Read bura-pabir Yahwana 21 Bible Online

Yahwana 21 - bura-pabir bible

Yahwana 21

¹Aghəla ngəni antə Yesu jaktə ncantə kərni aka mjirthlipərni ata mnya Mandar Tiberiya. Tsuwa nggədza laku tə tsa ncantə kərni ala ɗa akwa ni.

²Saka nda Siman Bitrəs, ka Thlomas natə mda ana kəga ni Ɓuli ni, ka Nathlaniyel na thlata ahar Kana akwa Galili, ka maɗa' Zabadi, ka mjirthlipərni damwa suɗa, shang ata vəi duku.

³Antə Siman Bitrəs pəla ala ɗa, “I ata təra mwari akwa tamwa.” Antə da pəla alari, “Mburu ata mwari kəga ga.” Antə da ləɓəla, ka ləkwa shar, amma vir nda da aɗi ngkəi su wa.

⁴Amma sakatə viri akwa kura, təng da wutə Yesu athləthlata adzə ɗa ata wuyakər mnya yimi ni. Amma mjirthlipərni aɗi nggaɓəla abbər tsa an Yesu nə wa.

⁵Antə Yesu pəla ala ɗa, “Maɗadakwi, giri ka kəlfa ya?” Antə da shinau alari ka pəla, “Awa.”

⁶Antə tsa pəla ala ɗa, “Ndzəh giri banggamar giri ni abwa mazəma shar ni, antə giri ata wutari.” Antə da ndzəh banggama ni apatə tsa pəla ni, ka ngkəi kəlfa hang har tə da amzhi ndəkərɓəla banggamar ngka kəlfa ni ka shinaɓəla akwa shar nə wa.

⁷Antə mdərthlipə natə Yesu hir ni ni pəla aka Bitrəs abbər, “Ngəni Mthlaku diya!” Sakatə Siman Bitrəs nggata abbər ngəni Mthlaku ni, antə tsa hatə ləptərni, kamnyar hwatu tsa fəi ləptu ni kamnyar kəthlər ni, antə tsa fəlwa yimi ni.

⁸Amma mambila mjirthlipə na akwa shar ni ləkwa ndəkər banggama na nghyinghyari ka kəlfa ni, akwa mwantari ata wuyakər mnya yimi, kamnyar da aɗi ciju ta mnya yimi ni wa, daɓwa ɗa apa yadə aru pal daci.

⁹Sakatə da ku səɓəla ata mnya yimi ni, antə da wutə u'ur vina laga ka kəlfa ata, ka buradi adza.

¹⁰Antə Yesu pəla ala ɗa, “Səntə giri bwadukwa kəlfa natə giri haɗa ngkəyari ni.”

¹¹Antə Siman Bitrəs ləkwa shar ni ka ndəkərɓəla banggama ni ka sənta ata mnya yimi. Tsuwa banggama ni nghyinghyari ka kəlfayeri na ol'ola aru pal ka ntəfkumari ka makər, amma wala tə da hang apani, banggama ni aɗi thləhu wa.

¹²Antə Yesu pəla ala ɗa, “Asər giri, ka giri səm susəma.” Amma wala mdə duku aɗi akwa nca mjirthlipərni na nggitə yu ni abbər tsa an wa ri wa. Kamnyar da sənda abbər tsa an Mthlaku.

¹³Antə Yesu si ka kətə buradi ni, ka hamta ala ɗa, ka hamta ala ɗa kəlfa ni tsuwa.

¹⁴Ngəni an saka na makərkurari tə Yesu ncantə kərni aka mjirthlipərni, aghəla tə tsa thlata akwa mtəmta.

¹⁵Sakatə da ku kuri səm susəmər ɗəɗəpa, antə Yesu pəla aka Siman Bitrəs abbər, “Siman ɓzər Yahwana, gə hir ra təramta mji nayeri ni ya?” Antə Bitrəs pəla alari, “I, Mthlaku, ai ga sənda abbər I hir nga.” Antə Yesu pəla alari, “Ma apani, ka gə nar susəma aka maɗa təmar na.”

¹⁶Antə Yesu jaktə pəla alari na suɗkur, “Siman ɓzər Yahwana, gə hir ra ya?” Antə Bitrəs pəla alari, “I, Mthlaku, ai ga sənda abbər I hir nga.” Antə Yesu pəla alari, “Ma apani, ka gə ɓəla təmarna.”

¹⁷Antə Yesu pəla alari na makərkur, “Siman ɓzər Yahwana, gə hir ra ya?” Antə ɗəffa Bitrəs ɓzə kamnyar tə Yesu yu ni har na makərkur abbər, “Gə hir ra ya?” Antə tsa pəla alari, “Mthlaku, ai ga səndə shanga su, ga asənda abbər I hir nga.” Yesu pəla alari, “Ma apani, ka gə nar susəma aka təmarna.

¹⁸I akwa pəla ala gə jirkur, sakatə gə ɓzərdakwi, ga ana hatə kariyir nga gə sur nga, ka mwari akwa vəi tə gə hira. Amma ma sakatə ga ku hali, ga ata sə ndərar tsiya ga, ka mdə damwa an hata ala gə kari, ka mwantə nga akwa vəi tə kəra ga aɗi hir wa.”

¹⁹Yesu pəla ngəni, kamnyar ka tsa ncantə jili mtə na ata sə wutə Bitrəs kamnyar haptə səliyir Hyel. Aghəla ngəni antə Yesu pəla aka Bitrəs, “Nu ra.”

²⁰Antə Bitrəs ku shinardzi, ka wutə mdərthlipə natə Yesu hirhir ni ni akwa nu ɗa. Tsa an ndzəndzi kudzəhə ka Yesu akwa sakar səm susəmər tahaku, ka yu ni abbər, “Mthlaku, wa an akwa bara ɓəli ngə nə ri?”

²¹Sakatə Bitrəs wutə ni, antə tsa pəla aka Yesu, “Mthlaku, mdə ngəni fa, man ata wutə nə ri?”

²²Antə Yesu shinau alari ka pəla, “Ma I pəla I ata bara ka tsa ndzi ka mpika har tar ma I ku si, man ata damitə nga akwa ri? Ar nga, nu ra!”

²³Antə ndər ni ku titiləmtadzi akwa nca mjir nu Yesu abbər mdərthlipə ngəni aɗi ata mtə wa. Amma Yesu aɗi pəla alari abbər arni tsa aɗi ata mtə wa wa. Tsa pəla, “Ma I pəla I ata bara ka tsa ndzi ka mpika har tar ma I ku si, man ata damitə nga akwa ri?”

²⁴Ngəni an mdərthlipə na akwa hamta seɗa ata kəra suayeri ngəni ni, tsa an rəbutə suayeri ngəni ni. Tsuwa yeru ku sənda abbər su tə tsa akwa pəlari ni an jiri.

²⁵Suayeri damwa aɗi hang natə Yesu ku hara Amma ma mdə pəla abbər ka mdə rəbuta kəlara pal akwa nca ɗa, I tamata wala duniya ni ka kərni aɗi ata mzhi kəsi kakaɗayeri tə mda ata rəbutari wa.