Read bura-pabir Zwarəngkər Shariya 5 Bible Online

Zwarəngkər Shariya 5 - bura-pabir bible

Zwarəngkər Shariya 5

¹Antə Musa ku kəga shanga mjir Israila ka pəla ala ɗa, “Giri na mjir Israila, psi giri thləma giri, ka giri nggatə suayeri tə mdə thlamta ka mdə hara, ka tsawayeri tə I ata psəmnya ɗa ala giri ashina. Antə ka giri thliptə ɗa, ka wuta abbər giri ku ɓəlatə ɗa.

²MTHLAKU na Hyelər mburu ku hara alkawal ka mburu ata Gar Horeb.

³Aɗi ka kəkayeri ar mburu daci wa, amma ka shanga mburu na ka mpika ashina.

⁴Anda akwa u'u na ata kəra gar ni antə MTHLAKU ku gari ala giri nca ka nca.

⁵Ata sakanda I ku thləthlata akwa daɓwa MTHLAKU ka giri, kamnyar kəi pəlaɓəla ala giri ndər tə MTHLAKU pəla ni, kamnyar giri ana thlivər u'u, antə giri aɗi ndləɓəla ata gar ni wa. MTHLAKU pəla,

⁶‘I an MTHLAKU na Hyelər nga, na kəɓəla nga akwa mbwar mafakur akwa tsəɗi Masar.

⁷Ga aɗiya vəngkər səli aka haptayeri wa, tar ali I shira.

⁸Ga aɗiya namtə haptu aka kəra gə wa, wala kəlara su na dludzi ka su na amtazi, wala su na aghəyazi akwa duniya, wala na akwa yimi, wala na akira duniya, ka tsa ndzi haptu wa.

⁹Ga aɗiya zuzuri akəma ɗa wa, wala vəngkər səli ala ɗa wa, kamnyar I an MTHLAKU na Hyelər nga, antə I ata bara hirkur na swakti akəla ga. Antə ma ga ku nggəlar ra, I ata ɗi mjir nyarmbwar nga har ka mwanta akwa zaman na makərkur ka na nfwarkur.

¹⁰Amma ma ga ku hir ra ka ɓəlatə tsawurna, I ata ncantə hirkurərna na ana palidzi wa aka mjir nyarmbwar nga har zamanayeri dəpu dəpu.

¹¹Ga aɗiya kathləma MTHLAKU na Hyelər nga gapangapani wa. Kamnyar MTHLAKU aɗi ata zhar ɗi mdə na ku kathləmari gapani wa.

¹²Ka gə ɓəlatə Vir Ghərəmtaghəra ar sati kara hamta ni swakti ali apatə MTHLAKU na Hyelər nga ku tsawa ala ga.

¹³Vir ngkwa aɗi tə ga ata mzhi hara kəthlər, ka kuri shanga kəthlərayeri ar nga akwa.

¹⁴Amma vir na murfəkur an Vir Ghərəmtaghəra natə mdə ku vəi kamnyar na, I na MTHLAKU na Hyelər nga. Vir nda mda aɗi na ata hara kəthlər wala duku wa. Antə tsawu ngəni ku tsəkwar nga, ka ɓzər nga, ka ngkwar nga, ka buɗar nga, ka ngkwar kutakəyir nga, ka thlar nga, ka kwarar nga, ka kəlara mwaɓi na aviyar ngkiri, har kəga mətəpi na adzə nga, kamnyar ka buɗar nga ka ngkwar kəyir nga ghərəmtaghəra.

¹⁵Ka gə ɗangta abbər gə mafa akwa tsəɗi Masar, antə MTHLAKU na Hyelər nga kəɓəla nga anda ka dunar kuthlikur arni na ola. Antə apani I na MTHLAKU na Hyelər nga akwa tsawa ala ga abbər ka gə ɓəlatə Vir Ghərəmtaghəra ar Sati.

¹⁶Ka gə nar olkur aka baba' nga ka mama' nga, apatə MTHLAKU na Hyelər nga ku tsawa ala ga, kamnyar ka far ngə fəi akwa tsəɗi tə I na MTHLAKU na Hyelər nga akwa na ala gə ni.

