Read bura-pabir Yahwana 11 Bible Online

Yahwana 11 - bura-pabir bible

Yahwana 11

¹Mdə laga aɗi ka thləmari Lezəru, na hara nggawa. Tsa akwa ndzi ata kəma duku kəga maɗama'ni Maryamu ka Marthla akwa di laga ka thləmari Bethlani.

²Tsuwa ngəni an Maryamu na kəkərtə səla Mthlaku ka mal shiwura na msəra, ka fwavumta səlari ka shishir kərari ni. Tsa antə ɓzərma'ni Lezəru hara nggawa ni.

³Antə maɗama'ni na maɗankwi ni thlentə ndər aka Yesu abbər, “Mthlaku, mdə tə gə hir ni ni nggawa diya.”

⁴Sakatə Yesu nggata ndər ni, antə tsa pəla, “Ngəni aɗi shilkər mtə wa, amma kamnyar ka mdə nar səli aka Hyel, ka Ɓzər Hyel wutə səli atar su ngəni tsuwa.”

⁵Tsuwa Yesu hirhir hir Marthla, ka ngkwarma'ni, ka Lezəru ni.

⁶Antə sakatə tsa nggatə abbər Lezəru aɗi lapiya wa ni, tsa jaktə hara vir suɗa akwa vəi tə tsa akwa ni.

⁷Aghəla nda antə tsa pəla aka mjirthlipərni, “Mbura jaktə ngka ahar Yahudiya.”

⁸Antə mjirthlipərni pəla alari, “Maləm, tsu akwa virayeri ngəni antə mjir Yahudi na anda bara ka da ndzəndzəhtə nga, amma ga an ata jaktə bara mwari anda?”

⁹Antə Yesu pəla, “Aɗi awur kumnya suɗa an akwa pci pal wa ya? Kəlara mdə na akwa mwa təpci, tsa aɗi ata tsamta səlari wa, kamnyar tsa akwa wul parakər duniya ni.

¹⁰Amma kəlara mdə na akwa mwa aviri, tsa ata tsamta səlari, kamnyar tsa aɗi ka parakəu wa.”

¹¹Aghəla tə tsa kuri gari ngəni, antə tsa pəla ala ɗa, “Pazhir mburu Lezəru akwa heni, amma I ata ra thlentə ni akwa heni ni.”

¹²Antə mjirthlipərni pəla alari, “Mthlaku, ma tsa akwa heni, ai tsa ata hara hərku.”

¹³Yesu akwa gari ata kəra mtər Lezəru, amma mjirthlipərni kəta abbər tsa akwa gari ata kəra heni kamnyar ghərəmtaghəra.

¹⁴Antə Yesu pəlaɓəla ala ɗa ata bəbal abbər, “Lezəru ku mti!

¹⁵Antə I ka kucali kamnyar giri, təng tə I aɗi anda wa, kamnyar ka giri mzhi hamta jiri. Amma mbura təra mwari adzə ni.”

¹⁶Antə Thlomas natə mda ana kəga ni abbər Buli ni, pəla aka mjir thlipə nvwani, “Mbura mwari kəga Maləm ni, ka mburu mta ata kəma duku kəga tsa.”

¹⁷Sakatə Yesu mzhitə vəi ni, antə tsa nggata abbər Lezəru ku kurtə hara vir nfwar akwa kul ni.

¹⁸Bethlani ni kudzəhə ka Urushalima, daɓwa ɗa aɗi kuri mzhi kilomita makər wa.

¹⁹Tsuwa mjir Yahudi hang ku si adzə Marthla ka Maryamu kamnyar shiktə ɗa akwa mtər ɓzərma' ɗa ni.

²⁰Sakatə Marthla nggata abbər Yesu akwa si ni, antə tsa mwari ra thlakəmari, amma ar Maryamu tsa tsu avi.

²¹Antə Marthla pəla aka Yesu, “Mthlaku, ma abbər ga an azi, sakani ɓzərma'na aɗi ata mtə wa.

²²Wala kulini ma, I ku sənda abbər kəlara su tə ga ku kiɗa akəla Hyel, tsa ata na gə suari.”

²³Antə Yesu pəla alari, “Ɓzərma' nga ata jaktə thlatə ka damwa.”

²⁴Antə Marthla pəla, “I, I ku sənda abbər tsa ata sə jaktə thlata akwa sakatə mji akwa thlata akwa sakar kurər duniya.”

²⁵Antə Yesu pəla alari, “I andər thlentə mji akwa mtəmta ka na ɗa mpikə ni. Kəlara mdə na ku hamta jiri ali, wala ma tsa ku mti, tsa ata jaktə ndzi ka mpika.

²⁶Tsuwa kəlara mdə na ka mpika, na ku hamta jiri ali, tsa aɗi ata mtə pət wa. Ga ku hamta jiri aka gari ngəni ya?”

²⁷Antə Marthla pəla, “I, Mthlaku, I ku hamta jiri abbər gan Kristi na Ɓzər Hyel ni, tsa na ata si akwa duniya ni.”

²⁸Aghəla tə Marthla ku pəla ndər ngəni, antə tsa jaktə ngka avi ka kəgamta ngkwarma'ni, Maryamu, akwa pəla alari abbər, “Maləm azi diya, tsuwa tsa akwa bara wutə nga.”

²⁹Sakatə Maryamu nggatə ndər ni, antə tsa thlatə taktar ka mwari adzə ni.

³⁰Yesu aɗi si akwa kuta di katagu wa, amma tsa tsu akwa vəi tə da kəɓa ka Marthla ata ni.

³¹Sakatə mjir Yahudi na adzə Marthla akwa shiktə ni wutə Maryamu thlatə taktar akwa ləɓəla ni, antə da nutə ni. Kamnyar da kəta abbər tsa akwa ra tuwa ata kula.

