Read bura-pabir Yahwana 20 Bible Online

Yahwana 20 - bura-pabir bible

Yahwana 20

¹Ɗəɗəpə mbing ar vir na ntangkəma akwa sati, antə Maryamu Magdalin mwari adzə kul ni sakatə kuthlu tsu aɗi, ka wuta abbər mdə ku mbwaləmta pela na ata mnya kul ni.

²Antə tsa hwi ka mwari adzə Siman Bitrəs ka mdərthlipə natə Yesu hir ni ni, ka pəla ala ɗa, “Da ku kəɓəla Mthlaku akwa kula, tsuwa yeru aɗi səndə vəi tə da vəi ni ata wa!”

³Antə Bitrəs ka mdərthlipə na dukwari səɓəla ka baɗitə mwari adzə kul ni.

⁴Japwa ɗa putə hwi, amma mdərthlipə na dukwari ni dlu kəma akəla Bitrəs, ka mzhitə kul ni ntangkəma.

⁵Antə tsa nggyarghəidzi ka wulhə kuta kul ni, ka wutə yadər lilin ni apwi ni, amma tsa aɗi ləkwa kul ni wa.

⁶Antə Siman Bitrəs si aghəla ri, ka ləkwa kul ni, ka wutə zhaɓər lilin ni apwi.

⁷Tsuwa tsa ku wutə zhaɓi tə mdə pungkər aka kərari ni apwi pərpərari akwa vəi laga shini.

⁸Antə mdərthlipə na dukwari, na mzhitə kul ni ntangkəma ni, ləkwa kul ni tsuwa. Antə tsa wutə tsuwa ka hamta jiri.

⁹Amma har ba kulini da aɗi nggaɓəla ndər na akwa kakaɗər Hyel na pəla abbər dwali ka Yesu thlata akwa mtəmtə nə wa.

¹⁰Antə mjirthlipə nayeri ni jaktə ngka aviyar ɗa.

¹¹Amma Maryamu ku thləthlata aɓəla adzə kul ni akwa tuwa. Sakatə tsa akwa tuwa ni, antə tsa nggyarghəidzi akwa wul kuta kul ni.

¹²Antə tsa wutə mjirthlentərhyel laga suɗa ka ləptu mwapmwapu, andzəndzi akwa vəi tə mdə peri mshiyir Yesu ata ni, pal abwa kərari ka palari abwa səlari.

¹³Antə da yu ni abbər, “Mwala, kamnyar mi tə ga akwa tuwa ri?” Antə mwala ni pəla ala ɗa, “Kamnyar da ku kətə Mthlakərna ka təra kəgari, tsuwa I aɗi səndə vəi tə da vəi ni ata wa!”

¹⁴Tsa akwa kuri gari ngəni, ka shinardzi, təng tsa wutə Yesu athləthlata. Amma tsa aɗi sənda abbər tsa an Yesu nə wa.

¹⁵Antə Yesu pəla alari, “Mwala, kamnyar mi tə ga akwa tuwa ri? Wa an tə ga akwa barari ri?” Mwala ni kəta abbər tsa an mthlakər fakə ni, antə tsa pəla alari, “Zanuwa, ma ga an kətə ni, pəla ali vəi tə gə vəi ni ata, kəi ra kətə ni.”

¹⁶Antə Yesu pəla alari, “Maryamu!” Antə tsa shinardzi abwar ni ka pəla alari akwa mnyar mjir Yahudi abbər, “Rabboni!” Karapwari an “Maləm.”

¹⁷Antə Yesu pəla alari, “Ga aɗiya tsəkwar ra wa, kamnyar I aɗi ləmtazi adzə Tədda katagu wa. Amma mwari adzə maɗama'na ka gə pəla ala ɗa, I akwa ləmtazi adzə Təddarna ka Təddar giri, adzə Hyelərna ka Hyelər giri.”

¹⁸Antə Maryamu Magdalin mwari ka pəla aka mjirthlipərni abbər tsa ku wutə Mthlaku, ka pəla ala ɗa shanga su tə Yesu pəla alari.

¹⁹Tsu vir nda tahaku, vir na ntangkəma akwa sati ni, antə mjirthlipərni tsaptədzi ata kəma duku, ka hartə nyarmbwa kamnyar da akwa thlivər mjir Yahudi na ol'ola ni. Antə Yesu si ka thləthlata akwa nca ɗa ka pəla, “Ka msərakur ndzi adzə giri.”

²⁰Aghəla tə tsa pəla ndər ngəni, antə tsa ku ncanta ala ɗa tsiyari ka thlimbəlari. Antə mjirthlipərni ku hara kucali kamnyar wutə Mthlaku ni.

²¹Antə Yesu jaktə pəla ala ɗa, “Ka msərakur ndzi adzə giri. Apatə Tədda ku thlentə ra, antə I akwa thlentə giri.”

²²Aghəla tə tsa pəla ndər ngəni, antə tsa fyarar ɗa, ka pəla ala ɗa, “Dlu giri Mambəl na Ɓɗakkarkara ni.

²³Kəlara mdə tə giri ku tifəmta alari bikərni, bikərni ku tifəmtadzi alari. Kəlara mdə natə giri aɗi tifəmta alari bikərni wa, bikərni aɗi tifəmtadzi wa.”

²⁴Amma pal akwa nca mjirthlipərni na kumnya suɗa na ka thləmari Thlomas, tə mda ana kəga ni abbər Ɓuli ni, aɗi adzə ɗa sakatə Yesu si nə wa.

²⁵Antə bwadukwa mjirthlipə ni pəla alari, “Yeru ku wutə Mthlaku.” Amma Thlomas pəla ala ɗa, “Ma I aɗi wutə manjivarər kusayeri na ata tsiyari ni, ka tsəkwar manjivar ni ka kulengi, ka hau tsi akwa thlimbəlari wa, I aɗi ata hamta jiri wa.”

²⁶Aghəla vir ncisu, antə mjirthlipərni jaktə tsaptədzi ambwa nda, tsuwa Thlomas akwa nca ɗa. Wala tə nyarmbwayeri shang harharari, Yesu ku səmbwa ka thləthlata akwa nca ɗa, ka pəla, “Ka msərakur ndzi adzə giri.”

²⁷Antə tsa pəla aka Thlomas, “Tsəkwar vəi ngəni ka kulenga ga, ka gə wulhə tsi ni. Ha tsiya ga, ka gə hau akwa thlimbəli. Ga aɗiya ndzi mdə na kula hamta jiri wa, amma ka gə hamta jiri.”

²⁸Antə Thlomas shinau alari ka pəla, “Mthlakərna, ka Hyelər na!”

²⁹Amma Yesu pəla alari, “Kamnyar tə gə wutə ra antə gə hamta jiri ni ya? Da ka barka mji na aɗi wutə ra wa amma da ku hamta jiri.”

³⁰Yesu ku hara surndatayeri hang damwa ata nca mjirthlipərni, natə mda aɗi rəbuta akwa kakaɗə ngəni wa.

³¹Amma mdə rəbutə nayeri ni kamnyar ka giri hamta jiri abbər Yesu an Kristi, Ɓzər Hyel. Antə atar hamta jiri ni giri ata wutə mpika akwa thləmari.