Read bura-pabir Yahwana 7 Bible Online

Yahwana 7 - bura-pabir bible

Yahwana 7

¹Aghəla ngəni, antə Yesu dlarhə kuta Galili, amma tsa aɗi hir mwari akwa Yahudiya wa, kamnyar tə mji na ka kuthlikur akwa Yahudi akwa bara ka da tsi ni.

²Tsuwa kulini Kucalər Kir Səva ku hara kudzəha.

³Antə maɗama' Yesu pəla alari abbər, “Kuji ka gə zhar vəi ngəni, ka gə təra mwari ahar Yahudiya, kamnyar ka mjirthlipər ngə wutə surndatayeri tə ga akwa harari ni.

⁴Kamnyar kəlara mdə na akwa bara ka thləmari tuwa, tsa aɗi ana hara su akwa ɗuwar wa. Antə ma ga akwa bara hara suayeri ni, tar ka gə ncantə kər nga aka mjir duniya.”

⁵Kamnyar wala maɗama'ni na shili aɗi hamta jiri alari wa.

⁶Antə Yesu pəla ala ɗa, “Sakar na aɗi hara katagu wa, amma ar giri, kəlara saka an kalkal ala giri tədəku.

⁷Ar giri duniya amzhi nggəlar giri wa, amma arna tsa ku nggəlar ra, kamnyar tə I ana pəla alari abbər surhararni aɗi ɓɗaku wa.

⁸Giri ata mzhi ləmta akwa vəi Kucalər Səva ni, amma arna I aɗi ata mwari wa, kamnyar sakarna aɗi kuri hara katagu wa.”

⁹Aghəla tə tsa pəla ndər ngəni, antə tsa ndzi tsu akwa Galili.

¹⁰Amma aghəla tə maɗama'ni ku təra mwari akwa vəi kucali ni, antə Yesu ku mwari tsuwa, amma tsa mwari akwa ɗuwari, aɗi ata bəbal wa.

¹¹Mjir Yahudi na ol'ola ku pakə ni akwa vəi kucali ni, akwa pəla, “Tsa ama ri?”

¹²Antə beɗi ku thlatə ka duna akwa daɓwa ɗa ata kərari. Mji laga akwa pəla, “Tsa mdə na pwa,” amma mji laga akwa pəla, “Awa, tsa akwa shamta mji daci.”

¹³Amma da aɗi akwa gari ata kərari ata bəbal wa, kamnyar tə da akwa thlivər mjir Yahudi na ka kuthlikur.

¹⁴Amma sakatə mda akwa kərathlər kucali ni, antə Yesu mwari akwa mbwar vəngkər səli ka baɗitə thlipa aka mji.

¹⁵Antə mjir Yahudi na ka kuthlikur ku ndatədzi ata kəra thlipərni, akwa pəla, “Apa madi tə mdə ngəni səndə su apani ri, təng tə tsa aɗi hara makarantə wa ni?”

¹⁶Antə Yesu shinau ala ɗa ka pəla, “Su tə I akwa thlipari ni, aɗi surthlipa na ar kəri wa, amma ar mdə na thlentə ra.

¹⁷Tsuwa kəlara mdə na ata hir hara su tə Hyel hira, tsa ata nggaɓəla abbər su tə I akwa thlipari ni thlata akəla Hyel, aɗi ar kəri wa.

¹⁸Kamnyar mdə na akwa gari na ar kərari akwa bara thləm aka kərari. Amma mdə na akwa bara thləm aka mdə na thlentə ni, tsa an ka jirkur, antə tsa aɗi ana thlandər wa.

¹⁹Aɗi Musa an na giri Tsawu ni wa ya? Amma wala pal akwa nca giri aɗi ɓəla Tsawu ni wa. Kamnyar mi tə giri akwa bara tsi ra ri?”

²⁰Antə mji shinau alari ka pəla, “Gə ka shatan! Kəga wa an akwa bara tsi ngə nə ri?”

²¹Antə Yesu shinau ala ɗa ka pəla, “Təng sur ndatə duku daci antə I hara, amma shanga giri ku ndatədzi.

²²Musa ku tsawa ala giri abbər ka giri thla kaciya aka maɗa' giri wala tə aɗi Musa an baɗitə wa, amma kəkayeri ar giri. Antə giri ana thla kaciya aka ɓzəngkyar akwa Vir Ghərəmtaghəra.

²³Antə ma giri ana thla kaciya aka ɓzəngkyar akwa Vir Ghərəmtaghəra kamnyar tə giri aɗi akwa bara ɓəli tsawur Musa wa ni, kamnyar mi tə ɗəffa giri ata ɓza ata kəri kamnyar tə I mbantə mda Vir Ghərəmtaghəra ri?

²⁴Giri aɗiya hara shariya aka mda ata kəra laku tə giri wutə ni akwa wa, amma ka giri hara shariya na kalkalari.”

²⁵Antə mjir Urushalima laga pəla, “Ngəni aɗi an mdə tə da akwa bara ka da tsi ni ni wa ya?

²⁶Nggədza ni, akwa gari ata bəbal, amma da aɗi ndəra alari wa! I tamata abbər mji na ol'ol ni aɗi nggaɓəla abbər tsa an Kristi ni wa.

²⁷Təng tə shanga mji ku səndə vəi tə mdə ngəni thlata akwa ni, kamnyar ar Kristi mda aɗi na asəndə vəi tə tsa ata thlata akwa ka si wa.”