³²Amma sakatə Maryamu mzhitə vəi tə Yesu ata ka wutə ni, antə tsa zuzuri akəmari, akwa pəla, “Mthlaku, ma abbər ga an azi, sakani ɓzərma'na ni aɗi mtə wa.”

³³Sakatə Yesu wutə ni akwa tuwa ni, ka mjir Yahudi na si kəga tsa akwa tuwa ni, antə su ni tsəkwar ɗəffari ka duna, tə tsa damitədzi akwa ɗəffari ka duna,

³⁴ka pəla, “Giri harəmta ni ama ri?” Antə da pəla alari, “Mthlaku, Sər kara wuli!”

³⁵Antə Yesu ku pumta shimwi.

³⁶Antə mjir Yahudi pəla, “Wul giri laku tə tsa hir ni akwa!”

³⁷Amma mji laga akwa nca ɗa pəla, “Tsa ku kəlar nca mdlyang, ka man hara tə tsa aɗi ngkatə mdə ngəni ta mtə wa ri?”

³⁸Antə Yesu jaktə ləkwa damitədzi akwa ɗəffari, ka təra mwari adzə kul ni. Kul ngəni an gular pela tə mdə hartə mnyari ka pela.

³⁹Antə tsa pəla, “Kələmta giri pela ni.” Amma Marthla, na ngkwarma' mshi ni pəla alari, “Mthlaku, akwa saka ngəni diya tsa ata shiwura, kamnyar tsa ku hara vir nfwar akwa kul ni.”

⁴⁰Antə Yesu pəla alari, “I aɗi pəla ala gə wa ya abbər, ma ga an hamta jiri ga ata si wutə səliyir Hyel?”

⁴¹Antə da ku kələmta pela ni. Antə Yesu haptə ncari amta ka pəla, “Tədda, I akwa usar nga, kamnyar tə ga ku psi thləm ali.

⁴²I asənda abbər ga ana psi thləm ali tədəku, amma I pəla apani ni kamnyar mji na athləthlata azi ni, kamnyar ka da hamta jiri abbər ga an thlentə ra.”

⁴³Sakatə tsa kuri pəla ndər ngəni, antə tsa haptə kurakari ka pəla, “Lezəru, səɓəla!”

⁴⁴Antə mdə na mtə ni səɓəla, ka tsiyari kəga səlari barbarari ka ləptər hara, ka kəmari mbwimbwiyari ka zhaɓi. Antə Yesu pəla ala ɗa, “Mpəli giri ni, ka giri psi ni ka tsa təra.”

⁴⁵Antə mjir Yahudi na hang na si ata kəma duku ka Maryamu ni, ku wutə su tə Yesu hara ni ka hamta jiri alari.

⁴⁶Amma mji laga akwa nca ɗa ku mwari adzə mjir Farisi ka jikata ala ɗa su tə Yesu hara ni.

⁴⁷Antə pristayeri na ol'ola kəga mjir Farisi tsaptə mjir majalisa ka yu nvwadzi abbər, “Man tə ka mburu hara ri? Kamnyar diya mdə ngəni akwa hara surndatayeri hang!

⁴⁸Ma mburu zhar ni ka tsa ləkəma apani, shanga mji ata sə hamta jiri alari, antə mjir Rom ata sə si ka ndlamta mbwar vəngkər səliyir mburu ni japu ka dlutsə tsəɗiyir mburu ni.”

⁴⁹Amma pal akwa nca ɗa na ka thləmari Kayafas, na an prist na ola akwa məva ndaga, pəla ala ɗa, “Giri asəndə su wala raka wa!

⁵⁰Giri aɗi sənda abbər ku təramta ala giri ka mdə pal an mta ata vəya mji, ta ka shanga mjir tsəɗi ni an kurəmtadzi wa ya?”

⁵¹Tsa aɗi pəla gari ngəni abbər kamnyar kərari wa, amma kamnyar tə tsa an prist na ola akwa məva na ndaga, tsuwa tsa ku kurtə hara naɓikur abbər Yesu ata sə mta kamnyar mjir Yahudi.

⁵²Tsuwa aɗi kamnyar mjir Yahudi daci wa, amma kamnyar ka tsa tsaptə shanga mjir Hyel na titiləmtadzi akwa kəlara bwa, ka da ndzi su duku.

⁵³Apani tsu vir nda antə da ɗəmha laku tə da ata sə tsi Yesu akwa.

⁵⁴Apani Yesu aɗi jaktə mwa akwa nca mjir Yahudi ata bəbal kəra wa, amma tsa təra mwari akwa tsəɗi laga kudzəhə ka mtaku, ka ndzi akwa di laga tə mda ana pəla Ifrayim. Anda antə da ndzəndzi kəga mjirthlipərni.

⁵⁵Sakatə sakar Kucalər Fəlɓəla Kəi ar mjir Yahudi ni ku hara kudzəha, antə mji hang thlata akwa diyayeri na raka raka ka mwari ahar Urushalima kamnyar kəcimta kərɗa akwabə vir Kucalər Fəlɓəla Kəi ni ahara.

⁵⁶Antə da ləkwa pakə Yesu sakatə da athləthlata akwa mbwar vəngkər səli, akwa pəla aka nvwa ɗa abbər, “Man dzamər giri ri? Giri tamatə tsa ata si akwa kucali ni?”

⁵⁷Antə pristayeri na ol'ola kəga mjir Farisi ni tsawa abbər kəlara mdə na ku wutə vəi tə Yesu ata, ka tsa pəla ala ɗa, kamnyar ka da ra ngkəi ni.