka mambəl ar ɗəɗukur, kamnyar tə Musa ku pungkər tsəyir barka ata kərari. Antə mjir Israila tsuwa ku kələngkər aka Joshuwa, ka hara shanga su kalkal apatə MTHLAKU ku tsawa aka Musa.

¹⁰Təng ka saka ngənda, mda aɗi ɗar jaktə wutə naɓi damwa akwa Israila apa Musa wa, natə MTHLAKU ku gari alari nca ka nca.

¹¹Naɓi aɗi na ku hara shanga seɗayeri kəga surndatayeri apa natə MTHLAKU thlentə Musa ka tsa hara akwa tsəɗi Masar, ata kəra kuthli, ka kwakunayeri arni, ka shanga tsəɗiyirni wa.

¹²Kamnyar mdə damwa aɗi na ku mzhi haratə suayeri na ol'ol ka duna ka kuthlikur na ata thlivərantə mda apa natə Musa ku harata akəma mjir Israila ni wa.