Read bura-pabir Zwarəngkər Shariya 4 Bible Online

Zwarəngkər Shariya 4 - bura-pabir bible

Zwarəngkər Shariya 4

¹Antə Musa pəla aka mjir Israila, “Psi gir thləma giri aka suayeri tə mdə thlamta abbər ka mdə hara kəga tsawayeri ngəni tə I akwa hamta ala giri ni. Ka giri ɓəlatə ɗa kamnyar ka giri ndzi ka mpika, tsuwa ka giri ləkwa tsəɗi tə MTHLAKU na Hyelər kəkayeri ar giri ku hamta ala giri, ka giri ndzi mthlakari.

²Giri aɗiya jakəngkər su aka tsawa tə I akwa hamta ala giri wa, wala kəmta su laga akwa wa. Amma ka giri ɓəlatə tsawayeri ar MTHLAKU na Hyelər giri tə I akwa hamta ala giri ni.

³Giri ka nca giri ku wutə su tə MTHLAKU hara akwa Baal Peyor, apatə MTHLAKU na Hyelər giri kurəmta mji la ga akwa nca giri na ku vəngkər səli aka Baal Peyor.

⁴Amma mji na mbila akwa nca giri na ku ndzi ka jirkur aka MTHLAKU na Hyelər giri, ku ndzi ka mpika har ba ashina.”

⁵Nggədza, I ku thlipa ala giri shanga suayeri tə kalkal ka mdə hara kəga tsawayeri apatə MTHLAKU na Hyelərna ku tsawa ali kəi hara, kamnyar ka giri ɓəlatə ɗa akwa tsəɗi tə giri ata ləkwari ni.

⁶Ka giri ɓəlatə ɗa, ka hara su tə tsawayeri ni pəla, kamnyar atar hara su apani antə giri ata ncantə ɗəɗukur giri ka nggaɓəla sur giri aka mambila durayeri. Antə ma sakatə da ku nggata ata kəra shanga suayeri tə kalkal ka giri hara ni, da ata pəla, “Jiri, tsəɗi ngəni ol ni, tsa ka mji na ɗəɗu ka nggaɓəlar su!”

⁷Kamnyar mjir tsəɗi damwa aɗi na ka hyelər ɗa kudzəhə ka da apatə MTHLAKU kudzəhə ka mburu akwa kəlara sakatə mburu ku kəga thləmari ni wa.

⁸Tsuwa mjir tsəɗi damwa aɗi na ka suayeri tə kalkal ka mdə hara, kəga tsawayeri na ɓɗakɓɗaku, apa surthlipə tə I akwa hamta ala giri ashina ni wa.

⁹Təng ka giri vədza hangkala giri, ta giri asə fwari ata kəra suayeri tə giri ku wutə ka nca giri, wala zhar ka da ləɓəla akwa hangkala giri akwa shanga ndzəndziyir mpika giri. Ka giri thlipə ɗa aka maɗa' giri, kəga kəkayeri ar giri.

¹⁰Ka giri pəla ala ɗa apatə giri ku thləthlata akəma MTHLAKU na Hyelər giri ahar Horeb, sakatə MTHLAKU pəla ali abbər, “Tsapta ali mji ni, kamnyar kəi pəla ala ɗa su, ka da thliptə laku tə da ata ndzi mjir thlivər ɗəffi akwa shanga ndzəndziyir ɗa akwa duniya, tsuwa ka da thlipa aka maɗa' ɗa.”

¹¹Ka giri pəla aka maɗa' giri laku tə giri mwari kudzəhə ka kusara gar sakatə u'u akwa mba ata kəra gar ni, har akwa ləmta ahar hyel, nggədza tsuwa zhimaru ku ta mənggəl thlərətu ka hartə kəra gar ni.

¹²Tsuwa akwa kuta u'u ni MTHLAKU ku gari ala giri. Giri ku nggatə kurakari, amma giri aɗi wutə dludzər mdə na akwa gari ni wa, təng kurakə ni daci.

¹³Tsa ku psəmnya ala giri alkawalərni, watau Tsawayeri na Kuma, ka tsaktə giri abbər ka giri ɓəlatə ɗa. Tsa rəbutə ɗa ata allo ar pela suɗa.

¹⁴Ata saka ndaga antə MTHLAKU pəla ali abbər kəi thlipa ala giri shanga suayeri tə kalkal ka mdə hara ka tsawayeri, kamnyar ka giri ɓəlatə ɗa akwa tsəɗi tə giri ata fəlɓəla Jodan ka ləkwa ka ndzəndzi ni.

