Read bura-pabir Zwarəngkər Shariya 7 Bible Online

Zwarəngkər Shariya 7 - bura-pabir bible

Zwarəngkər Shariya 7

¹“Ma sakatə MTHLAKU na Hyelər giri ku mwantə giri akwa tsəɗi tə giri akwa ləkwari ka ndzi mthlakari ni, tsa ata kədləɓəla durayeri hang. Akəmata giri amwari, tsa ata kədləɓəla mjir Hitti, ka mjir Girgashi, ka mjir Amor, ka mjir Kanana, ka mjir Perizzi, ka mjir Hivi, ka mjir Yebusi, watau durayeri murfa na ku təramta giri ka duna ka tsuwa ka hangkur.

²Ma sakatə MTHLAKU na Hyelər giri ku hamta durayeri ngəni akwa tsiya giri, tə giri ku nggyari ɗa akwa mpa, ka giri kurəmta ɗa shang. Giri aɗiya mbwi alkawal ka da wa, wala kətadzə ɗa wa.

³Giri aɗiya kəldzi kəga da wa. Giri aɗiya hamta maɗa' giri na maɗankwi aka maɗashilər ɗa ka da kəl wa, wala hir ka maɗa' ɗa na maɗankwi kəl maɗashilər giri wa.

⁴Kamnyar da ata sə shinamta maɗashilər giri ka da zhar nu ra, ka da ləkwa vəngkər səli aka haptayeri arɗa. Antə su ngəni ata vu ka ɗəffə bwarbwarkur ar MTHLAKU thlata ata kəra giri, har ka tsa kurəmta giri təkəma.

⁵Antə nggədza su tə giri ata hara ala ɗa. Giri ata huzamta bagaɗiyayeri ar hamta saɗakar ɗa, ka giri pukthləmta pelayeri ar haptər ɗa, ka tadərəmta haptayeri arɗa na ar Ashera, ka mbagamta shanga haptayeri arɗa akwa u'u.

⁶Kamnyar giri an mji carcara ar MTHLAKU na Hyelər giri. MTHLAKU na Hyelər giri ku carɓəla giri akwa nca shanga mjir duniya, ka giri ndzi mjirni, mji na ka daraja ta shang.”

⁷“MTHLAKU ku hir giri ka carɓəla giri, aɗi abbər kamnyar giri hang ta mji damwa wa, kamnyar giri an raka ta shang akwa nca durayeri.

⁸Amma kamnyar MTHLAKU hir giri, tsuwa tsa akwa bara nghyaɓəla alkawal tə tsa hara aka kəkayeri ar giri, an su na hara tə tsa pəli giri akwa tsəɗi mafakur, akwa tsiya kuthlir Masar, ka fwaɓəla giri ka dunar kuthlikur arni.

⁹Antə apani ka giri sənda abbər MTHLAKU na Hyelər giri an Hyel, Hyel na ka jirkur. Tsa an Hyel na ana kəsi alkawal, ka ncantə hirkurərni na ana palidzə wa har ka mwanta aka zamanayeri dəpu, aka maɗa' mji na hir ni, ka na ana ɓəlatə tsawayeri arni.

¹⁰Amma tsa an Hyel na ana ɗi mji na ku nggəlar ni. Tsa aɗi ana shamta saka kamnyar ntə ɗimikur ata kəra mji na nggəlar ni wa.

¹¹Antə apani, ka giri vədzə hangkala giri aka tsawayeri ngəni ka suayeri tə mdə thlamta abbər ka mdə hara, natə I hamta ala giri ashina ni.”

¹²“Ma giri ata vədzə hangkala giri aka tsawayeri ngəni, ka ɓəlatə ɗa kalkal, MTHLAKU na Hyelər giri ata nghyaɓəla alkawal tə tsa hara ala giri, tsuwa tsa ata ncanta ala giri hirkur arni na ana palidzi wa, natə tsa hara alkawalari aka kəkayeri ar giri.