¹⁷Ga aɗiya tsi mdə wa.

¹⁸Ga aɗiya ləkə wa.

¹⁹Ga aɗiya həl wa.

²⁰Ga aɗiya hara seɗar thlandər ata kəra ntəwulər ngə wa.

²¹Ga aɗiya bara mwalar ntəwulər ngə wa, tsuwa ga aɗiya nggukə kəyirni, wala fakərni, wala buɗarni, wala ngkwar kəyirni, wala thlar tsuhurni, wala kwararni, wala su madi na ar ntəwulər ngə wa.’ ”

²²Nayeri ni an ndərayeri natə MTHLAKU ku psəmnya ka kuraku aka shanga mjir giri na tsaptədzi adzə gar ni. Tsa gari ni akwa kuta u'u, ka dlamba, ka kuthlə na pələku na hartə kəra gar ni. Tsuwa an kura su tə tsa pəla ata saka nda. Antə tsa rəbutə ɗa ata allo ar pela suɗa, ka na ali.

²³Antə Musa ləkəma ka gari ni abbər, “Ɗangtə giri sakatə giri nggatə kurakari akwa kuthlu ni, sakatə gar ni akwa mba, tə shanga mji na ol'olər nyarmbwayeri ar giri ka mambila mji ol'olər giri ku si adzə ra.

²⁴Antə da pəla, ‘Nggədza MTHLAKU na Hyelər mburu ku ncanta ala yeru səliyirni, ka olkurərni, tsuwa yeru ku nggatə kurakari akwa səɓəla akwa u'u. Ashina yeru ku wuta abbər Hyel ata mzhi gari aka mdə ka tsa ndzi tsu ka mpika.

²⁵Antə kamnyar mi tə yeru ata mtə kulini ri? Kamnyar u'u ngəni ata mbamta yeru. Kamnyar diya ma yeru ku jaktə nggatə kuraka MTHLAKU na Hyelər mburu, yeru ata mta.

²⁶Nənga mda aɗi na ku ɗar nggatə kuraka Hyel na ka mpika akwa gari akwa ɗəffa u'u, apatə yeru nggatə ni, ka jaktə ndzi ka mpikə ri?

²⁷Ar nga, mwari kudzəha, ka gə nggatə shanga su tə MTHLAKU na Hyelər mburu ata pəlari. Aghəla nda ka gə si ka gə pəla ala yeru shanga su tə MTHLAKU pəla ala ga. Ar yeru ka yeru nggata, ka yeru harata.’ ”

²⁸“Antə MTHLAKU ku nggatə sakatə giri akwa gari ali ni, antə tsa pəla ali, ‘I ku nggatə su tə mji ni pəla ala gə ni, tsuwa shanga su tə da pəla ni kalkal.

²⁹Ma abbər da an ka jili ɗəffu ngəni tədəku, tə da ata thlivər ra, ka ɓəlatə shanga tsawayeri arna, sakani shanga su ata mwa ala ɗa lapiya kəga maɗa' ɗa ba saka madi!

³⁰Mwari, ka gə pəla ala ɗa ka shanga ɗa ngka akwa tentər ɗa.

³¹Amma ar nga, ga ata thləthlatə tsu azi adzə ra. Antə I ata pəla ala gə shanga tsawayeri kəga suayeri tə mdə thlamta abbər ka mdə hara, natə ga ata ra thlipa ala ɗa, ka da harata akwa tsəɗi tə I akwa hamta ala ɗa ni.’ ”

³²“Antə apani, ka giri hara hangkal, ka giri hara su kalkal apatə MTHLAKU na Hyelər mburu ku tsawa ala giri. Giri aɗiya pəramta təbwa mazəm, wala təbwa matsəkar wa.

³³Ka giri nu shanga su akwa lakwari kalkal apatə MTHLAKU na Hyelər mburu ku tsawa ala giri, kamnyar ka giri ndzi ka mpika, ka shanga su mwa ala giri kalkal, tsuwa ka far giri fəi akwa tsəɗi tə giri ata ləkwari ka ndzi mthlakari ni.”