Read bura-pabir Yahwana 6 Bible Online

Yahwana 6 - bura-pabir bible

Yahwana 6

¹Aghəla ngəni, antə Yesu mwari aɓəla bwanda Mandar Galili, na an Mandar Tiberiya.

²Antə dlamar mji ku nu ni, kamnyar tə da ku wutə surndatayeri tə tsa hara atar mbantə mji na nggawa nggawa.

³Antə Yesu mwari ka ndzəndzi ata kəra gar ata kəma duku kəga mjirthlipərni.

⁴Tsuwa sakar Kucalər Fəlɓəla Kəi ni ku hara kudzəha.

⁵Sakatə Yesu haptə kərari ka wutə dlamar mji akwa si adzə ni, antə tsa pəla aka Filibus abbər, “Ama antə mburu ata wutə susəma ka mburu mastə na ata mzhi səmər mji nayeri nə ri?”

⁶Tsa pəla apani ni kamnyar ka tsa ngkərtə Filibus, kamnyar arni tsa səndə su tə tsa ata hara ri.

⁷Antə Filibus shinau alari abbər, “Ai wala mda an ata kətə kwabar ntər mdər kəthlər vir aru suɗa, aɗi ata mzhi mastə susəma na ata ndlətə waskəi wala raka raka wa.”

⁸Antə pal akwa nca mjirthlipərni na ka thləmari Andrawus, na ɓzərma' Siman Bitrəs ni pəla,

⁹“Nggədza ɓzəngkyar laga azi ka kər buradi ntəfu tə mdə ɓwa ka barli, ka tsuwa kəlfa suɗa. Amma ata hara mi aka mji dlama dlama apani ri?”

¹⁰Yesu pəla aka mjirthlipərni abbər, “Pəla giri aka mji ni ka da ndzəndzi.” Tsuwa kusar aɗi hang ata vəi nda. Antə mji ni ku ndzəndzi, tsuwa hangkurər ɗa ku mwanta apa dəpu ntəfu.

¹¹Antə Yesu kətə kər buradi ni ka usar Hyel, ka ndəkəmta aka mji na andzəndzi ni, kalkal apatə waskəi akwa turari. Apani tsuwa antə tsa hara ka kəlfayeri ni.

¹²Sakatə shanga ɗa ku səma ka ndli, antə tsa pəla aka mjirthlipərni abbər, “Tsaptə giri mbilari na ɓushirəmtadzi ni, mda aɗiya bara gyal ka su wa.”

¹³Antə da tsaptə na ɓushirəmtadzi ni ka nghyantə thlambəl kumnya suɗa kəgari, watau mambila buradi barli tə mji kwasə ka zhari ni.

¹⁴Sakatə mji wutə sur ndatə tə Yesu hara ni, antə da pəla, “Jiri, ngəni an Naɓi ni na ata si akwa duniya ni!”

¹⁵Sakatə Yesu ku nggaɓəla abbər mji ni abaka si ka da kətə ni ka dunar ɗəva, ka da bartə kərari ka tsa ndzi kuthli, antə tsa jaktə ngka akwa gar tsa shini.

¹⁶Sakatə tahaku ku hara, antə mjirthlipər Yesu ləghəi adzə mnya manda,

¹⁷ka ləkwa shar kamnyar mwari aɓəla bwanda manda ni akwa mwari abwar Kafarnahum. Tsuwa sakanda kuthlu ku hara, amma Yesu aɗi si adzə ɗa katagu wa.

¹⁸Antə yimi ni baɗitə mpa ka duna kamnyar shambar na mwavər akwa fi yimi ni.

¹⁹Sakatə da ku mwa ata kəra yimi ni apa mel makər wala nfwar, antə da wutə Yesu akwa mwa ata kəra yimi ni akwa si təbwar shar ni, antə da ku thlivəra.

²⁰Amma Yesu pəla ala ɗa, “Iya! Giri aɗiya thlivər wa!”

²¹Antə da ku hir ka da dlu ni akwa shar ni ka kucali. Təkəma antə shar ni ku mzhitə vəi tə da akwa bara mwari akwa ni.

²²Səɓəla ɗəpari, antə mji na mbili aɓəla bwanda manda ni wuta abbər azha hwatu shar duku an si daci. Tsuwa da wuta abbər Yesu aɗi ləkwa shar ni kəga mjirthlipərni wa, amma mjirthlipərni ni təra shiɗa.

²³Amma sharayeri laga aɗi na thlata ahar Tiberiya ka si kudzəhə ka vəi tə mji kwasə buradi aghəla tə Mthlaku ku usar Hyel ata kər ni.

²⁴Sakatə mji ni wuta abbər Yesu ka mjirthlipərni aɗi anda kəra wa, antə da ku ləkwa sharayeri nda, ka mwari ahar Kafarnahum akwa pakə Yesu.

