Read bura-pabir Yahwana 10 Bible Online

Yahwana 10 - bura-pabir bible

Yahwana 10

¹Antə Yesu pəla, “I akwa pəla ala giri jirkur, kəlara mdə na aɗi səkwa ciɓər təma ni atar nyarmbwa wa, amma tsa fəlwa ata vəi damwa, tsa an mdər həla ka mdər thla laku.

²Amma kəlara mdə na ata səkwa ciɓə ni atar nyarmbwa, tsa an mdər ɓəla təmayeri ni.

³Antə mdər gadi nyarmbwa ni ata kəlar alari nyarmbwa ni. Tsuwa təmayeri ana nggaɓəla kurakari, antə tsa ana kəgaɓəla təmayeri arni ka thləma ɗa, ka mwantə ɗa aɓəla.

⁴Ma sakatə tsa ku mwantə ɗa aɓəla, tsa ata pwa akəma ɗa, antə təmayeri ata nu ni, kamnyar da asəndə kurakari.

⁵Da aɗi ana nu mətəpi wa, tar ka da hwi ni, kamnyar da asəndə kuraka mətəpi wa.”

⁶Ngəni an karapu tə Yesu pəla ala ɗa, amma da aɗi nggaɓəla su tə tsa akwa pəlari ni wa.

⁷Antə Yesu jaktə pəla ala ɗa, “I akwa pəla ala giri jirkur, I an nyarmbwar təma ni.

⁸Shanga mji na si akəmata iya da an mjir həla ka mjir thla laku, antə təmayeri ni aɗi psi thləm ala ɗa wa.

⁹I an nyarmbwa ni. Antə kəlara mda na ata səkwa ciɓə ni atar na, tsa ata wutə mbantədzi. Antə tsa ata ləmbwa ka ləɓəla, ka wutə vəi ɓəla na ɓɗaku.

¹⁰Həla ana si kamnyar ka tsa həla, ka tsa tsi, ka tsa hilantə su daci. Arna I si kamnyar ka da wutə mpikə na jirari na ka daraja.

¹¹“I an mdər ɓəla na ɓɗaku. Mdər ɓəla na ɓɗaku ana hamta mpikari kamnyar təmayeri ni.

¹²Amma mdər kəthlər kamnyar watsəɓa, mdə na aɗi mdər ɓəla wa, natə təmayeri arni aɗi ar kərari wa, ma tsa wutə mwaɓəlu akwa si, tsa ata hwi ka zhar təmayeri ni. Antə mwaɓəlu ni ata ngkəi pal, ka titiləmta bwadukwa ɗa.

¹³Mdə ni hwi kamnyar tə tsa akwa kəthlər kamnyar watsəɓa, antə su aɗi damitə ata kəra təmayeri nə wa.

¹⁴I an mdər ɓəla na ɓɗaku. I asəndə təmayeri na arna, tsuwa da asəndə ra,

¹⁵tsu apatə Təddarna ku səndə ra, antə I ku səndə Tədda ni. Tsuwa I ku hir kəi mta kamnyar təma ni.

¹⁶I ka təmayeri damwa na aɗi akwa ciɓə ngəni wa, antə tar kəi səntə ɗa tsuwa, ka da sə psi thləm ali. Antə da ata sə ndzi ciɓa duku, ka mdər ɓəla duku.

¹⁷“An su na hara tə Tədda ana hir ra ni, kamnyar I akwa hamta mpikəi, kəi sə jaktə kəta.

¹⁸Kamnyar mdər mzhi dlutsə mpikəi aɗi wa, amma I an ata hamtari ka hirər ɗəffi. I ka duna kəi hamta ni, tsuwa I ka duna kəi jaktə kəta. Ngəni an su tə Təddarna tsawa ali abbər kəi hara.”

¹⁹Ata kəra gari ngəni tə Yesu pəla ni, antə mjir Yahudi jaktə ndəkəmtadzi ata kəra dzamər ɗa.

²⁰Mji hang akwa nca ɗa pəla, “Tsa ka shatan, antə tsa ka cicu, kamnyar mi tə giri akwa psi thləm alari ri?”

