Read bura-pabir Zwarəngkər Shariya 9 Bible Online

Zwarəngkər Shariya 9 - bura-pabir bible

Zwarəngkər Shariya 9

¹Antə Musa ləkəma ka gari ni akwa pəla, “Psi gir thləm, mjir Israila! Ashina giri ata fəlɓəla Thlyagha Jodan, ka giri ləkwa tsəɗiyir mji na hangta giri, mji na ka duna ta giri, ka giri dlutsə tsəɗiyir ɗa ni. Da ka bərniyayeri na ol'ola na akwa katanggayeri nal nal apa ata tsəkwar hyel.

²Mjir tsəɗi ni gurjam gurjam, tsuwa da saɓəl saɓəl. Da an mjir nyarmbwar Anak natə giri asənda, natə giri ku nggatə labarər ɗa. Ai giri ku nggatə mda ana pəla abbər, ‘Mdər mzhi thləthlatə ka paktə ncari ka mjir nyarmbwar Anak aɗi wa.’

³Amma ashina ka giri sənda abbər MTHLAKU na Hyelər giri, an akwa təramta akəma giri apa u'ur mtaku na ana mbamta shanga su na akəmari. Antə tsa ata nggyari ɗa ka tsa kurəmta ɗa. Antə giri ata mzhi kədləɓəla ɗa ka kurəmta ɗa taktar, apatə MTHLAKU ku hara ala giri alkawalari.”

⁴“Aghəla tə MTHLAKU ar giri ku kədləɓəla ɗa ala giri, giri aɗiya pəla akwa ɗəffa giri abbər kamnyar ɓɗakkur giri antə tsa səntə giri akwa tsəɗi ni kamnyar ka giri ndzi mthlakari ni wa. Awa, aɗi apani wa, amma kamnyar kəmanggarkur durayeri ngəni antə MTHLAKU akwa kədləɓəla ɗa akəma giri.

⁵Aɗi kamnyar ɓɗakkur giri, wala kamnyar jirkur tə giri kəgari antə giri ata ləkwa tsəɗiyir ɗa ka dlutsə ni wa. Amma kamnyar kəmanggarkur ar durayeri ngəni antə MTHLAKU na Hyelər giri akwa kədləɓəla ɗa akəma giri. Kamnyar ka tsa nghyaɓəla su tə tsa kahyel abbər tsa ata harari aka kəkayeri ar giri, watau aka Ibrahim, ka Ishaku, ka tsuwa Yakub.

⁶Antə ka giri sənda, abbər aɗi kamnyar ɓɗakkur giri antə MTHLAKU akwa hamta ala giri tsəɗi ngəni ɓɗaku ni wa, kamnyar giri an mji na ka kər ɓəɓalkur.”

⁷“Ka giri ɗangta. Giri aɗiya fwari laku tə giri ɓzamtə ɗəffa MTHLAKU na Hyelər giri sakatə giri akwa mtaku ni wa. Təng vir tə giri ku səɓəla akwa tsəɗi Masar, har tə giri mzhitə vəi tə giri ata kulini ni, giri akwa hara kər ɓəɓalkur aka MTHLAKU.

⁸Wala ata Gar Horeb ma giri ku thlentə hangkala MTHLAKU, tə ɗəffari ku ɓzi ka duna, har tə apa ka tsa kurəmta giri.

⁹Sakatə I ndləɓəla ata kəra gar ni kamnyar dlu allowayeri ar pela ni, watau allowur alkawal tə MTHLAKU hara ka giri, I ku hara viri nfwarkumari ka pci nfwarkumari ata kəra gar ni, I aɗi səm susəm wa, I aɗi sa yimi wa.

¹⁰Antə MTHLAKU ku hamta ali allowayeri ar pela na suɗə ni, allowayeri natə Hyel surni ku rubwamta shanga ndərayeri tə tsa pəla ala giri ata gar akwa kuta u'u, vir tə giri tsaptədzi ni.

¹¹Akwa tsikəra pcir vir nfwarkumari ka viri ar vir nfwarkumari ni, antə MTHLAKU ku hamta ali allowayeri ar pela na suɗə ni, watau allowayeri ar alkawal ni.”

¹²Antə MTHLAKU pəla ali abbər, “Thlata, ka gə ləghəi taktar, kamnyar mjir nga natə gə səɓəla ka da akwa Masar ni ku ɓzamtə su. Da ku pəramta kasha, kazhar laku natə I tsawa ala ɗa ka da nuwa, ka namtə haptu aka kəra ɗa.”

¹³Antə MTHLAKU jaktə pəla ali abbər, “I ku wulɓəla mji ngəni, ka wuta abbər jiri, da mji na ka kəra ɗa ɓəɓal.