¹³Tsa ata hir giri ka vədzə barka ala giri, ka jakə hangkur giri. Tsuwa tsa ata vədza barka aka maɗa' giri, ka vədzə barka aka sur fakayeri ar giri, watau aka mthlir giri, ka yimər anap ar giri, ka mal zaitun ar giri. Tsa ata vədzə barka aka ciɓayeri ar giri, watau aka thlayeri ar giri, ka aka təmayeri kəga kwiyir giri. Tsa ata na ala giri shanga barkayeri ngəni akwa tsəɗi tə tsa hara alkawalər hamtari aka kəkayeri ar giri.

¹⁴Giri ata ndzi ka barka təramta shanga durayeri damwa. Mda aɗi ata wutə mdə sal na ndəla, wala mwala ciri akwa nca giri wa. Wala mwaɓi kutakəyir giri aɗi na ata ndzi kula ya wa.

¹⁵Tsuwa MTHLAKU ata tsəlpi giri ta shanga nggawakur. Tsa aɗi ata səntə jili shilkayeri na ɗimi ar mjir Masar natə giri asəndə ni wa, amma tsa ata pungkər ɗa ata kəra mji na ku nggəlar giri.

¹⁶Giri ata kurəmta shanga dur natə MTHLAKU na Hyelər giri ku na ala giri duna ata kəra ɗa. Giri aɗiya kətadzə ɗa wa, wala vəngkər səli aka haptayeri arɗa wa, kamnyar ndaga ata sə ndzi dərku ala giri.”

¹⁷“Nuhum giri ata pəla, ‘Durayeri ngəni ku hara hangta yeru. Antə apa madi tə yeru ata mzhi kədləɓəla ɗa ri?’

¹⁸Giri aɗiya thlivər ɗa wa. Ka giri ɗangtə su tə MTHLAKU na Hyelər giri hara aka kuthlir Masar ka aka shanga mjirni.

¹⁹Ka giri ɗangtə bwaniyayeri na ol'ola tə giri wutə ka nca giri, ka seɗayeri kəga surndatayeri, ka dunar kuthlikur tə MTHLAKU na Hyelər giri hara har ka fwaɓəla giri. Tsu apani antə MTHLAKU na Hyelər giri ata hara aka shanga durayeri tə giri akwa thlivərari ni.

²⁰Ata kəra ngəni ma, MTHLAKU na Hyelər giri ata thlentə su laga na ata pu thlivəra akwa dza ɗa, har tar ma wala mji na hwi ka ra ɗuwardzi ku kurəmtadzi.

²¹Antə giri aɗiya thlivər mji ngəni wa, kamnyar MTHLAKU na Hyelər giri ata vəi duku ka giri, tsuwa tsa an Hyel na ol ka duna, natə mji ana thlivər ni.

²²MTHLAKU na Hyelər giri ata kədləɓəla durayeri ngəni ka hangkal ka hangkal. Giri aɗiya kuri ɗa shang ata saka duku wa, ta mwaɓiyayeri na akwa mtaku asə hara hang ka duna, har ka damitə giri.

²³Amma MTHLAKU na Hyelər giri ata hamta ɗa akwa tsiya giri, tsuwa tsa ata vu ka da ndəndatədzi ka duna, har ka mdə kurəmta ɗa.

²⁴Hyel ata hamta kuthlyayeri arɗa akwa tsiya giri, antə giri ata kurəmta ɗa ka shamta thləma ɗa ata kəra duniya. Mda aɗi na ata mzhi mpa kəga giri wa, har tar ma giri ku kurəmta ɗa shang.

²⁵Ka giri mbamta haptayeri arɗa. Giri aɗiya nggukə adzərfa wala dinar natə mdə nam haptayeri kəgari wa. Giri aɗiya fatə ɗa wa, ta da asə ndzi ala giri apa dərku, kamnyar da an sur cika aka MTHLAKU na Hyelər giri.

²⁶Giri aɗiya səntə sur cika nayeri ni akwa kəyayeri ar giri wa, kamnyar ta giri asə ndzi tsu apa su tə mdə ɗəmhə kamnyar shamtari ni. Giri aɗiya hir shang shang wa. Ka giri cikə ni, kamnyar tsa su tə mdə ɗəmhə kamnyar ka mdə shamta.”