Read bura-pabir Yahwana 3 Bible Online

Yahwana 3 - bura-pabir bible

Yahwana 3

¹Mdə laga aɗi ka thləmari Nikodemus na akwa nca mjir Farisi, tsuwa tsa ola akwa nca mjir Yahudi.

²Vir laga mdə ngəni si adzə Yesu aviri ka pəla alari, “Rabbi, Yeru ku sənda abbər Hyel an thlentə nga ka gə sə thlipa ala yeru, kamnyar mda aɗi na amzhi hara surndatayeri ngəni tə ga akwa harari nə wa, tar ma Hyel adzə ni.”

³Antə Yesu pəla alari, “I akwa pəla ala gə jirkur, mda aɗi na ata mzhi ləkwa kuthlikurər Hyel wa, tar ma mdə ku jaktə yaɓəla ni ka damwa.”

⁴Antə Nikodemus yu ni abbər, “Apa madi tə mda ata mzhi yaɓəla mdə na ku hala apani ri? Tsa ata mzhi jaktə ləkwa kuta mama'ni ka mdə jaktə yaɓəla ni ka damwa ya?”

⁵Antə Yesu shinau ka pəla, “I akwa pəla ala gə jirkur, mda aɗi na mzhi ləkwa kuthlikurər Hyel wa, tar ma mdə ku yaɓəla ni atar yimi ka Mambəla.

⁶Mdə tə mdə yaɓəla ni atar dza daci, ata ndzi mdə ndzang, amma mdə tə yaɓəla ni atar Mambəl ata ndzi ka mambəla.

⁷Antə ga aɗiya ndatədzi kamnyar tə I pəla ala ga abbər tar ka mdə jaktə yaɓəla nga ka damwa nə wa.

⁸Kamnyar shambar ana fya akwa kəlara bwa tə tsa hira. Ga ana nggatə kurakari, amma ga aɗi ana səndə vəi tə tsa thlata akwa wala vəi tə tsa ata mwari akwa wa. Tsu apani antə shanga mji na yaɓəladzi atar Mambəl ata ndzi akwa.”

⁹Antə Nikodemus jaktə pəla alari, “Apa madi tə su ngəni ata mzhi hara ri?”

¹⁰Antə Yesu shinau alari ka pəla, “Gə maləm na ola akwa Israila, amma wala apani ga aɗi nggaɓəla su ngəni wa?

¹¹I akwa pəla ala gə jirkur, yeru ana gari ata kəra su tə yeru ku sənda, ka hara seɗa ata kəra su tə yeru ku wuta. Amma wala apani giri aɗi akwa hir dlu ndərər yeru wa.

¹²Ma I akwa pəla ala giri suayeri na akwa duniya, amma giri aɗi hamta jiri aka ri wa, apa madi tə giri ata mzhi hamta jiri ma I pəla ala giri ata kəra suayeri na amtazi ri?

¹³Kamnyar mda aɗi na ku ɗar mwari amtazi wa, tar Ɓzər Mda na thlata amtazi ka səghəi.

¹⁴“Kamnyar apatə Musa ku haptə pwapur əmza ata udzəm akwa mtaku, antə ata ndzi dwali ka mdə haptə Ɓzər Mda,

¹⁵kamnyar ka kəlara mdə na ku hamta jiri alari, wutə mpikə na akur wa.

¹⁶“Kamnyar Hyel ku hir duniya, antə tsa hamta Ɓzərni na duku shini, abbər kəlara mdə na ku hamta jiri alari aɗiya mtə wa, amma ka tsa wutə mpikə na akur wa.

¹⁷Kamnyar Hyel aɗi thlentə Ɓzərni akwa duniya kamnyar ka tsa hara shariya aka duniya wa, amma kamnyar ka duniya wutə mbantədzi atar ni.

