Read bura-pabir Yahwana 19 Bible Online

Yahwana 19 - bura-pabir bible

Yahwana 19

¹Antə Bilatus vu tə mdə dlaɓu Yesu ka kwandeng.

²Antə sojayeri namtə dzakwar kuthlikur ka mtəhəra, ka tsangkər aka kərari, ka hadza alari ləptu lipəla.

³Antə da ləkwa si adzə ni ata kər ata kər, akwa tsa ni ka mandaɓa, ka pəla, “Bundi, kuthlir mjir Yahudi!”

⁴Antə Bilatus jaktə ləɓəla ka pəla aka mjir Yahudi ni abbər, “Nggədza I akwa səntə ni aɓəla ala giri, kamnyar ka giri sənda abbər I aɗi wutə biku adzə ni wa.”

⁵Antə Yesu səɓəla, ka dzakwar kuthlikur ar mtəhəra ata kərari, ka ləptu lipəla. Antə Bilatus pəla ala ɗa, “Nggədza giri mdə ni!”

⁶Sakatə pristayeri na ol'ola kəga mji na ol'olər sək kəra mbwar vəngkər səli ni wutə ni, antə da haptə kuraku ka pəla, “Kukwamta ni! Kukwamta ni!” Amma Bilatus pəla ala ɗa, “Kətə gir ni ka kəra giri, ka giri ra kukwamta ni! Kamnyar arna I aɗi wutə ni ka biku wa.”

⁷Antə mjir Yahudi shinau ka pəla, “Ai yeru ka tsawa, tsuwa ma mda ata nu su tə tsawu ni pəla, ata ndzi dwali ka tsa mta, kamnyar tsa ku namtə kərni abbər tsa Ɓzər Hyel.”

⁸Sakatə Bilatus nggatə gari ngəni, antə tsa ləkwa thlivər ka duna.

⁹Antə tsa jaktə ngka akwa mbwar ɓukci, ka yu Yesu abbər, “Gə thlata ama ri?” Amma Yesu aɗi hamta alari amsa wa.

¹⁰Antə Bilatus pəla alari, “Ga andər ali wa ya? Ga aɗi sənda abbər I ka dunar msərantə nga, ka dunar kukwamta ngə wa ya?”

¹¹Antə Yesu shinau alari ka pəla, “Ma Hyel an hamta ala gə dunar harari wa, su aɗi tə ga ata mzhi hara ali wa. Antə mdə na hamta ra ala gə ni an ka biku na olari.”

¹²Sakatə Bilatus nggata gari ngəni, antə tsa ləkwa bara lakur msərantə Yesu, amma mjir Yahudi haptə kuraku ka pəla, “Ma ga ku msərantə ni, ga aɗi pazhir Kaisar wa. Kamnyar kəlara mdə na ku namtə kərni kuthli, tsa akwa hara dawakur ka Kaisar.”

¹³Sakatə Bilatus nggatə ndərayeri ngəni, antə tsa səɓəla ka Yesu, ka ndzəndzi ata kəra dəkələr hara shariya, akwa vəi laga tə mda ana pəla Vəi Tə Mdə Ɓutə ka Pela, amma akwa mnyar mjir Yahudi mda ana pəla Gabbathla.

¹⁴Vir nda an Vir Ɗəmhədzi kamnyar Kucalər Fəlɓəla Kəi, abaka kərathlər pci. Antə Bilatus pəla aka mjir Yahudi ni, “Nggədza giri kuthlir giri!”

¹⁵Amma mjir Yahudi ni haptə kuraku akwa pəla, “Təra giri ka tsa! Təra giri ka tsa! Kukwamta ni!” Antə Bilatus pəla, “Kəi kukwamta ala giri kuthlir giri ya?” Antə pristayeri na ol'ol ni shinau ka pəla, “Yeru aɗi ka kuthli damwa wa tar Kaisar.”

¹⁶Antə Bilatus hamta ala ɗa Yesu ka da ra kukwamta ni.

¹⁷Antə sojayeri ni təra ka Yesu, ka ləɓəla ka tsa, ka udzəm kadləkadlə ni ata wulyari, har tə da si akwa Vəi Kugwar Kər. Mda ana kəga vəi ngəni abbər Golgothla akwa mnyar mjir Ibrani.

¹⁸Anda antə da kukwamta ni, ka kukwamta mji damwa suɗa adzə ni, pal abwa mazəmari, ka pal abwa matsəkarari, ka Yesu ata ɗəffu.

¹⁹Antə Bilatus ku rəbutə ndər laga ka mbuta ata udzəm kadləkadlə ni abwa kərari. Su tə tsa rəbutə ni an, “YESU AR NAZARETH, KUTHLIR MJIR YAHUDI.”

²⁰Mjir Yahudi hang ku karatə su tə tsa rəbutə ni, kamnyar vəi tə da ku kukwamta Yesu ata ni an kudzəhə ka bərni. Tsuwa mdə rəbutə ndər ni akwa mnyar mjir Yahudi, ka mnyar mjir Rom, ka mnyar mjir Helleni.

²¹Antə pristayeri na ol'ola ar mjir Yahudi pəla aka Bilatus abbər, “Ga aɗiya rəbuta abbər, ‘Kuthlir mjir Yahudi’ wa, amma ka gə rəbuta abbər, ‘Mdə ngəni pəla tsa an kuthlir mjir Yahudi ni.’ ”

²²Amma Bilatus shinau ka pəla, “Su tə I ku kurtə rəbuta, I ku rəbuta.”