²⁵Sakatə da wutə Yesu aɓəla bwanda manda ni, antə da pəla alari, “Maləm, nawa antə gə si azi ri?”

²⁶Antə Yesu shinau ala ɗa ka pəla, “I akwa pəla ala giri jirkur, giri aɗi akwa bara ra kamnyar surndatayeri tə giri wutə nə wa, amma kamnyar giri ku səm susəma apatə giri akwa barari.

²⁷Giri aɗiya hara kəthlər kamnyar susəma na ata si hil wa, amma kamnyar susəma na aɗi hil wa, na ata hamta mpikə na akur wa, natə Ɓzər Mda ata sə hamta ala giri. Kamnyar Hyel na Tədda ku hara seɗar mbərsa ata tsa.”

²⁸Antə da pəla alari, “Man tə ka yeru hara, kamnyar ka yeru hara su tə Hyel ata bara ri?”

²⁹Antə Yesu shinau ala ɗa ka pəla, “Su tə Hyel akwa bara ka giri hara an ka giri hamta jiri aka mdə tə tsa thlentə ni.”

³⁰Antə da pəla alari, “Kaha, sur ndatə madi tə ga ata mzhi haratari ka yeru wuta, ka hamta jiri ala gə ri? Man tə ga ata mzhi harari ri?

³¹Kəkayeri ar yeru ku kwasə manna akwa mtaku, tsu apa tə mdə ku rəbuta akwa kakaɗu abbər, ‘Tsa ku na ala ɗa susəma na thlata amtazi ka da səma.’ ”

³²Antə Yesu pəla ala ɗa, “I akwa pəla ala giri jirkur, aɗi Musa an na ala giri buradi na thlata amtazi nə wa, Təddarna an akwa na ala giri buradi na jirari na thlata amtazi.

³³Kamnyar buradi tə Hyel hamta ni an tsa na ku thlata amtazi ka səghəi akwa hamta mpika aka duniya ni.”

³⁴Antə da pəla alari, “Mthlaku, na ala yeru buradi ngəni tədəku.”

³⁵Antə Yesu pəla ala ɗa, “I an buradi ar hamta mpikə ni, mdə na ku si adzə ra, tsa aɗi ata nggatə mi kəra wa, tsuwa mdə na ku hamta jiri ali tsa aɗi ata nggatə thləli kəra wa.

³⁶Amma tsu apatə I ku pəla ala giri ni, giri ku wutə ra amma wala apani giri aɗi hamta jiri ali wa.

³⁷Shanga mji tə Tədda ku na ali, da ata si adzə ra. Tsuwa kəlara mdə na ku si adzə ra, I ata kədləmta ni wa.

³⁸Kamnyar I aɗi thlata amtazi ka si abbər kəi hara su tə I hir wa, amma kəi hara su tə mdə na thlentə ra hira.

³⁹Antə ngəni an su tə mdə na ku thlentə ra hir ni, abbər I aɗiya shamta wala duku akwa nca shanga mji tə tsa hamta ali nə wa, amma kəi sə thlentə ɗa ka mpika akwa vir kurər duniya.

⁴⁰Kamnyar ngəni an su tə Təddarna hira, abbər kəlara mdə na ku wutə Ɓzər ni, ka hamta jiri alari, tsa ata wutə mpikə na akur wa. Tsuwa I ata thlentə ni akwa vir kurər duniya.”

⁴¹Antə mjir Yahudi baɗitə nggungguni ata kərari, kamnyar tə tsa pəla abbər, “I an buradi na səghəi akwa kutar amtazi ni.”

⁴²Antə da pəla, “Nənga ngəni aɗi Yesu wa ri, na ɓzər Yusuf? Mdə tə mburu asəndə baba'ni ka mama'ni! Apa madi kulini tsa ata pəla abbər tsa thlata amtazi ri?”

⁴³Antə Yesu shinau ala ɗa ka pəla, “Giri aɗiya nggungguni akwa daɓwa giri wa.

⁴⁴Mda aɗi na amzhi si adzə ra wa, tar ma Tədda na thlentə ra ni an ndəkərtə ni ali. Antə I ata sə thlentə ni ka mpika akwa vir kurər duniya.

⁴⁵Mdə ku rəbuta akwa kakaɗu abbər, ‘Hyel ata sə thlipə su aka shanga ɗa.’ Antə kəlara mdə na ku nggatə Tədda ka thliptə su akəla ri, ata si adzə ra.

⁴⁶Ngəni aɗi abbər mdə aɗi na ku ɗar wutə Tədda wa, tar tsu tsa na thlata adzə Hyel ni an wutə Tədda ni.

⁴⁷I akwa pəla ala giri jirkur, mdə na ku hamta jiri tsa ka mpikə na akur wa.