²⁸Sakatə Yesu akwa thlipa akwa mbwar vəngkər səli ni, antə tsa haptə kurakari ka pəla, “Jiri, giri asəndə ra, tsuwa giri ku səndə vəi tə I thlata akwa. Amma I aɗi si ka dunar kəri wa, amma mdə na thlentə ra ni an mdə na ka jirkur. Giri aɗi səndə ni wa,

²⁹amma arna I asəndə ni, kamnyar I thlata adzə ni, tsuwa tsa an thlentə ra.”

³⁰Antə da ku bara ka da ngkəi ni, amma mda aɗi na nggitə tsəkwar ni wa, kamnyar sakarni aɗi hara katagu wa.

³¹Amma wala apani mji aɗi hang akwa nca mji ni na ku hamta jiri alari. Da akwa pəla, “Ma sakatə Kristi ku si ni, tsa ata hara surndatayeri na təramta su tə mdə ngəni akwa harari ni ya?”

³²Sakatə mjir Farisi ni nggatə mji akwa cicuh su ata kəra Yesu, antə pristayeri na ol'ola, kəga mjir Farisi ni thlentə mjir wul mbwar vəngkər səli ni abbər ka da ngkəi ni.

³³Amma Yesu pəla, “I ata ndzi adzə giri mnyar saka laga raka, aghəla nda kəi ngka adzə mdə na thlentə ra.

³⁴Giri ata sə bara ra, amma giri aɗi ata sə wutə ra wa, kamnyar giri amzhi mwari akwa vəi tə I ata mwari akwa nə wa.”

³⁵Antə mjir Yahudi na ol'ol ni pəla aka nvwa ɗa abbər, “Tsa akwa bara ləma ri, tə mburu aɗi ata sə mzhi wutə ni kəra wa ni? Tsa ata mwari akwa nca mjir Yahudi na titiləmtadzi akwa nca mjir Helleni ni ka tsa thlipa ala ɗa ya?

³⁶Nənga man karapur su tə tsa akwa pəlari abbər, ‘Giri ata sə bara ra, amma giri aɗi ata wutə ra wa,’ ka tsuwa abbər, ‘Vəi tə I ata mwari akwa ni, giri ata mzhi mwari wa’ nə ri?”

³⁷Akwa vir kurər kucali na an vir na ol ni, antə Yesu thləthlatə ka haptə kurakari akwa pəla, “Kəlara mdə na ka thlili, ka tsa si adzə ra, ka tsa sa yimi.

³⁸Kəlara mdə na ku hamta jiri ali, ‘Thlyaghayeri ar yimər mpika ata sə hwi səɓəla akwa ɗəffari,’ tsu apa tə kakaɗər Hyel ku pəla ni.”

³⁹Amma Yesu akwa gari ata kəra Mambələr Hyel natə mji na ku hamta jiri alari ata sə dluwari. Kamnyar ata saka nda mda aɗi hamta Mambəl ni katagu wa, kamnyar mda aɗi haptə səliyir Yesu katagu wa.

⁴⁰Sakatə mji laga na akwa nca mji ni nggatə su tə tsa pəla ni, antə da pəla, “Jiri ngəni an Naɓi ni.”

⁴¹Mji laga pəla, “Ngəni an Kristi ni.” Amma mji laga pəla, “Akwa Galili antə Kristi ata səɓəla ni ya?

⁴²Kakaɗu aɗi pəla abbər, Kristi ata səɓəla akwa nyarmbwar Dauda wa ya? Tsuwa mda ata sə yaɓəla ni akwa Bethlelehem, di tə Dauda ndzi akwa ni wa ya?”

⁴³Antə dzamər ɗa ku ndzi zumzum ata kəra Yesu.

⁴⁴Mji laga akwa nca ɗa akwa bara ngkəi ni, amma mda aɗi na nggitə tsəkwar ni wa.

⁴⁵Sakatə mjir gadi ni ngka adzə pristayeri na ol'ola kəga mjir Farisi ni, antə da ku yu ɗa abbər, “Kamnyar mi tə giri aɗi səntə ni wa ri?”

⁴⁶Antə mjir gadi ni pəla, “Ai mda aɗi na ɗar gari apa mdə ngəni wa!”

⁴⁷Antə mjir Farisi ni pəla, “Wala giri ma, tsa ku shamta giri ya?

⁴⁸Mda aɗi akwa nca yeru na ka kuthlikur ni, wala mjir Farisi, na ku hamta jiri alari ya?

⁴⁹Amma mji ngəni na aɗi səndə tsawur Musa wa ni, da shushuwari!”

⁵⁰Antə Nikodemus, na mwari adzə Yesu akwa saka na təramta nda, na pal akwa nca mjir Farisi ni, pəla aka mji bwa duku abbər,

⁵¹“Apatə Tsawur mburu pəla, mda amzhi thlamta shariya aka mda kula nggatə su tə tsa ata pəlari wa, wala nggaɓəla su tə tsa hara wa?”

⁵²Antə da shinau alari ka pəla, “Gə ma gə mdər Galili ya? Ma gə wul ka hangkal ga ata wuta abbər naɓi aɗi ɗar səɓəla akwa Galili wa.”

⁵³Antə waskəi ku mwari aharngkiɗa.