Read bura-pabir Yahwana 14 Bible Online

Yahwana 14 - bura-pabir bible

Yahwana 14

¹“Giri aɗiya damitədzi wa. Ka giri mbərsa ka Hyel, ka giri mbərsa ka iya tsuwa.

²Akwa kəyir Təddarna kutambwayeri aɗi hang, ma an apani wa sakani I ku pəla ala giri abbər I ata mwari ra namta ala giri vəi ndzəndzi.

³Aghəla tə I ku mwari ka namtə vəi ndzəndzi ala giri, antə I ata jaktə si kəi fatə giri ka mwantə giri akwa vəi tə I ata, kamnyar vəi tə I ata, ka giri ndzəndzi anda tsuwa.

⁴Ai giri asəndə lakur vəi tə I ata mwari ata ni.”

⁵Antə Thlomas pəla alari, “Mthlaku, yeru aɗi səndə vəi tə ga akwa mwari akwa wa, apa madi tə yeru ata səndə lakwari ri?”

⁶Antə Yesu pəla alari, “I an laku ni, ka jirkur ni, ka mpikə ni. Mda aɗi na ata si mzhi mwari adzə Tədda kula tsa si təbwar na wa.

⁷Ma giri an səndə ra, sakani giri ata səndə Təddarna tsuwa. Amma baɗitə ka kulini giri ku səndə ni, ka wutə ni tsuwa.”

⁸Antə Filibus pəla alari, “Mthlaku, ncanta ala yeru Tədda ni, an kura su tə yeru akwa barari kulini.”

⁹Antə Yesu pəla alari, “Filibus, I ku fəi adzə giri ka duna, amma har ba kulini ga asəndə ra wa? Ai kəlara mdə na ku wutə ra, tsa ku wutə Tədda ni. Ka apa madi tsuwa tə ga ata pəla, ‘Ncanta ala yeru Tədda nə ri?’

¹⁰Ga aɗi hamta jiri abbər I akwa Tədda, tsuwa Tədda akwa iya wa ya? Ndərayeri tə I ana pəla ala giri ni, I aɗi ana pəla ka dunar kəri wa, amma Tədda na akwa iya an akwa hara kəthlərərni.

¹¹Ka giri hamta jiri ali abbər I akwa Tədda, tsuwa Tədda akwa iya, wala kamnyar surndatayeri tə I akwa harari ni.

¹²I akwa pəla ala giri jirkur, kəlara mdə na akwa hamta jiri ali, tsa ata hara kəthlərayeri tə I akwa harari ni, Har ma tsa ata hara kəthlərayeri na ku təramta nayeri ni ka olkur, kamnyar I akwa mwari adzə Tədda ni.

¹³Kəlara su tə giri ku kiɗa akwa thləmi, I ata hara suari, kamnyar ka mdə haptə səliyir Tədda atar Ɓzər ni.

¹⁴Kəlara su tə giri ku kiɗa akwa thləmi, I ata hara suari.”

¹⁵“Ma giri ku hir ra, giri ata ɓəlatə tsawayeri arna.

¹⁶Antə I ata kiɗa akəla Tədda, antə tsa ata hamta ala giri Mdər Dlara damwa, na ata ndzi adzə giri har ba saka madi.

¹⁷Tsa an Mambəl na ka Jirkur, natə mjir duniya amzhi dlu ni akwa ɗəffa ɗa wa, kamnyar da aɗi ata wutə ni wala səndə ni wa. Amma ar giri, giri asəndə ni, kamnyar tsa andzəndzi adzə giri, antə tsa ata ndzəndzi akwa ɗəffa giri tsuwa.

¹⁸“I aɗi ata zhar giri apa mutayeri wa, I ata si adzə giri.

¹⁹Aghəla saka laga raka, mjir duniya ni aɗi ata wutə ra kəra wa, amma ar giri, giri ata wutə ra. Kamnyar tə I ka mpika, giri ata ndzi ka mpikə tsuwa.

²⁰Vir nda, antə giri ata sə sənda abbər I akwa Təddarna, antə giri akwa iya, tsuwa I akwa giri.

²¹“Kəlara mdə na ku səndə tsawayeri arna, tsuwa tsa akwa ɓəlatə ɗa, tsa an mdə na akwa hir ra ni. Tsuwa kəlara mdə na akwa hir ra, Təddarna ata hir ni tsuwa, antə I ata hir ni tsuwa, kəi ncaɓəla kərna alari.”

²²Antə Yahuda pəla alari, amma aɗi Yahuda Iskariyoti ni wa, abbər, “Mthlaku, man hara tə ga ata ncaɓəla kər nga ala yeru, amma aɗi aka duniya wa nə ri?”

²³Antə Yesu pəla alari, “Kəlara mdə na ku hir ra, tsa ata hara su tə I pəla alari, antə Təddarna ata hir ni, antə yeru ata si adzə ni ka yeru namtə kəyir yeru akwa tsa.

²⁴Kəlara mdə na aɗi akwa hir ra wa, tsa aɗi hara su tə I pəla alari wa. Tsuwa ndərayeri tə giri akwa nggari ni aɗi arna wa, amma ar Tədda na thlentə ra ni.

²⁵“I akwa pəla ala giri shanga suayeri ngəni sakatə I tsu adzə giri.

²⁶Amma Mdər Dlara natə tsa an Mambəl na Ɓɗakkarkara, natə Tədda ata thlentari akwa thləmi ni, tsa ata thlipa ala giri shanga su, ka tsa ɗangtə ala giri shanga suayeri tə I ku pəla ala giri.

²⁷“I ata hara ka giri ndzi ka kucali akwa ɗəffa giri. Jili kucali tə I kəgari akwa ɗəffi ni antə I ata hara ka giri ndzi kəgari. Aɗi akwa laku tə duniya ana hamta antə I akwa hamta ala giri nə wa. Giri aɗiya damitədzi wa, tsuwa giri aɗiya thlivər wa.

²⁸Giri ku nggatə ra akwa pəla ala giri abbər, ‘I ata təra, kəi jaktə ngka adzə giri.’ Antə ma giri an hir ra jiri, sakani giri ata hara kucali, kamnyar I akwa mwari adzə Tədda. Kamnyar Tədda ku təramta ra ka olkur.

²⁹Antə kulini I ku kurtə pəla ala giri təng akəmata sakari ahara, kamnyar ma sakatə su ni ku hara ka giri hamta jiri.

³⁰I aɗi ata jaktə gari ala giri hang kəra wa, kamnyar mdə na ka kuthlikur ata kəra duniya ngəni akwa si, amma tsa aɗi ka duna ata kəri wa.

³¹I akwa hara su kalkal apatə Tədda ku pəla ali, kamnyar ka duniya sənda abbər I hir Tədda. Thlatə giri, ka mburu təra kazhar vəi ngəni.”