Read bura-pabir Yahwana 2 Bible Online

Yahwana 2 - bura-pabir bible

Yahwana 2

¹Akwa vir na makərkur, antə kəldzi laga hara ahar Kana na akwa Galili. Tsuwa mama' Yesu anda akwa vəi kəldzi ni.

²Tsuwa mdə ku bara Yesu kəga mjirthlipərni ka da si akwa vəi kəldzi ni.

³Sakatə yimər anap ku kuri, antə mama' Yesu pəla alari, “Da aɗi ka yimər anap kəra wa.”

⁴Antə Yesu pəla alari, “Aiyi mwala, ngəni aɗi damitədzərna wa. Sakarna aɗi hara katagu wa.”

⁵Antə mama' Yesu pəla aka buɗayeri ni, “Ka giri hara kəlara su tə tsa ku pəla ala giri.”

⁶Mdə ku pwi gəlamayeri ngkwa tə mdə nam ka pela, kamnyar pu yimər kəcimtadzi apatə mjir Yahudi ana hara hwatu. Kəlara gəlam ana kəsi yimi apa galan sərkumari ka mwanta aka makkumari.

⁷Antə Yesu pəla aka mjir kəthlər ni, “Nghyantə giri gəlamayeri ni ka yimi.” Antə da nghyantə ɗa pakcaku.

⁸Antə tsa pəla ala ɗa, “Kulini kətsə giri, ka giri mwanta aka mdə na ola ata kəra vəi kəldzi ni.” Antə da kətsə ka mwanta alari.

⁹Sakatə mdə na ola ata kəra vəi kəldzi ɗar yimi ni, təng tsa nggatə yimi ni ku ndzi yimər anap. Amma tsa aɗi səndə vəi tə yimi ni thlata akwa wa, wala tə mjir kəthlər na kəi yimi ni ku sənda. Antə mdə na ata kəra vəi kəldzi ni kəga sala mwala ni,

¹⁰ka pəla alari abbər, “Hwatu, mda ana haɓəla yimər anap na msərari ntangkəma, antə ma sakatə mji ku sa ka mzhi ɗa, tsa ata səntə yimər anap na mumwasari! Amma ar nga ntangkəma gə ɗuwamta na msərari ni, tar kulini antə gə səɓəla kəgari!”

¹¹Ngəni an surndatə na ntangkəma tə Yesu hara, tsuwa tsa hara surndatə ngəni ahar Kana na akwa Galili, vəi tə tsa baɗitə ncaɓəla səliyirni. Antə mjirthlipərni ku hamta jiri alari.

¹²Aghəla ngəni, antə Yesu, ka mama'ni, ka maɗama'ni, ka mjirthlipərni, mwari ahar Kafarnahum, ka ɗarndzi anda mnyar vir yiɗauwa.

¹³Sakatə Kucalər Fəlɓəla Kəi ar mjir Yahudi abaka hara kudzəha, antə Yesu mwari ahar Urushalima.

¹⁴Sakatə tsa mwari akwa kuta bəbalər mbwar vəngkər səli antə tsa wutə mji akwa ɗəl thla, kəga təma, kəga kataparayeri, kəga mjir canji kwaba akwa ləkəma ka fəliyir ɗa.

¹⁵Antə tsa namtə kwandeng laga ka səwa, ka kədləɓəla ɗa shang purəm kəga təma kəga thla, kazhar kuta bəbalər mbwar vəngkər səli ni. Tsuwa tsa ku shinamta tebərayeri ar mjir canji kwaba ni, ka titiləmta kwabar ɗa.

¹⁶Antə tsa pəla aka mji na akwa ɗəl katapar ni abbər, “Famta giri suayeri ngəni! Giri aɗiya namtə kəyir Təddarna apa kasəku wa.”

¹⁷Antə mjirthlipərni ɗangtə su tə mdə rəbuta akwa kakaɗu abbər, “Mwaɓərna abwar mbwar nga ata mba ra akwa ɗəffi apa u'u.”

¹⁸Antə mjir Yahudi na ol'ola yu ni abbər, “Surndatə madi tə ga ata harari kamnyar ncanta ala yeru abbər Hyel ku na gə dunar hara su apani ri?”

¹⁹Antə Yesu pəla ala ɗa, “Huzamta giri mbwar vəngkər səli ngəni, antə I ata jaktə həntə ni akwa kutar vir makər.”

²⁰Antə mjir Yahudi pəla alari, “Mdə hara məva nfwarkumari ka ngkwa akwa hən mbwar vəngkər səli ngəni, antə ar ngə ga ata həntari akwa kutar vir makər daci?”

²¹Amma mbwar vəngkər səli natə Yesu gari ata kər ni an dzari.

²²Sakatə Yesu ku thlata akwa mtəmta antə mjirthlipərni ɗangta abbər tsa ku pəla su apani. Antə da ku hamta jiri aka su tə mdə ku rəbuta akwa kakaɗər Hyel ka gari tə Yesu pəla ni.

²³Sakatə Yesu ahar Urushalima akwa sakar Kucalər Fəlɓəla Kəi, antə mji hang ku hamta jiri alari sakatə da wutə surndatayeri tə tsa hara ni.

²⁴Amma Yesu aɗi mbərsa ka da wa, kamnyar tsa asəndə shanga mji karkar.

²⁵Antə tsa aɗi akwa tur ka mdə ngkər alari su ata kəra mdə wa, kamnyar tsa asəndə su na akwa ɗəffa mda.