Read bura-pabir Yahwana 8 Bible Online

Yahwana 8 - bura-pabir bible

Yahwana 8

¹Amma ar Yesu tsa təra mwari akwa Gar Zaitun.

²Ɗəɗəpə mbing antə Yesu jaktə si akwa mbwar vəngkər səli ni. Sakatə shanga mji ku si adzə ni, antə tsa ndzəndzi, ka baɗitə thlipa ala ɗa.

³Antə mjir thlipə tsawur Musa kəga mjir Farisi səmbwa ka mwala laga tə mdə ngkəi ni akwa ləka, ka vəi ni akəma mji.

⁴Antə da pəla aka Yesu, “Maləm, mdə ku ngkəi mwala ngəni akwa ləka, mdə ngkəi ni ata kəra harari.

⁵Kulini tsawur Musa ku pəla ka mdə ndzəndzəhtə jili mda apani ka pela har ka tsa mta. Ar nga, man su tə gə pəla ata kər ri?”

⁶Da yu su ngəni ni kamnyar ka da ngkərtə Yesu, kamnyar ka da wutə su tə da ata burkatə ni ata kər. Amma Yesu ku nggyarghəidzi ka rəbutə su ata di ka kuleng tsiyari.

⁷Amma sakatə da ndzangkir yu ni, antə tsa haptə kərari, ka pəla ala ɗa, “Ma mda aɗi na kula biku akwa nca giri, ka tsa an baɗitə ndzəhə ni ka pela ni.”

⁸Antə tsa jaktə nggyarghəidzi ka rəbuta ata di ka kuleng tsiyari.

⁹Amma sakatə da nggatə amsarni ni, antə da baɗitə ləɓəla duku duku ka təra, baɗitə ka mdə na olər ɗa har ka sənta aka mdə na raka ta shang. Apani antə da ku təra kazhar Yesu shini ka mwala ni daci athləthlata akəma ri.

¹⁰Antə Yesu haptə kərari ka pəla alari, “Mwala, da ama ri? Mda aɗi akwa nca ɗa na ku pəlangkər ala gə wa ya?”

¹¹Antə mwala ni shinau ka pəla, “Mthlaku, mda aɗi wala pal akwa nca ɗa wa.” Antə Yesu pəla alari, “Wala iya ma, I aɗi ata pəlangkər ala gə wa. Təra, amma ga aɗiya jaktə hara biku kəra wa.”

¹²Yesu ku sə jaktə gari aka mjir Farisi abbər, “I an parakər duniya ni. Antə kəlara mdə na akwa nu ra, tsa aɗi ata mwa akwa kuthlu wa, amma tsa ata wutə paraku na ar mpika.”

¹³Antə mjir Farisi ni pəla alari, “Ga an akwa hara seɗa ata kəra gə sur nga, antə su tə gə pəla ni aɗi jiri wa.”

¹⁴Antə Yesu pəla ala ɗa, “Wala ma I surna an ata hamta seɗa ata kəri, seɗa tə I ata hamtari an jiri, kamnyar I asəndə vəi tə I thlata akwa, ka vəi tə I akwa mwari ata.

¹⁵Ar giri, giri ana hara shariya atar laku tə giri wul dza mda akwa, amma arna I aɗi ana hara shariya wa.

¹⁶Wala ma I an ata hara shariya, I ata hara shariya ka jirkur, kamnyar aɗi I shira an ata hara shariya nə wa, amma yeru ka Təddarna na thlentə ra ni.

¹⁷Akwa tsawur giri, mdə ku rəbuta abbər, ma mji suɗa ku hamta seɗa jili duku ata kəra su, seɗar ɗa ata ndzi jiri.

¹⁸Arna I andər hara seɗa ata kəri surna, tsuwa Təddarna na thlentə ra ni an seɗarna.”

¹⁹Antə da yu ni abbər, “Təddar ngə ni ama ri?” Antə Yesu pəla ala ɗa, “Giri aɗi səndə ra wa, wala səndə Təddarna wa. Ma giri an səndə ra, sakani giri ata səndə Təddarna ni tsuwa.”

²⁰Yesu pəla gari ngəni akwa sakatə tsa akwa thlipa kudzəhə ka vəi pwi kwaba na akwa mbwar vəngkər səli ni. Amma mda aɗi na ngkəi ni wa, kamnyar sakarni aɗi hara katagu wa.