¹⁸“Kəlara mdə na ku hamta jiri alari, mda aɗi ata hara alari shariya wa. Amma kəlara mdə na aɗi hamta jiri alari wa, shariya ku kurtə ngkəi ni, təng tə tsa aɗi hamta jiri aka Ɓzər Hyel na duku shini wa ni.

¹⁹Shariya ni an apani, parakəu ku si akwa duniya, amma mji ku hir kuthlu ta parakəu, kamnyar harar ɗa an ɗimi.

²⁰Kamnyar kəlara mdə na ana hara ɗimikur ana nggəlar parakəu, antə tsa aɗi ata hir si adzə parakəu nə wa, kamnyar ta surhararni na ɗimi ni asə ndzi ata bəbal.

²¹Amma kəlara mdə na ana hara su akwa jirkur, tsa ana si adzə parakəu, kamnyar ka mji wutə hararni ni ata bəbal, abbər tsa akwa hara su tə Hyel akwa barari.”

²²Aghəla ngəni antə Yesu ka mjirthlipərni ku mwari akwa tsəɗi Yahudiya, ka ɗarndzi anda akwa hara baptizma aka mji.

²³Tsuwa Yahwana akwa hara baptizma ahar Ainon kudzəhə ka Salim, kamnyar yimi aɗi hang akwa vəi ndaga. Antə mji akwa kəɗar mwari adzə ni kamnyar ka mdə hara ala ɗa baptizma.

²⁴Saka nda mda aɗi vu Yahwana akwa pərsəna katagu wa.

²⁵Antə beɗi ku thlata akwa daɓwa mjir thlipər Yahwana ka mdər Yahudi laga ata kəra surharar ɗa abwar kəcimtadzi.

²⁶Antə da si adzə Yahwana ka pəla alari, “Maləm, mdə tə giri ka tsa aɓəla bwanda Thlyagha Jodan ni, natə ga ku gari ata kərari ni, nggədza ni kulini akwa hara baptizma, tsuwa shanga mji akwa mwari adzə ni.”

²⁷Antə Yahwana shinau ka pəla, “Mda aɗi na ata mzhi wutə su wa, tar ma Hyel ku hamta alari amtazi.

²⁸Giri ka kəra giri an seɗarna ata kəra su tə I pəla abbər, ‘I aɗi Kristi wa, amma mdə ku thlentə ra kəi si kəmata tsa.’

²⁹Akwa vəi kəldzi mdə na ka amaliya akəla ri an sala mwala ni. Antə pazhir sala mwala ni, na athləthlata adzə ni ana hara kucali ka duna akwa kəlara sakatə tsa ku nggatə kuraka sala mwala ni. Antə kulini kucalərna ku nghyantədzi.

³⁰Arni tar ka tsa jakjaka, amma arna tar kəi kəmta kəmtadzi.”

³¹Mdə na ku thlata amtazi an mdə na ku təramta shanga mji ka olkur. Shanga mji na akwa duniya an ar duniya, tsuwa da ana gari ata kəra suayeri na akwa duniya. Amma tsa na ku thlata amtazi tsan ata kəra shanga su.

³²Tsa ana gari ata kəra su tə tsa ku wutə ka nggata, amma wala apani antə mda aɗi na ku dlu ndərərni wa.

³³Amma shanga mji na ku dlu ndərərni ku seɗata abbər jiri Hyel ni ka jirkur.

³⁴Kamnyar mdə tə Hyel thlentə ni akwa ngkər ndərər Hyel, kamnyar Hyel ku hamta alari mambələrni na mda amzhi ngkərɓəlari wa.

³⁵Kamnyar Tədda ni ku hir Ɓzərni, antə tsa ku hamta shanga su akwa tsiyari.

³⁶Kəlara mdə na ku hamta jiri aka Ɓzər, tsa ka mpikə na akur wa, amma kəlara mdə na aɗi kələngkər aka Ɓzər wa, tsa aɗi ata wutə mpikə na jirari wa, amma tsa ata kəɓa ka ɗəffə bwarbwarkurər Hyel.