Read bura-pabir Yahwana 1 Bible Online

Yahwana 1 - bura-pabir bible

Yahwana 1

¹Təng akwa baɗitari Ndər ni aɗi, tsuwa Ndər ni ata vəi duku ka Hyel, tsuwa Ndər ni an Hyel.

²Təng tsu akwa baɗitari ni Ndər ni ata kəma duku ka Hyel.

³Atar ni antə shanga suayeri namtədzi, shanga su tə Hyel namtə ni, aɗi wala duku na namtədzi kula mnyari akwa wa.

⁴Atar ni antə mpika aɗi, antə mpikə ni an parakə ni aka mji.

⁵Antə parakə ni akwa mbəla akwa kuthlu, amma kuthlu ni aɗi akwa nggyari ni wa.

⁶Mdə laga aɗi ka thləmari Yahwana tə Hyel thlenta.

⁷Tsa si kamnyar ka tsa ngkərɓəla jirkur na ata kəra parakə ni aka mji, kamnyar ka shanga mji nggatə labar ata kəra parakə ni, ka da hamta jiri akari atar ni.

⁸Aɗi tsa ka kərari an parakə ni wa, amma tsa si kamnyar ka tsa hara seɗa ata kəra parakə ni.

⁹Tsa na parakəu na jirari na ata hamta parakəu aka shanga mji ni, an akwa si akwa duniya ni.

¹⁰Təng waci Tsa akwa duniya ni, amma wala tə duniya ni namtədzi atar ni, duniya ni aɗi səndə ni wa.

¹¹Tsa si akwa tsəɗiyirni, amma mjirni aɗi dlu ni wa.

¹²Amma shanga mji na ku dlu ni ka hamta jiri alari, tsa ku na ala ɗa duna ka da ndzi maɗa' Hyel.

¹³Da aɗi ndzi maɗa'ni atar kum ka mamshi na thlata akəla nggukər dza wa, amma Hyel surni an namtə ɗa maɗa'ni.

¹⁴Antə Ndər ni ndzi mda, ka ndzi akwa nca mburu. Mburu ku wutə səliyirni, səliyir Ɓzər na duku shini akəla Təddarni, tsuwa tsa nghyinghyari ka ɓɗakkur ka jirkur tsuwa.

¹⁵Yahwana ku hara seɗa ata kərari, ka haptə kurakari akwa pəla, “Ngəni an mdə tə I gari ala giri ata kərari, abbər ‘Mdə na akwa si aghəli ni ku təramta ra ka olkur, kamnyar tsa aɗi akəmata iya.’ ”

¹⁶Kamnyar atar hangkur ɓɗakkur tə tsa kəgari antə shanga mburu ku wutə barka ata kəra barka ata kər ata kər.

¹⁷Kamnyar Hyel hamta tsawu ni atar Musa, amma tsa hara ala mburu ɓɗakkur ka jirkur atar Yesu Kristi.

¹⁸Mda aɗi na ku ɗar wutə Hyel wa. Ɓzərni na duku shini, na kalkal ka Hyel ni, na akwa humba Təddarni ni, an ngkərɓəla ni ala mburu.

¹⁹Antə nggədza seɗa tə Yahwana hara akwa sakatə mjir Yahudi na ahar Urushalima thlentə pristayeri ka mjir Lawi adzə Yahwana, ka da yu ni abbər tsa an wa ri ni.

²⁰Antə Yahwana aɗi beɗi wa, tsa pəlaɓəla ala ɗa ata bəbal ka pəla, “Aɗi I an Kristi ni wa.”

²¹Antə da jaktə yu ni ka pəla, “Ka ar nga, ga an wa ri? Ga an Iliya ni ya?” Antə tsa pəla, “Awa, aɗi I wa.” “Ka ga an naɓi ni ya?” Antə tsa pəla, “Awa,”

²²Antə da pəla alari, “Ka ar ngə ga an wa ri? Na ala yeru amsa tə yeru ata mwanta aka mji na thlentə yeru ni. Ga ana pəla ga an wa ri?”

²³Antə Yahwana hamta ala ɗa amsa ka ndər tə Naɓi Ishaya pəla waci nda abbər, “I an kuraka mdə na akwa mtaku na akwa kəga, ‘Namtə gir laku dwaɗu aka Mthlaku!’ ”

²⁴Antə bwadukwa mjir Farisi tə mdə thlentə ɗa ni,

²⁵pəla aka Yahwana abbər, “Ka kamnyar mi tə ga akwa hara baptizma, ma ga aɗi an Kristi nə wa, wala Iliya wa, wala Naɓi nə wa ri?”

²⁶Antə Yahwana pəla ala ɗa, “Arna I ana hara baptizma ka yimi. Amma mdə laga aɗi akwa nca giri natə giri aɗi səndə ni wa.

²⁷Tsa akwa si aghəli, natə ɓɗakkurərna aɗi mzhi wala kəi mpəli səwur ɓaɓiyirni wa.”

²⁸Suayeri ngəni hara akwa Bethlani, aɓəla bwanda Thlyagha Jodan, akwa vəi tə Yahwana ana hara baptizma akwa ni.

