Read bura-pabir Yahwana 18 Bible Online

Yahwana 18 - bura-pabir bible

Yahwana 18

¹Sakatə Yesu ku kuri adduwa ngəni, antə da ləɓəla kəga mjirthlipərni, ka mwari aɓəla bwanda Mular Kidron. Anda fakə laga aɗi, antə Yesu ka mjirthlipərni ləkwa fakə ni.

²Tsuwa Yahuda na ɓəli ni ni ku səndə vəi ni, kamnyar Yesu ku kəɗar kəɓa anda kəga mjirthlipərni.

³Antə Yahuda fatə sojayeri laga, ka mji laga na ol'ola akwa nca pristayeri, ka mjir Farisi, ka mwari kəga da akwa fakə ni, ka pitəlayeri, ka zafayeri, ka kari ar mpa, akwa tsiya ɗa.

⁴Tsuwa Yesu ku səndə shanga su na ata wutə ni, antə tsa mwari akəma ɗa, ka pəla, “Wa an tə giri akwa barari ri?”

⁵Antə da pəla alari, “Yesu na mdər Nazareth.” Antə Yesu pəla ala ɗa, “I an tsa,” Tsuwa Yahuda na ɓəli ni, athləthlata adzə ɗa.

⁶Sakatə Yesu ku pəla ala ɗa abbər, “I an tsa,” ni, antə sojayeri ni ngka ka bwahili ka ndla ata di.

⁷Antə Yesu jaktə yu ɗa abbər, “Wa an tə giri akwa barari ri?” Antə da pəla, “Yesu na mdər Nazareth.”

⁸Antə Yesu shinau ka pəla, “Ai I ku pəla ala giri abbər I an tsa. Antə ma iya antə giri akwa barari ni, ka giri zhar mji nayeri ni ka da təra.”

⁹Tsa pəla apani ni kamnyar ka tsa nghyaɓəla ndər tə tsa pəla nda abbər, “Tədda, akwa nca mji tə gə hamta ali ni, I aɗi shamta mdə wala duku wa.”

¹⁰Antə Siman Bitrəs na ka katsakar akwa tsiyari ni, ntsuɓəla katsakarərni ni ka nthlə mafar Prist na ol ni kəgari, ka nthləmta thləmari na abwa mazəm. Thləma mafa ngəni an Malkus.

¹¹Antə Yesu pəla aka Bitrəs, “Jaktə hau katsakarər ngə ni akwa kəyari. Ga akwa wula apa I aɗi ɗəmhədzər ɗar bwani akwa laku tə Təddarna ɗəmha ali akwa nə wa ya?”

¹²Antə sojayeri ni, ka olər ɗa, ka mjir Yahudi na ol'ola ku ngkəi Yesu ka mbwamta ni.

¹³Antə da mwantə ni ntangkəma aka Annas, kamnyar tsa an baba' mwalar Kayafas. Tsuwa Kayafas ni an prist na ola akwa məva nda.

¹⁴Kayafas an hamta sauri aka mjir Yahudi na ol'ol ni abbər kuji ka mdə pal an mta ata vəya mji ni.

¹⁵Antə Siman Bitrəs ka mdərthlipə damwa ku nutə Yesu. Ar mdərthlipə na dukwari ni prist na ol ni asəndə ni karkar, antə tsa nutə Yesu tə da ləkwa kutakəyir prist na ol ni.

¹⁶Amma ar Bitrəs tsa thləthlata aɓəla nyarfu. Antə mdərthlipə natə prist na ola asəndə ni, jaktə ləɓəla ka gari aka ɓzərngkwa na akwa gadi nyarfu ni, antə tsa səkwa ka Bitrəs.

¹⁷Antə ngkwa na akwa gadi nyarfu ni pəla aka Bitrəs abbər, “Amma, ga aɗi pal akwa nca mjirthlipər mdə ngəni wa?” Antə Bitrəs pəla, “Awa, aɗi I wa.”

¹⁸Tsuwa vəi mtathlaku, antə buɗayeri ka mjir gadi na ol'ola ni mbahə u'u ka vina, ka thləthlata akwa thlirari. Antə Bitrəs mwari ka thləthlata adzə ɗa akwa thlirari tsuwa.

¹⁹Antə prist na ol ni yu Yesu ata kəra mjirthlipərni ka su tə tsa ana thlipa.

²⁰Antə Yesu pəla alari, “Ai I ku pəla aka mji ata bəbal, tsuwa tədəku I akwa thlipa akwa mbwar vəngkər səli kəga akwa kuta bəbalər mbwar vəngkər səli, ata vəi tə shanga mjir Yahudi ana tsaptədzi akwa. Su aɗi tə I pəla akwa ɗuwar wa.