²¹Antə Yesu jaktə pəla ala ɗa, “I ata təra, tsuwa giri ata sə bara ra, amma giri ata sə mta akwa bikər giri. Vəi tə I ata mwari ata ni, giri amzhi mwari wa.”

²²Antə mjir Yahudi ni pəla, “Tsa ata tsi kərni ya, tə tsa pəla abbər, ‘Vəi tə I ata mwari ata, giri amzhi mwari wa’ ni?”

²³Amma Yesu pəla ala ɗa, “Ar giri, giri aghəyazi akwa duniya, amma arna I thlata amtazi. Giri ar duniya ngəni, arna I aɗi ar duniya ngəni wa.

²⁴An su na hara tə I pəla ala giri abbər giri ata sə mta akwa bikər giri ni. Kamnyar ma giri aɗi hamta jiri abbər I an tsa wa, giri ata mta akwa bikər giri.”

²⁵Antə da yu ni abbər, “Ga an wa ri?” Antə Yesu pəla ala ɗa, “Tsu su tə I pəla ala giri akwa baɗitari nda.

²⁶I ka su hang kəi pəla ata kəra giri, ka tsuwa su hang tə kəi pəlangkər ala giri. Amma I akwa pəla aka mjir duniya su tə I nggata akəla mdə na thlentə ra ni, tsuwa tsa akwa pəla jirkur.”

²⁷Amma da aɗi nggaɓəla abbər Yesu akwa gari ala ɗa ata kəra Təddarni wa.

²⁸An su na hara tə tsa pəla ala ɗa, “Ma sakatə giri ku haptə Ɓzər Mda amta, saka nda antə giri ata sənda abbər I an tsa. Tsuwa giri ata nggaɓəlari abbər I aɗi ana hara su ka dunar kəri wa, amma I ana pəla su tə Təddarna an thlipa ali.

²⁹Tsuwa tsa na thlentə ra ni tsa ata vəi duku ka iya. Tsa aɗi zhar ra I shira wa, kamnyar tədəku I akwa hara su na ata kəskərari.”

³⁰Antə mji hang na ku nggatə gariyirni ni ku hamta jiri alari.

³¹Antə Yesu pəla aka mjir Yahudi na ku hamta jiri alari abbər, “Ma giri ata ləkəma ka kəthlər ka surthlipərna, giri an mjirthlipərna na jirari.

³²Antə giri ata səndə jirkur, antə jirkur ni ata msərantə giri.”

³³Antə da shinau alari ka pəla, “Yeru an kəkar Ibrahim, antə ba saka ni yeru aɗi ɗar ndzi mafar mdə wa. Apa madi tə gə pəla yeru ata si msərantədzi nə ri?”

³⁴Antə Yesu pəla ala ɗa, “I akwa pəla ala giri jirkur, kəlara mdə na ana hara biku, tsa an mafar biku.

³⁵Mafa aɗi ana ndzi akwa kutakəi ba saka madi wa, ɓzər andər ndzi akwa kutakəi ba saka madi.

³⁶Antə apani ma Ɓzər ku msərantə giri, giri ata ndzi msərmsərari jiri.

³⁷I ku sənda abbər giri an mjir nyarmbwar Ibrahim, amma wala apani giri akwa bara tsi ra, kamnyar giri aɗi dlu ndərərna akwa ɗəffa giri wa.

³⁸I ana gari ala giri ata kəra su tə I wuta akəla Təddarna, amma ar giri, giri ana nu su tə təddar giri pəla ala giri.”

³⁹Antə da shinau alari ka pəla, “Ibrahim an baba' yeru.” Antə Yesu pəla ala ɗa, “Ma giri an maɗa' Ibrahim, sakani giri akwa nu su tə Ibrahim hara.

⁴⁰Amma ata vəya ndaga, giri akwa bara tsi ra, kamnyar tə I akwa pəla ala giri jirkur natə I nggata akəla Hyel. Ibrahim aɗi ɗar hara su apani wa.

⁴¹Ar giri, giri akwa nu sur hara təddar giri.” Antə da shinau alari ka pəla, “Yeru aɗi mai! Hyel an Təddar yeru, tsuwa tsa an Tədda duku tə yeru kəgari.”