²⁹Səɓəla ɗəpari təng Yahwana wutə Yesu akwa si adzə ni. Antə tsa pəla, “Nggədza giri Ɓzər Gam ar Hyel, mdə na ata kələmta bikər mjir duniya!

³⁰Ngəni an mdə tə I gari ala giri ata kərari abbər, ‘Mdə na akwa si aghəli ni ku təramta ra ka olkur, kamnyar tsa aɗi akəmata iya,’ ni.

³¹Hwatu I aɗi səndə mdə na ata si nə wa, amma I ku si akwa hara baptizma ka yimi, kamnyar ka mdə ncantə ni aka mjir Israila.”

³²Antə Yahwana ku hara seɗa ka pəla, “I ku wutə Mambəl akwa səghəi amtazi apa bukəl, ka pwa ata kərari.

³³Hwatu I aɗi səndə ni wa, amma Hyel na thlentə ra abbər kəi hara baptizma ka yimi ni an pəla ali abbər, ‘Ma mdə tə ga ku wutə Mambəl ku səghəi amtazi ka pwa ata kərari ka ndzəndzi, an tsa na ata hara baptizma ka Mambəl na Ɓɗakkarkara ni.’

³⁴Apani I ku wutə su ngəni hara ata kəra Yesu, antə I akwa seɗata ala giri abbər ngəni an Ɓzər Hyel ni.”

³⁵Səɓəla ɗəpari Yahwana athləthlata ata vəi ni ka mjirthlipərni suɗa adzə ni.

³⁶Sakatə tsa wutə Yesu akwa təramta antə tsa pəla, “Wul giri Ɓzər Gam ar Hyel!”

³⁷Sakatə mjirthlipər Yahwana na suɗə ni nggatə su tə Yahwana pəla ni, antə da nutə Yesu.

³⁸Sakatə Yesu shinardzi ka wutə ɗa akwa nu ni, antə tsa pəla ala ɗa, “Man tə giri akwa barari ri?” Antə da pəla alari abbər, “Rabbi, karapwari an Maləm, ga ka ndzi ama ri?”

³⁹Antə Yesu pəla ala ɗa, “Sər giri ka giri wuta.” Apa saka nfwar na tahaku, antə da mwari kəga tsa ka wutə vəi ndzəndziyirni. Antə da ɓukci adzə ni vir nda.

⁴⁰Antə Andrawus na ɓzərma' Siman Bitrəs, na pal akwa nca mji na suɗə na nggatə ndər tə Yahwana pəla ni, ku nutə Yesu.

⁴¹Su tə Andrawus hara ntangkəma an tsa paktə ɓzərma'ni Siman, ka pəla alari abbər, “Yeru ku wutə Almasihu ni” karapur ndər ngəni an Kristi.

⁴²Antə tsa mwantə Siman adzə Yesu. Antə Yesu wul ni ka pəla, “Azha ga an Siman na ɓzər Yahwana ni ya? Mda ata sə kəga thləma ga Kefas,” wala tsuwa Bitrəs natə karapwari an pela.

⁴³Səɓəla ɗəpari antə Yesu ɗəmha abbər tsa ata mwari ahar Galili. Antə tsa wutə Filibus, ka pəla alari, “Nu ra.”

⁴⁴Filibus an ɓzər Bethsaida, diyir kəga Andrawus ka Bitrəs.

⁴⁵Antə Filibus wutə Nathlaniyel ka pəla alari abbər, “Yeru ku wutə mdə tə Musa ka naɓiyayeri rəbuta ata kərari akwa kakaɗər Tsawu ni, tsa na Yesu ar Nazareth na ɓzər Yusuf.”

⁴⁶Antə Nathlaniyel pəla alari, “Har mda ata mzhi wutə su na ɓɗaku akwa Nazareth ya?” Antə Filibus pəla alari, “Sər ka gə wuta.”

⁴⁷Sakatə Yesu wutə Nathlaniyel akwa si adzə ni, antə tsa pəla, “Wul giri mdər Israila na jirari ja, na aɗi ana thlandər wa!”

⁴⁸Antə Nathlaniyel yu ni abbər “Apa madi tə gə səndə ra ri?” Antə Yesu pəla alari, “I wutə nga sakatə ga akira nfur kamndə nda, akəmata Filibus akəga nga.”

⁴⁹Antə Nathlaniyel pəla alari, “Maləm, ga an Ɓzər Hyel! Ga an Kuthlir Israila ni!”

⁵⁰Antə Yesu pəla alari, “Kamnyar tə I pəla ala ga abbər, I wutə nga akira nfur kamnda antə gə hamta jiri ali təkəma ni ya? Ai ga ata wutə suayeri na ol'ola ta ngəni.”

⁵¹Antə tsa pəla ala ɗa, “I akwa pəla ala giri jirkur, giri ata sə wutə vəi na amtazi akwa kəlardzi, ka mjirthlentərhyel akwa ləmta ka səghəi ata Ɓzər Mda.”