²¹Ka kamnyar mi tə ga akwa yu ra ri? Yu mji na ku nggatə ra ata kəra su tə I pəla ala ɗa ni. Da səndə su tə I pəla.”

²²Sakatə Yesu pəla gari ngəni, antə pal akwa nca mjir gadi na athləthlata anda ni tsa Yesu ka tsiyari, ka pəla, “An laku tə ga ata shinau aka prist na ol akwa ya?”

²³Antə Yesu pəla alari, “Ma I ku pəla su laga na ɗimi, təng ga ata pəla suari kəi sənda. Amma ma su tə I pəla ni kalkal, to, kamnyar mi tə gə tsa ra nə ri?”

²⁴Antə Annas thlentə ni aka Kayafas na prist na ol ni, tsu ka tsiyari mbwambwari ni.

²⁵Sakatə Siman Bitrəs athləthlata akwa thlir u'u ni, antə mdə laga pəla alari, “Amma, ga aɗi pal akwa nca mjirthlipər mdə ngəni wa?” Antə Bitrəs beɗəmta ka pəla, “Awa, aɗi I wa.”

²⁶Antə pal akwa nca mjir kəthlər aka prist na ol ni, yangkura mdə tə Bitrəs nthləmta thləmari ni, pəla aka Bitrəs abbər, “I aɗi wutə nga adzə ni akwa fakə ni wa?”

²⁷Antə Bitrəs jaktə beɗəmta. Təng təkəma fugəm tuwa.

²⁸Tsu ɗəɗəpə mbing antə da kəɓəla Yesu akwa kəyir Kayafas ka mwantə ni akwa kəyir gwamna. Amma mjir Yahudi aɗi ləkwa kutakəyir gwamna nə wa, ta da ahilantə ɓɗakkurər ɗa akəma Hyel, tə da aɗi ata mzhi səm susəmər Kucalər Fəlɓəla Kəi nə wa.

²⁹Antə Bilatus mwari adzə ɗa aɓəla ka yu abbər, “Man tə mdə ngəni ɓzamta tə giri burkatə ni nə ri?”

³⁰Antə da pəla alari, “Ma mdə ngəni aɗi mdər hara ɗimikur wa, ai yeru aɗi ata səntə ni ala gə wa.”

³¹Antə Bilatus pəla ala ɗa, “Kətə giri ni, ka giri hara alari shariya apatə tsawur giri thlamta.” Antə mjir Yahudi pəla alari, “Yeru aɗi ka dunar kuthlikur ar tsi mdə wa.”

³²Ngəni an kamnyar nghyaɓəla ndər tə Yesu pəla ni na akwa ncantə jili mtə na ata sə wutə ni.

³³Antə Bilatus jaktə ngka akwa vəi ɓukcirni, ka kəga Yesu, ka yu ni abbər, “Ga an kuthlir mjir Yahudi ni ya?”

³⁴Antə Yesu shinau ka pəla, “Sur yu ngəni thlata akəla gə nənga mji damwa an gari ala gə ata kəri ri?”

³⁵Antə Bilatus pəla, “I mdər Yahudi ya? Mjir nga kəga pristayeri na ol'ola an hamta nga ali. Man tə gə hara ri?”

³⁶Antə Yesu shinau ka pəla, “Kuthlikurərna aɗi ar duniya ngəni wa. Ma kuthlikurərna an ar duniya ngəni, sakani mjir nu ra ata mpa kamnyar ta mda ahamta ra aka mjir Yahudi, amma kuthlikurərna aɗi ar duniya ngəni wa.”

³⁷Antə Bilatus pəla, “Azha gə kuthli ya?” Antə Yesu shinau ka pəla, “Ga an akwa pəla I kuthli ni. Kamnyar jiri, an su na hara tə mdə yaɓəla ra ni, tsuwa an su na səntə ra akwa duniya ni, kəi pəla su ata kəra jirkur. Tsuwa kəlara mdə na hir jirkur, tsa ana psi thləm ali.”

³⁸Antə Bilatus yu ni abbər, “Man jirkur nə ri?” Aghəla tə Bilatus yu ni ni, antə tsa jaktə ləɓəla adzə mjir Yahudi ni, ka pəla ala ɗa, “I aɗi wutə biku adzə ni wa.

³⁹Amma ku ndzi surharar giri abbər kəi psi ala giri mdə pal akwa pərsəna akwa kəlara sakar Kucalər Fəlɓəla Kəi. Apani, giri akwa bara kəi psi ala giri kuthlir mjir Yahudi ni ya?”

⁴⁰Antə da jaktə haptə kuraku akwa pəla, “Awa, aɗi mdə ngəni wa! Psi ala yeru Barabbas!” Nggədza ye Barabbas ni mdər thla laku.