Read bura-pabir Zwarəngkər Shariya 6 Bible Online

Zwarəngkər Shariya 6 - bura-pabir bible

Zwarəngkər Shariya 6

¹Nayeri ni an tsawayeri ka suayeri tə mdə thlamta abbər ka mdə hara, natə MTHLAKU na Hyelər giri ku tsawa ali kəi thlipa ala giri, kamnyar ka giri ra harari akwa tsəɗi tə giri akwa fəlɓəla ka ləkwa, ka ndzi mthlakari.

²I ata thlipa ala giri kamnyar ka giri, kəga maɗa' giri, kəga kəkayeri ar giri thlivər ɗəffa MTHLAKU na Hyelər giri akwa shanga ndzəndziyir mpika giri. Tsuwa ka giri ɓəlatə shanga suayeri tə tsa thlamta abbər ka mdə hara ka tsawayeri arni, natə I akwa tsawa ala giri kamnyar ka far giri ndzi saɓəl.

³Antə apani, ka giri psi thləma giri ɓɗaku, giri na mjir Israila, ka giri hara hangkal ka haratə ɗa, kamnyar ka shanga su mwa lapiya ala giri. Apani antə giri ata hara hang akwa tsəɗi na ɓɗaku ka na ata ya su, apatə MTHLAKU na Hyelər kəkayeri ar giri ku kətə alkawalari ala giri.

⁴Nggatə giri, giri na mjir Israila, MTHLAKU an Hyelər mburu, MTHLAKU duku.

⁵Ka gə hir MTHLAKU na Hyelər nga ka ɗəffa gə shang, ka mpika gə shang, ka duna gə shang.

⁶Antə ndərayeri ngəni tə I tsawa ala giri ashina ni ata ndzi akwa ɗəffa giri.

⁷Ka giri wuta abbər surthlipə ngəni ku tamtə ɗəffa maɗa' giri. Ka giri gari ata kəra ɗa tədək sakatə giri andzəndzi avi, ka sakatə giri akwa mwa ata laku, ka sakatə giri apəpəi, ka sakatə giri ku thlata.

⁸Ka giri mbwatə ɗa apa seɗa ata tsiya giri, ka ata murkəma giri apa lamba.

⁹Ka giri rəbutə ɗa ata udzəm nyarmbwayeri ka nyarfayeri ar giri.

¹⁰MTHLAKU na Hyelər giri ku hara alkawal aka kəkayeri ar giri, watau aka Ibrahim, ka Ishaku, ka aka Yakub, abbər tsa ata hamta ala giri tsəɗi tə tsa ata mwantə giri akwa, watau tsəɗi ka bərniyayeri na ol'ola ka ɓɗakɓɗaku, natə aɗi giri an latə wa.

¹¹Tsa ka kəyayeri nghyinghyari ka suayeri na ɓɗakɓɗaku tə aɗi giri an pwi wa, kəga jiɓayeri natə aɗi giri an la wa, kəga fakayeri ar anap ka nfwayeri ar zaitun natə aɗi giri an nci ɗa wa. Ma sakatə giri ku səma ka ndli,

¹²ka giri hara hangkal ta giri afwari ata kəra MTHLAKU na fwaɓəla giri akwa mafakur akwa tsəɗi Masar.

¹³Ka giri thlivər ɗəffa MTHLAKU na Hyelər giri, ka giri hara kəthlər alari. Ka thləmari shini antə giri ata kahyel.

¹⁴Giri aɗiya nu haptu wa, watau kəlara akwa nca haptayeri ar mji na kalaktə giri.

¹⁵Kamnyar MTHLAKU na Hyelər giri na akwa nca giri an Hyel na ana bara hirkur na swakti akəla mda. Ma giri ku nu haptu, ɗəffə bwarbwarkur ar MTHLAKU na Hyelər giri ata thlata ata kəra giri, antə tsa ata shamta giri shang kazhar kəra duniya.

¹⁶Giri aɗiya ngkərtə MTHLAKU na Hyelər giri apatə giri hara ahar Massa wa.

¹⁷Ka giri mbərsa abbər giri ku ɓəlatə shanga tsawayeri arni kəga suayeri tə tsa thlamta abbər ka mdə hara, natə tsa ku hamta ala giri.

¹⁸Antə ka giri hara su na kalkal ka su na ɓɗaku ata nca MTHLAKU, kamnyar ka shanga su mwa lapiya ala giri. Tsuwa apani antə giri ata mzhi ləkwa tsəɗi na ɓɗaku ni ka ndzi mthlakari, tsəɗi tə MTHLAKU hara alkawalər hamtari aka kəkayeri ar giri ni.

¹⁹Tsuwa MTHLAKU ata kədləɓəla dawayeri ar giri akəmata giri amwari, apatə tsa ku hara alkawalari.

²⁰Antə ma sakatə maɗa' giri ku yu giri akəmazi abbər, “Man karapur tsawayeri ngəni kəga suayeri tə ka mdə hara tə MTHLAKU na Hyelər mburu tsawa ala mburu ka mburu nu nə ri?”

²¹Antə ka giri hamta amsari aka maɗa' giri abbər, “Waci yeru mafar kuthlir Masar, antə MTHLAKU fwaɓəla yeru akwa Masar ni ka dunar kuthlikur arni.

²²Ata nca yeru antə MTHLAKU ku hara seɗayeri na ol'ola ka surndatayeri ata kəra mjir Masar, ka kuthli ni, ka shanga kutakəyirni.

²³Antə tsa fwaɓəla yeru anda akwa Masar ka səntə yeru azi akwa tsəɗi tə tsa hara alkawalər hamtari aka kəkayeri ar mburu.

²⁴Apani antə MTHLAKU ku tsawa ala yeru abbər ka yeru ɓəlatə shanga suayeri tə mdə thlamta abbər ka mdə hara ni, ka yeru thlivər ɗəffa MTHLAKU na Hyelər mburu. Antə ma mburu ku hara apani shanga su ata mwa lapiya ala mburu tədəku, tsuwa tsa ata ɓəlatə mpika mburu, apatə mburu akwa wulari ashina.

²⁵Ma mburu ku vədzə hangkala mburu, ka ɓəlatə shanga tsawayeri arni, apatə tsa ku tsawa ala mburu, mburu ata wutə riɓari.”