Read bura-pabir Zwarəngkər Shariya 8 Bible Online

Zwarəngkər Shariya 8 - bura-pabir bible

Zwarəngkər Shariya 8

¹Antə Musa ləkəma ka gari akwa pəla, “Ka giri hara hangkal ka giri ɓəlatə shanga tsawayeri tə I hamta ala giri ashina ni, kamnyar ka giri ndzi ka mpika, tsuwa ka hangkur giri jakjaka, ka giri ləkwa tsəɗi tə MTHLAKU ku kahyel ar hamtari aka kəkayeri ar giri, ka giri ndzi mthlakari.

²Ka giri ɗangtə laku tə MTHLAKU na Hyelər giri pwar giri akwa shanga mwar giri akwa mtaku məva nfwarkumari ni, kamnyar ka tsa tərghəi kəra giri ka giri ndzi ka kanaɗi. Tsa ngkərtə giri kamnyar ka tsa nggaɓəla su na akwa ɗəffa giri, wala giri ata ɓəlatə tsawayeri arni, wala giri aɗi ata ɓəlatari wa.

³Tsa tərghəi kəra giri atar zhar giri ka mi. Aghəla nda tsa ndlantə giri ka manna, susəma natə giri kəga kəkayeri ar giri aɗi ɗar wutari wa. Tsa hara ngəni kamnyar ka giri sənda abbər aɗi ka susəma daci antə mda ata ndzi ka mpikə wa, amma atar kəlara ndər tə MTHLAKU pəla.

⁴Akwa məvayeri ngəni nfwarkumari ni ləptər giri aɗi hal wa, tsuwa səla giri aɗi kəthlə wa.

⁵Antə ka giri sənda akwa ɗəffa giri abbər apatə mda ana ɗi ɓzərni, antə MTHLAKU na Hyelər giri ana ɗi giri.

⁶Antə apani ka giri ɓəlatə tsawayeri ar MTHLAKU na Hyelər giri, ka giri nu su tə tsa pəla, ka thlivər ɗəffari.

⁷Kamnyar MTHLAKU na Hyelər giri akwa mwantə giri akwa tsəɗi na ɓɗaku, tsəɗi na ka zərkayeri kəga kucirkilayeri, ka yimi na akwa hwi səɓəla akwa mularayeri kəga ɗəɗəgəlayeri.

⁸Tsa an tsəɗiyir alkama ka barli, ka anap, ka kamnda, ka nfur zaitun ka cirməma.

⁹Tsa an tsəɗi na ka susəma hang, su aɗi tə giri ata turari anda wa. Tsa an tsəɗi tə pelayeri arni ncir liya, tsuwa ata ɗəɗəgəlayeri giri ata mzhi laɓəla liyar nggirkumi.

¹⁰Giri ata səm susəma, ka ndli, ka hu MTHLAKU na Hyelər giri, kamnyar tsəɗi na ɓɗaku tə tsa na ala giri.”

¹¹“Ka giri hara hangkal ta giri asə fwari MTHLAKU na Hyelər giri, atar zhar ta ɓəla tsawayeri arni kəga suayeri tə tsa thlamta abbər kalkal ka mdə hara natə I akwa hamta ala giri ashina.

¹²Ma sakatə giri ku səm susəma ka ndli, ka latə kəyayeri na ɓɗakɓɗaku, ka ndzəndzi akwa,

¹³tsuwa sakatə thlar giri, ka təmar giri, kəga kwiyir giri ku yatədzi ka hara hang, tə adzərfar giri ka dinar ar giri ku hara hang, sakatə shanga su tə giri kəgari ku yatədzi ka hara hang,

¹⁴to, ka giri hara hangkal ta giri asə haptə kəra giri har ka giri fwari ata kəra MTHLAKU na Hyelər giri, na fwaɓəla giri akwa mbwar mafakur akwa tsəɗi Masar.

¹⁵Giri aɗiya fwari laku tə tsa pwar giri akwa mtaku na ola na ata thlivərantə mdə ni wa, mtaku na ul'ulari kula yimi, vəi tə pwapwayeri na mwavər kəga hiɗi akwa. Yimi aɗi wa, amma tsa vu tə yimi ku səɓəla akwa pirakthlya kamnyar giri.

¹⁶Giri aɗiya fwari laku tə Hyelər giri hamta ala giri manna tə giri səma akwa mtaku ni wa, susəma natə kəkayeri ar giri aɗi ɗar wutari wa. Tsa hara ala giri apani kamnyar ka tsa tərghəi kəra giri ka ngkərtə giri, kamnyar akwa kurari ka tsa hara ala giri ɓɗakkur.

¹⁷Tsuwa giri aɗiya pəla akwa ɗəffa giri abbər, ‘Ai I wutə gəna ni ka kəri, ka vəi gərgər arna’ wa.

¹⁸Amma ka giri ɗangtə MTHLAKU na Hyelər giri, kamnyar tsa an hamta ala giri dunar wutə gəna ni. Atar apani antə tsa ata nghyaɓəla alkawal tə tsa hara aka kəkayeri ar giri, apatə giri akwa wulari ashina.

¹⁹Ma giri ku fwari ata kəra MTHLAKU na Hyelər giri, ka nu haptayeri, ka hara mafakur ala ɗa, ka vəngkər səli ala ɗa, to, ashina I akwa tsaktə giri abbər, jirjiri giri ata kurəmtadzi.

²⁰Tsu apa durayeri natə MTHLAKU kurəmta akəma giri, antə mda ata kurəmta giri ma giri aɗi kələngkər aka su tə MTHLAKU pəla wa.”