⁴⁸I an buradi ar hamta mpikə ni.

⁴⁹Kəkayeri ar giri ku kwasə manna akwa mtaku, amma wala apani da ku mtəgəmtadzi.

⁵⁰Amma ngəni an buradi na thlata amtazi ka səghəi. Kəlara mdə na ata kwasə buradi ngəni ni, tsa aɗi ata mtə wa.

⁵¹I an buradi na ka mpika na ku thlata amtazi. Antə kəlara mdə na ku kwasə buradi ngəni, tsa ata ndzi ka mpika ba saka madi. Antə buradi tə I ata hamtari kamnyar ka duniya ndzi ka mpikə ni, an kumər dzi.”

⁵²Antə mjir Yahudi ni baɗitə beɗi akwa daɓwa ɗa, akwa pəla, “Apa madi tə mdə ngəni ata mzhi na ala mburu dzari ka mburu səm ri?”

⁵³Antə Yesu pəla ala ɗa, “I akwa pəla ala giri jirkur, ma giri aɗi səm kumər dza Ɓzər Mda ka sa mamshirni wa, giri aɗi ata ndzi ka mpika akwa dza giri wa.

⁵⁴Kəlara mdə na ku səm kumər dzi ka sa mamshirna, tsa ata ndzi ka mpikə na akur wa, antə I ata sə thlentə ni akwa vir kurər duniya.

⁵⁵Kamnyar kumər dzi an susəm na jirari, tsuwa mamshirna an sur sa na jirari.

⁵⁶Kəlara mdə na ata səm kumər dzi ka sa mamshirna, tsa ata ndzi akwa iya, tsuwa I ata ndzi akwa tsa.

⁵⁷Apatə Tədda na ka mpika ku thlentə ra, tsuwa atar ni antə I ka mpikə ni, apani tsuwa antə kəlara mdə na ku səm kumər dzi tsa ata ndzi ka mpika atar na.

⁵⁸Ngəni an buradi na thlata amtazi ni, aɗi jili natə kəkayeri ar giri səma ka jaktə mtə nə wa. Mdə na ku kwasə buradi ngəni, tsa ata ndzi ka mpika ba saka madi.”

⁵⁹Yesu ku pəla gari ngəni ni sakatə tsa akwa thlipa akwa mbwar vəngkər səli ahar Kafarnahum.

⁶⁰Sakatə mji hang akwa nca mjirthlipərni ku nggatə gari ni, antə da pəla, “Sur thlipə ngəni an ɓəɓal kamta, wan ata mzhi dluwari ri?”

⁶¹Amma təng tə Yesu ku sənda akwa ɗəffari abbər mjirthlipərni akwa nggungguni ata kəra ndər ni, antə tsa pəla ala ɗa, “Ngəni ata ndzi sur tsamta səl ala giri tsu ya?

⁶²Ka shang ma giri an ata wutə Ɓzər Mda akwa ləmtazi akwa vəi tə tsa akwa hwatu ri?

⁶³Mambələr Hyel andər hamta mpika, su aɗi tə dza mda ata mzhi kuriyari wa, dunar mda aɗi mzhi hara su wala raka wa. Ndərayeri tə I pəla ala giri ni an thlata akəla mambəl na ana hamta mpikə ni.

⁶⁴Amma wala apani mji laga akwa nca giri aɗi hamta jiri wa.” Kamnyar Yesu ku səndə tsu akwa baɗitari, mji na aɗi ata sə hamta jiri wa, ka mdə na ata sə ɓəli ni.

⁶⁵Antə tsa pəla, “An su na hara tə I pəla ala giri abbər, mda amzhi si adzə ra wa, tar ma Tədda ku hir alari.”

⁶⁶Aghəla gari ngəni mji hang akwa nca mjir nu Yesu ni ku ngka ka bwahili, tsuwa da aɗi jaktə nu ni kəra wa.

⁶⁷Antə Yesu pəla aka mjirthlipərni na kumnya suɗə ni abbər, “Wala giri ma, giri akwa bara təra ya?”

⁶⁸Antə Siman Bitrəs shinau alari ka pəla, “Mthlaku, ka yeru mwari adzə wa damwa ri? Gan ka ndərayeri ar hamta mpikə na akur wa.

⁶⁹Yeru ku hamta jiri, ka sənda abbər ga an Mdə na Ɓɗakkarkara ar Hyel.”

⁷⁰Antə Yesu shinau ala ɗa ka pəla, “I ku carɓəla giri kumnya suɗa, nənga wa ri? Amma pal akwa nca giri an Shatan!”

⁷¹Yesu akwa gari ata kəra Yahuda na ɓzər Siman Iskariyoti, kamnyar akwa nca mji na kumnya suɗə ni, tsa an ata sə ɓəli ni.