¹⁵Antə təng tə giri aɗi wutə dludzər mda akwa sakatə MTHLAKU gari ala giri ata Gar Horeb ni wa, tar ka giri hara hangkal ka kəra giri,

¹⁶ta giri aɓzamtə kər giri atar martə haptu na dludzə ka su tə Hyel alakta, wala dludzər mdə sal, wala mdə mwala,

¹⁷wala dludzər mwaɓi laga akwa duniya, wala dludzər ɗika na ana fəla aharhyel akwa shambar,

¹⁸wala dludzər su laga na ana mwa ka yimərkutari ata di, wala dludzər kəlfa laga akwa kira yimi wa.

¹⁹Tsuwa kəlara sakatə giri ku haptə nca giri ka wul vəi na amta, ka wutə pci, ka thliya, ka sasəlkayeri, ka shanga suayeri na ata kutahyel natə Hyel pwi, ka giri hara hangkal ta da andəkərtə hangkala giri har ka giri vəngkər səli ala ɗa, ka hara mafakur ala ɗa. Kamnyar MTHLAKU na Hyelər giri ku hamta suayeri ngəni aka shanga mambila durayeri na akwa duniya ni.

²⁰Amma ar giri, MTHLAKU ku fwaɓəla giri akwa Masar, akwa bwarbwarkur u'ur kəthla, kamnyar ka giri ndzi mjirni na hirhirari ta shang apatə giri aɗi ashina.

²¹Amma ɗəffa MTHLAKU ku ɓzi adzə ra kamnyar giri, har tə tsa kahyel ali abbər I aɗi ata fəlɓəla Thlyagha Jodan, ka ləkwa tsəɗi na ɓɗaku natə MTHLAKU na Hyelər giri akwa hamta ala giri ni wa.

²²Kamnyar arna I ata mta akwa tsəɗi ngəni, I aɗi ata fəlɓəla Thlyagha Jodan ni wa, amma ar giri, giri ata fəlɓəlari ka ləkwa tsəɗi na ɓɗaku ni, ka ndzi mthlakari.

²³Antə apani ka giri hara hangkal, ta giri asə fwari alkawal tə MTHLAKU na Hyelər giri hara ala giri. Giri aɗiya namtə su laga apa haptu na dludzi ka kəlara su laga wa, kamnyar MTHLAKU na Hyelər giri ku ngkata.

²⁴Kamnyar MTHLAKU na Hyelər giri an u'u na ana mbamta su, tsuwa tsa an Hyel na ana bara hirkur na swakti akəla mda.

²⁵Akəmazi ma sakatə giri ku ya maɗa' har ka wutə kəkayeri, tsuwa tə giri ku fəi akwa tsəɗi ni, giri aɗiya diɓərtə kər giri atar namtə haptu na dludzi ka su laga wa, kamnyar ngəni an su na ɗimi akəma MTHLAKU. Antə su ngəni ata vu ka ɗəffari ɓza.

²⁶Ashina, I akwa kəga vəi na amtazi ka duniya ka da ndzi seɗarna ata kəra giri, abbər ma giri ku nggəlar ta kələngkər ali, to, kulikulini giri ata mtəgəmtadzi akwa tsəɗi tə giri ata fəlɓəla Jodan ka ləkwa, ka ndzi mthlakari ni.

²⁷Kamnyar MTHLAKU ata titiləmta giri akwa tsəɗiyayeri damwa, tsuwa təng mjir giri yiɗauwa an ata si mbila akwa tsəɗiyayeri ni.

²⁸Antə akwa tsəɗiyayeri nda giri ata si vəngkər səli aka haptayeri tə mda an nam ka tsiyari, haptu tə mdə nam ka udzəm wala ka pela, natə da aɗi ana wutə su, wala nggatə su, wala səm susəma, wala nggatə shiwur su wa.

²⁹Amma anda akwa vəi tə giri ata ni, ma giri ku bara MTHLAKU na Hyelər giri, giri ata wutə ni, ma giri ku bara ni ka ɗəffa giri shang ka hangkala giri shang.

³⁰Ma sakatə giri ku ləkwa bwani, tə su nayeri ni ku wutə giri akəmazi, ka giri shinardzi təbwar MTHLAKU na Hyelər giri, ka giri kələngkər alari.

³¹Kamnyar MTHLAKU na Hyelər giri an Hyelər kətadza, antə tsa aɗi ata zhar giri wala hilantə giri wa, wala fwari ata kəra alkawal tə tsa ku kəta aka kəkayeri ar giri wa.

³²Yu giri su ata kəra suayeri na hara waci bu, təng akwa sakatə Hyel namtə mda ata kəra duniya har ka sənta aka kulini. Yu giri su akwa baɗitər vəi na amtazi har ka mwanta aka tsikərari, abbər su aɗi na ola apani na ku ɗar hara ya? Wala tsuwa mda aɗi na ku ɗar nggatə su apa ngəni ya?