¹⁴Zhar ra kəi ɓdləmta ɗa, kəi shamta thləma ɗa ata kəra duniya. Aghəla nda kəi vəi nga ka gə ndzi dur na ata təramta ɗa ka dunar kuthlikur ka tsuwa hangkur.”

¹⁵“Antə I shinardzi, ka səghəi kazhar gar ni, ka allowayeri ar pela na suɗə ni akwa tsi. I səghəi kazhar gar ni tsu akwa mba ka u'u.

¹⁶Sakatə I ha nci, təng I wuta abbər giri ku hara biku aka MTHLAKU na Hyelər giri, kamnyar giri ku kurtə ka fatəɓəla haptu ar kəna. Giri ku pəramta kasha kazhar laku tə MTHLAKU tsawa ala giri ka giri nuwa.

¹⁷Antə I hapta allowayeri ngəni suɗa akwa tsi ni ka pumta ɗa ata di. I pukthləmta ɗa tsu ata nca giri anda.

¹⁸Antə I pəpəyimta ata di akəma MTHLAKU, mnyar pci nfwarkumari ka viri nfwarkumari, I aɗi səm susəm wa, I aɗi sa yimi wa. I hara apani kamnyar shanga bikayeri tə giri harata, suayeri na ɗimi tə giri hara ata nca MTHLAKU ka ɓzamtə ɗəffari ni.

¹⁹I ku thlivər mwavərkur ɗəffa MTHLAKU na ɓzi ni ka bwarbwarkur ɗəffari ata kəra giri ni, kamnyar ɗəffari ku ɓzi ka duna har tə apa ka tsa kurəmta giri. Amma I ku kiɗə kəra MTHLAKU, antə tsa ku nggatə ra saka nda.

²⁰Ɗəffa MTHLAKU ku ɓzi adzə Haruna ka duna, har apa ka tsa tsi ni, antə I ku hara adduwa tsuwa kamnyar ni tsu ata sakari.

²¹Antə I kətə sur biku tə giri hara ni, watau haptər kəna tə giri namtə ni, ka mbamta ni ka u'u. Aghəla nda antə I pukthləmta ni, ka hadləmta ni kuləpu apa bərbər. Antə I pumta bərbərari ni akwa yimər zərkəu na səɓəla akwa gar.”

²²“Tsuwa giri ku ɓzamtə ɗəffa MTHLAKU sakatə giri ahar Tabera, ka Massa, ka Kibroth Hattaava.

²³Tsuwa sakatə giri ahar Kadesh Barneya, MTHLAKU ku thlentə giri abbər, ‘Ndləɓəla giri, ka giri dlutsə tsəɗi natə I na ala giri ni.’ Amma giri ku nggəlar ta kələngkər aka tsawur MTHLAKU na Hyelər giri. Giri aɗi hamta jiri alari wa, wala kələngkər alari wa.

²⁴Təng sakatə I səndə giri, I ku sənda abbər giri an mjir nggəlar ndərər MTHLAKU.”

²⁵“Antə I pəpəyimta ata di akəma MTHLAKU, mnyar pci nfwarkumari ka viri nfwarkumari, kamnyar MTHLAKU pəla tsa ata kurəmta giri.

²⁶Antə I hara adduwa aka MTHLAKU na ka Duna ta Shang abbər, ‘Ga aɗiya kurəmta mjir ngə ni wa, mjir nga na ndzi apa maɗa' kuta ga, natə ga an mbuli ɗa, ka fwaɓəla ɗa akwa Masar ka dunar kuthlikur ar nga.

²⁷Ɗangtə buɗayeri ar nga, watau Ibrahim, ka Ishaku, ka Yakub. Ga aɗiya damitədzi ka kər ɓəɓalkur ar mji ngəni wa, wala kəmanggarkurər ɗa, wala bikayeri arɗa wa.

²⁸Kamnyar ta mjir tsəɗi tə gə fwaɓəla yeru akwa ni asə pəla abbər, “Ai, kamnyar MTHLAKU aɗi mzhi mwantə ɗa akwa tsəɗi tə tsa hara ala ɗa alkawalari wa, tsuwa kamnyar tə tsa ku nggəlar ɗa, an su na hara tə tsa fwaɓəla ɗa kamnyar ka tsa kurəmta ɗa akwa mtaku ni.”

²⁹Kamnyar da an mjir nga, na ndzi apa maɗa' kuta ga, mji tə gə fwaɓəla ɗa akwa Masar, atar dunar kuthlikur ar nga ka surndatayeri na ol'ola ar tsiya ga.’ ”