Read bura-pabir Yahwana 5 Bible Online

Yahwana 5 - bura-pabir bible

Yahwana 5

¹Aghəla ngəni antə Yesu mwari ahar Urushalima, kamnyar sakar susəma na ola ar mjir Yahudi ku hara.

²Tsuwa akwa Urushalima kudzəhə ka Nyarfur Təma ni, kufa laga aɗi natə mda ana pəla Bethsaida. Tsuwa kufa ni ka səvayeri ntəfu tə mdə kalaktə ni kəgari.

³Antə akwa səvayeri ngəni ni mji hang na nggawa nggawa, ka mji na mdlyang, ka mji na nggurdəkəi, ka mji na ka dza ɗa mtəmtari ana si ka pəpəi.[1]

⁴

⁵Apani mdə laga aɗi anda na ku ndzi nggawa məva makkumari ka ncisu.

⁶Sakatə Yesu wutə mdə ni ka sənda abbər mdə ni ku fəi apəpəi anda, antə tsa yu ni ka pəla, “Ga ata bara ka gə ndzi ngga ya?”

⁷Antə mdə na nggawa ni shinau alari ka pəla, “Zanuwa, I aɗi ka mdə na avu ra akwa kufa ni sakatə yimi ni ku kənggərantədzi wa, ma sakatə I ata mwari abbər kəi ləkwa təng mdə damwa ata ləkwari kəmata iya.”

⁸Antə Yesu pəla alari, “Thlata! Kətə sərpəyir nga, kara mwa.”

⁹Təkəma antə mdə ni ku mbantədzi, ka kətə sərpəyirni, ka baɗitə mwa. Tsuwa su ngəni ni hara akwa Vir Ghərəmtaghəra ar sati.

¹⁰Antə mjir Yahudi na ol'ola pəla aka mdə na mbantədzi ni abbər, “Ashina Vir Ghərəmtaghəra antə aɗi kalkal ka gə kəl sərpəyir ngə wa.”

¹¹Amma tsa shinau ka pəla, “Mdə na ku mbantə ra ni an pəla ali kəi kətə sərpəyirna kəi mwa.”

¹²Antə da yu ni abbər, “Mdə madi an pəla ala ga, ka gə kətə sərpəyir nga ka ra mwa nə ri?”

¹³Mdə na mbantədzi ni aɗi səndə Yesu wa, kamnyar tə mji ku hara hang ata vəi nda, tsuwa Yesu ku nggwar ləɓəla ka təra.

¹⁴Aghəla nda antə Yesu wutə mdə ni akwa mbwar vəngkər səli, antə tsa pəla alari, “Kulini tə ga ku hara ngga! Antə ga aɗiya jaktə hara biku kəra wa, ta su na mwavərari asə wutə nga.”

¹⁵Antə mdə ni təra kara pəla aka mji na ol'ola ar mjir Yahudi ni abbər Yesu an mbantə ni ni.

¹⁶Antə apani da baɗitə hara bwani aka Yesu, kamnyar tə tsa mbantə mdə ngəni Vir Ghərəmtaghəra ni.

¹⁷Antə Yesu shinau ala ɗa ka pəla, “Təddarna akwa hara kəthlər ba kulini, antə wala I ma I akwa hara kəthlər.”

¹⁸Antə gari ngəni ku vu tə mjir Yahudi ni baɗitə bara lakur tsi ni təramta na hwatu, kamnyar aɗi tsa ɓəli tsawur Vir Ghərəmtaghəra daci wa, amma tsa pəla abbər Hyel an Təddarni, ka namtə apa da kalkal ka Hyel.

¹⁹Antə Yesu shinau ala ɗa ka pəla, “Jiri, I akwa pəla ala giri, Ɓzər amzhi hara su ka kərari wa, tar su tə tsa wutə Tədda akwa harari. Kamnyar su tə tsa ana hara antə Ɓzər ni ata harari tsuwa.

²⁰Kamnyar Tədda ni hir Ɓzər ni, antə tsa ana ncanta alari shanga su tə tsa ka kərari akwa harari. Har tsa ata ncanta alari suayeri na ku təramta ngəni ka olkur, kamnyar ka giri ndatədzi.

²¹Kamnyar tsu apa tə Tədda ana thlentə mji na ku mti ka na ala ɗa mpika, antə Ɓzər ni ata hamta mpika aka mji tə tsa hira.

²²Kamnyar Tədda aɗi ata hara shariya aka mdə wa, amma tsa ku hamta shanga shariyayeri akwa tsiya Ɓzər ni,

²³kamnyar ka shanga mji nar olkur aka Ɓzər ni tsu apatə da ana nar olkur aka Tədda. Antə kəlara mdə na aɗi akwa nar olkur aka Ɓzər ni wa, tsa aɗi akwa nar olkur aka Tədda na thlentə ni nə wa.