³³Wala tsuwa dur aɗi na ku ɗar nggatə hyel laga akwa gari ala ɗa akwa u'u apatə giri nggatə ni ya?

³⁴Wala tsuwa hyel laga aɗi na ku ɗar ngkərta abbər tsa ata fwaɓəla mji akwa nca mjir tsəɗi damwa ka namtə ɗa mjirni apatə MTHLAKU ku hara ala giri akwa Masar ya? Ata nca giri antə tsa ku hara kuthlikurərni ka hara surndata, ka səntə shilku, ka seɗayeri, kəga sur thlivəra, kəga mpayeri.

³⁵Mdə ncanta ala giri suayeri ngəni kamnyar ka giri sənda abbər MTHLAKU an Hyel. Ma tsa kəra wa, damwa aɗi wa.

³⁶Tsa ku hir tə giri ku nggatə kurakari akwar amtazi kamnyar ka tsa ɗiɓəla giri. Akwa duniya tsuwa tsa ku hir tə giri ku wutə u'ur ni, har ka nggatə kurakari akwa mnya akwa kuta u'u.

³⁷Kamnyar tə tsa hir kəkayeri ar giri, an su na hara tə tsa carɓəla giri na akwa nyarmbwarni aghəla ɗa. Tsa surni an fwaɓəla giri akwa tsəɗi Masar atar dunar kuthlikurərni.

³⁸Sakatə giri akwa mwa tsuwa, tsa ku kədləmta durayeri na akəma giri na ka duna ta giri, kamnyar ka tsa mwantə giri akwa tsəɗiyir ɗa, ka tsəɗi ni ndzi ar kəra giri apatə tsa aɗi ashina.

³⁹Kamnyar ngəni, ka giri sənda ashina, ka vu akwa ɗəffa giri, abbər MTHLAKU shini an Hyel na amtazi ka akwa duniya, damwa aɗi wa.

⁴⁰Ka giri ɓəlatə shanga tsawayeri arni natə I akwa hamta ala giri ashina, kamnyar ka giri wutə ndzəndzi lapiyakur, giri kəga maɗa' giri tə giri ata yaɓəlari akəmazi, kamnyar ka giri fəi akwa tsəɗi tə MTHLAKU na Hyelər giri ata hamta ala giri ka tsa ndzi ar giri ba saka madi.

⁴¹Antə Musa ku pwi bərniyayeri makər abwar raghəi ka Thlyagha Jodan,

⁴²natə ma mdə na ku tsi mda karkara, tsa ata mzhi hwi mwari anda, watau kəlara mdə na ku tsi mda kula dawakur akwa daɓwa ɗa. Ma mdə na tsi mdə ni ku hwi ka ləkwa pal akwa nca bərniyayeri ngəni makər ni, tsa ata msər ka mpikari.

⁴³Bərniyayeri ni an Bezer na akwa mtaku akwa tsəɗi garayeri natə tsa an kamnyar mjir nyarmbwar Ruben, ka Ramoth na akwa tsəɗi Gileyad kamnyar mjir nyarmbwar Gad, ka Golan na akwa tsəɗi Bashan kamnyar mjir nyarmbwar Manasse.

⁴⁴Ngəni an tsawa tə Musa hamta aka mjir Israila.

⁴⁵Nayeri ni an tsawayeri, ka suayeri tə mdə thlamta abbər ka mdə hara, tə Musa hamta aka mjir Israila sakatə da səɓəla akwa tsəɗi Masar,

⁴⁶Sakatə da fəli abwar raghəi ka Thlyagha Jodan akwa mular na akwa wuldzi ka Beth Peyor. Hwatu bwa ngəni akira kuthlikur ar Sihon na kuthlir mjir Amor, na hara kuthlikur ahar Heshbon. Sakatə Musa ka mjir Israila akwa səɓəla akwa Masar, da ku səm mjir Amor ngəni akwa mpa.

⁴⁷Da ku dlutsə tsəɗiyir Kuthli Sihon ka tsəɗiyir Kuthli Og na akwa Bashan, kuthlyayeri suɗa na abwa raghəi ka Thlyagha Jodan.

⁴⁸Tsəɗi ngəni baɗita adzə Arower ata mnya Thlyagha Arnon, ka ləbwar Gar Siriyon, watau Gar Hermon,

⁴⁹ka paktə ka bwar Araba na abwa raghəi ka Thlyagha Jodan, har ka pudza aka Manda Araba ata kusar Gar Pisga.