²¹Amma mji bwaduku pəla, “Mdə na ka shatan amzhi gari apani wa! Nənga shatan ata mzhi kəlar nca mdlyang ri?”

²²Ngəni an sakar tsaptədzər Kucalər Ɗangtə Hamta Mbwar Vəngkər Səli aka Hyel akwa Urushalima tə mda ana hara sakar shambar.

²³Sakatə Yesu akwa mwa akwa galahər Solaman,

²⁴antə mjir Yahudi kalaktə ni ka pəla alari, “Nawa antə ga ata hara ka yeru ndzi kula nuhum ata kəra gə ri? Ma ga an Kristi ni, pəlaɓəla ala yeru ata bəbal.”

²⁵Antə Yesu pəla ala ɗa, “I ku pəla ala giri, amma giri aɗi akwa hamta jiri wa. Tsuwa kəthlərayeri tə I akwa harari akwa thləma Təddarna ni akwa hamta seɗa ata kəri.

²⁶Amma giri aɗi akwa hamta jiri wa, kamnyar giri aɗi təmarna wa.

²⁷Təmayeri arna ana nggatə kurakəi, tsuwa I asəndə ɗa, antə da ana nu ra.

²⁸I ana na ala ɗa mpikə na akur wa, antə ba saka madi da aɗi ata sha wa, tsuwa mda aɗi na amzhi dlutsə ɗa akwa tsi wa.

²⁹Kamnyar Təddarna na hamta ɗa ali ni an olta shang, antə mda aɗi na amzhi dlutsə ɗa akwa tsiya Təddarna ni wa.

³⁰Tsuwa Iya ka Tədda ni, yeru duku.”

³¹Antə mjir Yahudi jaktə fatə pela ka damwa abbər ka da ndzəndzəhtə ni.

³²Amma Yesu shinau ala ɗa ka pəla, “I ku hara kəthlərayeri hang na ɓɗakɓɗaku akəma giri, kəthlərayeri na thlata akəla Təddarna. Kamnyar na madi akwa nca ɗa ni antə giri akwa bara ndzəndzəh ra nə ri?”

³³Antə mjir Yahudi pəla alari, “Aɗi kamnyar kəthlər na ɓɗaku antə yeru akwa bara ndzəndzəh ngə ni wa, amma kamnyar mnyar ruta tə ga akwa harari ata kəra Hyel ni. Kamnyar gə mdə ndzang, amma ga akwa bara namtə kər nga apa gə Hyel!”

³⁴Antə Yesu shinau ala ɗa ka pəla, “Mda aɗi rəbuta akwa Tsawur giri abbər, ‘I pəla giri an hyelayeri’ wa ya?

³⁵Tsuwa giri ku sənda abbər mda amzhi shari su tə mdə rəbuta akwa kakaɗər Hyel wa. Antə ma Hyel akwa pəla aka mji na akwa ngga ndərərni abbər da hyelayeri,

³⁶kamnyar mi tə giri akwa pəla aka mdə Tədda an carɓəla ni ka thlentə ni akwa duniya, abbər tsa akwa rutə Hyel ri? Kamnyar tə I pəla, ‘I an Ɓzər Hyel’ ni ya?

³⁷Ma I an aɗi akwa hara kəthlərayeri Təddarna ana hara wa, giri aɗiya hamta jiri ali wa,

³⁸amma I ata hara kəthlərayeri tə Təddarna ana hara. Antə wala giri an ata hamta jiri ali wa, ai kalkal ka giri hamta jiri aka kəthlərayeri tə I akwa harari ni, kamnyar ka giri səndə ka nggaɓəla abbər Tədda akwa iya, tsuwa I akwa Tədda.”

³⁹Da jaktə ngkərtə ngka ni ka damwa, amma tsa msər akwa tsiya ɗa.

⁴⁰Antə Yesu jaktə mwari aɓəla bwanda Thlyagha Jodan, ata vəi tə Yahwana hara baptizma aka mji akwa ntangkəma ni, ka ndzəndzi anda.

⁴¹Antə mji hang si adzə ni ka pəla, “Yahwana aɗi hara surndatayeri wa, amma shanga su tə Yahwana pəla ata kəra mdə ngəni ni an jiri.”

⁴²Antə mji hang ku hamta jiri alari anda.