⁴²Antə Yesu pəla ala ɗa, “Ma Hyel an Təddar giri, sakani giri ku hir ra, kamnyar I səɓəla adzə Hyel, ka si ni. I aɗi si ka dunar kəri wa, amma tsa an thlentə ra.

⁴³Kamnyar mi tə giri aɗi akwa nggaɓəla su tə I akwa pəlari ala giri wa nə ri? An kamnyar tə giri amzhi dlu surthlipərna wa ni.

⁴⁴Kamnyar giri an maɗa' shatan na təddar giri. Antə giri ana bara hara su tə təddar giri ana bara. Kamnyar təng akwa baɗitari tsa mdər tsi mda, tsuwa su aɗi damitə ni ka jirkur wala raka wa, kamnyar tsa aɗi ka jirkur wa. Kəlara sakatə tsa akwa thlandər, tsa akwa ncantə halərni na gwangari, kamnyar tə tsa an mdər thlandər, ka təddar thlandərayeri.

⁴⁵Amma arna, kamnyar jirkur tə I akwa pəla ala giri, antə giri aɗi akwa hir hamta jiri ali wa.

⁴⁶Nənga wan akwa nca giri na ata amzhi ncanta abbər I ku ɗar hara biku ri? Tsuwa ma jirkur antə I akwa pəla ala giri, kamnyar mi tə giri aɗi akwa hamta jiri ali wa ri?

⁴⁷Kəlara mdə na ku ndzi mdər Hyel, tsa ana psi thləmari aka ndərər Hyel. Antə su na hara tə giri aɗi akwa psi thləm wa ni, an kamnyar tə giri aɗi mjir Hyel wa ni.”

⁴⁸Antə mjir Yahudi pəla alari, “Ai su tə yeru pəla ni jiri, abbər gə mdər Samariya ni, tsuwa shatan akwa dza gə ni!”

⁴⁹Antə Yesu pəla ala ɗa, “I aɗi ka shatan wa. I akwa nar olkur aka Təddarna, amma ar giri, giri aɗi akwa səlitə ra wa.

⁵⁰I aɗi akwa bara abbər ka mdə hu ra wa, amma mda aɗi na akwa bara ka mdə hu ra ni, tsuwa tsa an alkali ni na ata sə hara shariya ni.

⁵¹I akwa pəla ala giri jirkur, kəlara mdə na akwa nu surthlipərna, ba saka madi mdari aɗi ata ɗar su na mtə nə wa.”

⁵²Antə mjir Yahudi pəla alari, “Kulini antə yeru nggaɓəla abbər gə ka shatan ni ja. Ai Ibrahim ku mti, tsuwa naɓiyayeri ni ku mti, amma ga akwa pəla, ‘Kəlara mdə na akwa nu surthlipərna, ba saka madi mdari aɗi ata ɗar su na mtə nə wa!’

⁵³Gə ana wuta apa gə təramta baba' yeru Ibrahim na mtə ni ya? Tsuwa naɓiyayeri ni ma ku mti! Antə ar ngə ga akwa namtə kər nga abbər gə wa ri?”

⁵⁴Antə Yesu shinau ka pəla, “Ma I ka kəri an akwa haptə səliyirna, I aɗi ata ndzi ka səli na jirari wa. Amma mdə na akwa haptə səliyirna an Təddarna, natə giri akwa pəla abbər tsa an Hyelər giri ni.

⁵⁵Amma giri aɗi səndə ni wa. Arna, I asəndə ni. Ma I pəla abbər I asəndə ni wa, I ku ndzi mdər thlandər apa giri. Amma I asəndə ni, tsuwa I ana nu su tə tsa pəla.

⁵⁶Baba' giri Ibrahim ku hara kucali abbər ka tsa wutə vir səyirna, antə tsa ku wuti, ka hara kucali.”

⁵⁷Antə mjir Yahudi pəla alari, “Ga aɗi hara wala məva ntəfkumari katagu wa, amma ata pəla ga ku wutə Ibrahim?”

⁵⁸Antə Yesu pəla ala ɗa, “I akwa pəla ala giri jirkur, təng tə mda aɗi yaɓəla Ibrahim wa I aɗi.”

⁵⁹Antə da fatə pela abbər ka da ndzəndzəhtə ni kəgari. Amma Yesu ku ɗuwardzi, ka ləɓəla akwa mbwar vəngkər səli ni.