²³Aghəla sakatə sojayeri ku kukwamta Yesu, antə da fatə ləptərni ka ndəkəi ka bwa nfwar, tə kəlara mda akwa nca sojayeri ni kətə bwa pal. Su na mbil an ləptərni na saɓəlari. Amma mdə tsatə ləptu ngəni swakti kula vəi paktari, baɗita ata kirari har ka ləmta akwa kərari kula nduɓwa.

²⁴Antə sojayeri ni ku pəla aka nvwa ɗa abbər, “Mburu aɗiya thləhuwa ləptə ngəni wa, mburu andzəh kuriya ata kər, ka mburu wutə mdə na ata kətari.” Ngəni an kamnyar nghyaɓəla su tə mdə rəbuta akwa kakaɗər Hyel abbər, “Da ku ndəkəi ləptayeri arna akwa daɓwa ɗa, ka ndzəh kuriya ata kəra ləptərna.” Tsuwa an su tə sojayeri hara ni.

²⁵Tsuwa mji na thləthlata kudzəha ka udzəm kadləkadla ar Yesu ni, an mama' Yesu ka Maryamu na mwalar Klopas, na ngkwarma mama'ni, ka Maryamu Magdalin.

²⁶Amma sakatə Yesu wutə mama'ni ka mdərthlipə natə tsa hirhir ni ni athləthlata kudzəha, antə tsa pəla aka mama'ni, “Mwala, nggədza ɓzər nga!”

²⁷Antə tsa pəla aka mdərthlipə ni abbər, “Nggədza mama' nga!” Tsu ata saka nda antə mdərthlipə ngəni ni mwantə mwala ni aharngkiɗa.

²⁸Yesu ku sənda abbər shanga su ku kurtə ka kuri, amma kamnyar ka tsa nghyaɓəla su tə kakaɗər Hyel pəla, antə tsa pəla, “Thləli akwa kəta ra.”

²⁹Tsuwa tughum laga aɗi anda nghyinghyari ka yimər anap na mumwasu. Antə da hau soso laga akwa yimi na mumwasu ni, ka hata ata zwalər izob, ka hapta amta adzə mnya Yesu.

³⁰Sakatə Yesu ku dlu yimi mumwasu ni antə tsa pəla, “Ku kuri.” Antə tsa nggyarghəi kərari, tə ɗəffari ku ləɓəla.

³¹Təng tə vir ngəni an Vir Ɗəmhədzi, tsuwa mda aɗiya bara ka mshi ni ndzi tsu ata udzəm kadləkadlə ni akwa Vir ghərəmtaghəra wa, təng tə Vir Ghərəmtaghəra ni vir na ola. Antə mjir Yahudi na ol'ola kiɗə kəra Bilatus abbər ka mdə ɓəgəli səla ɗa ka da mtə taktar, ka mdə kəlghəi mshiyir ɗa.

³²Antə sojayeri ni mwari ka ɓəgəli səla mdə na ntangkəma ni, ka mdə na dukwari tə mdə ku kukwamta ɗa kəga Yesu ni.

³³Amma sakatə da si adzə Yesu, da wuta abbər tsa ku kurtə mti, antə da aɗi ɓəl səlari wa.

³⁴Amma pal akwa nca sojayeri ni ntsəvəmta ni ka mwasu akwa thlimbəlari, təng təkəma mamshi ka yimi ku səɓəla.

³⁵Mdə na wutə su ngəni akwa hara ni an ngkər gari ngəni ni, tsuwa shanga su tə tsa pəla ni an jiri. Tsuwa ka kərari ku sənda abbər tsa akwa pəla jirkur, kamnyar wala giri ma ka giri hamta jiri.

³⁶Suayeri ngəni ku hara apani kamnyar ka kakaɗər Hyel nghyaɓəladzi abbər, “Mda aɗi ata ɓəli ɗethlərni wala duku wa.”

³⁷Akwa vəi damwa kakaɗər Hyel ku pəla tsuwa abbər, “Mji ata sə wul mdə natə da ku ntsəvəmta ni.”

³⁸Aghəla ngəni, antə Yusuf na mdər Arimathliya, na ku ndzi mdərthlipər Yesu, mwari adzə Bilatus, amma akwa ɗuwari kamnyar thlivər mjir Yahudi, ka kiɗə ni abbər ka mdə zhar ni ka tsa kətə mshiyir Yesu. Antə Bilatus ku nar laku. Antə tsa mwari ka kəli mshiyir Yesu ata udzəm kadləkadlə ni.

³⁹Tsuwa Nikodemus na ɗar si adzə Yesu aviri nda, si tsuwa ka mur gwargwarari ka alowayeri, natə kəgəɓkurari ku mwanta apa kilogram makkumari.

⁴⁰Antə da kətə mshiyir Yesu, ka pərtə ni akwa zhaɓər lilin, ka pu sur shiwura na msəra akwa zhaɓə ni, apatə mjir Yahudi ana har mshiyir ɗa hwatu.

⁴¹Akwa vəi tə mdə kukwamta Yesu ni, fakə laga aɗi, tsuwa akwa fakə ni kul laga aɗi natə mda aɗi ɗar har mda akwa wa.

⁴²Apani kamnyar Vir Ɗəmhədzi na ar mjir Yahudi, tsuwa təng tə kul ni kudzəha, antə da harəmta Yesu anda.