²⁴“I akwa pəla ala giri jirkur, kəlara mdə na ata nggatə ndərayeri arna, ka hamta jiri aka mdə na ku thlentə ra, tsa ka mpikə na akur wa.

²⁵Jiri, I akwa pəla ala giri, ku kurtə hara ma, sakatə mji na mtəmta ata sə nggatə kuraka Ɓzər Hyel, antə mji na ku nggatə ni ata wutə mpika.

²⁶Kamnyar apatə Tədda ka kərari an ka mpika, antə tsa hara tə Ɓzər ni ndzi ka mpika ka kərari tsuwa.

²⁷Tsuwa tsa ku hamta alari dunar kuthlikur ka tsa an thlamta shariya, kamnyar tsa an Ɓzər Mda.

²⁸Giri aɗiya ndatədzi ata kəra su ngəni wa, kamnyar saka ata sə hara tə shanga mji na akwa kula ata sə nggatə kurakari

²⁹ka səɓəla. Mji na ku hara ɓɗakkur ata sə thlatər ləkwa mpikə na jirari, mji na hara ɗimikur tsuwa ata sə thlatər nggatə shariyar ləkwa bwani.

³⁰“Su aɗi tə I amzhi harari ka kəri shira wa. I ana hara shariya apatə Hyel ku pəla ali kəi hara. Antə I ana hara shariyarna ka jirkur, kamnyar I aɗi ana hara su tə I hir wa, amma su tə mdə na thlentə ra hira.

³¹Ma I an ata hamta seɗa ata kəri surna, seɗarna aɗi ata ndzi ka jirkur.

³²Amma mdə damwa aɗi na akwa hara seɗa ata kəri, tsuwa I ku sənda abbər seɗa tə tsa akwa hamtari ata kəri ni an jiri.

³³Giri ku thlentə mji adzə Yahwana, tsuwa tsa ku pəla ala giri jirkur.

³⁴Jiri, aɗi seɗa tə mda akwa hamtari ata kəri an su na olari ali wa. Arna I akwa pəla ala giri ni kamnyar ka giri wutə mbantədzi.

³⁵Kamnyar Yahwana ndzi apa pitəla na akwa mba ka hamta parakəu, antə giri ku hir ka giri hara kucali akwa parakərni ni ar saka laga raka.

³⁶Amma I ka seɗar kəri na olta seɗa tə Yahwana hamta ala giri ata kəri ni. Kəthlərayeri tə I akwa harari ni, natə Təddarna hamta ali abbər kəi kuri ni, an suayeri na akwa hara seɗa ata kəri abbər Tədda an thlentə ra.

³⁷Antə Tədda na thlentə ra ni an akwa hara seɗa ni surni ata kəri. Giri aɗi ɗar nggatə kurakari, wala wutə laku tə tsa akwa wa.

³⁸Tsuwa giri aɗi kəsi ndərərni akwa ɗəffa giri wa, kamnyar giri aɗi hamta jiri aka mdə tə tsa thlentə nə wa.

³⁹Giri ana paka akwa kakaɗayeri ar Hyel, kamnyar giri tamata abbər akwa kakaɗayeri antə giri ata wutə mpikə na akur wa. Tsuwa tsu kakaɗayeri ngəni andər hara seɗa ata kəri ni.

⁴⁰Amma wala apani giri aɗi hir si adzə ra kamnyar ka giri wutə mpikə wa.

⁴¹“I aɗi akwa bara ka mji hu ra wa.

⁴²Amma I ku sənda abbər giri aɗi ka hirkur Hyel akwa ɗəffa giri wa.

⁴³I si akwa thləma Təddarna amma giri aɗi dlu ra wa. Amma ma mdə laga an si ka kərari ndzang, giri ata dlu ni.

⁴⁴Apa madi tə giri ata mzhi hamta jiri ri, təng tə giri akwa bara ka mdə hu giri, tə giri akwa bara huwa akəla Hyel na duku shini wa ni?

⁴⁵Giri aɗi dzama abbər I an ata sə burkatə giri akəma Təddarna wa, amma Musa tə giri akwa vəkər ka tsa ni an ata burkatə giri.

⁴⁶Ma giri an hamta jiri aka Musa, sakani giri ku hamta jiri ali, kamnyar tsa rəbuta ata kəri.

⁴⁷Amma ma giri aɗi hamta jiri aka su tə tsa rəbutə wa, apa madi tə giri ata mzhi hamta jiri aka ndərərna ri?”