Read bura-pabir Yahwana 9 Bible Online

Yahwana 9 - bura-pabir bible

Yahwana 9

¹Sakatə Yesu akwa təramta, antə tsa wutə mdə laga tə mdə yaɓəla ni mdlyang təng akwa yarni.

²Antə mjirthlipərni yu ni abbər, “Maləm, bikər wa an hara tə mdə yaɓəla mdə ngəni mdlyang nə ri? Bikər mdə ni ka kərari, nənga bikər mjir yarni ri?”

³Antə Yesu pəla ala ɗa, “Aɗi abbər mdə ngəni an hara biku laga wa, wala mjir yarni wa, amma kamnyar ka Hyel ncantə dunar kuthlikurərni atar ni.

⁴Tar ka mburu ləkəma ka hara kəthlərər mdə na thlentə ra təng tə pci tsu aɗi, kamnyar viri ata hara, tə mda aɗi ata sə mzhi hara kəthlər wa.

⁵Ma ku ndzi I akwa duniya, I an parakər duniya ni.”

⁶Aghəla ndər ngəni antə tsa tifə mtili ata di, ka hərtə həi ka mtili ni, ka fadza aka nca mdə ni,

⁷akwa pəla alari, “Mwari, ka gə ra kəcimta nca ga akwa kufar Silowam.” Karapur Silowam ni an Thlenta. Antə mdə ni mwari, ka kəcimta ncari, ka ngka akwa wutə su.

⁸Antə ntəwulayeri arni kəga mji na tsəli ka wutə ni akwa kiɗə ni, pəla, “Aɗi ngəni an mdə na ana kiɗa andzəndzi ni wa ya?”

⁹Antə mji laga pəla, “I, tsa.” Amma mji laga pəla, “Awa, aɗi tsa wa, amma da dludzi.” Amma mdə ni ka kərari surni pəla, “Tsu Iya diya.”

¹⁰Antə da yu ni abbər, “Apa madi tə nca gə kəlardzi nə ri?”

¹¹Antə tsa pəla, “Mdə laga na ka thləmari Yesu an hərtə həi, ka fadza aka nci, ka pəla ‘Mwari ra kəcimta nca gə ni akwa kufar Silowam.’ Antə I mwari ka kəcimta nci ni, ka baɗitə wutə su.”

¹²Antə da yu ni, “Tsa ama ri?” Antə tsa pəla, “I aɗi səndə wa.”

¹³Antə da səntə mdə na ɗar ndzi mdlyang ni aka mjir Farisi.

¹⁴Vir tə Yesu hərtə həi ka kəlar nca mdə na mdlyang ni an Vir Ghərəmtaghəra.

¹⁵Antə mjir Farisi ni jaktə yu mdə ni ata kəra laku tə tsa baɗitə jaktə wutə su ni. Antə tsa pəla ala ɗa, “Tsa fadzə həi aka nci ni, antə I kəcimta nci ni, antə I akwa mzhi wutə su kulini.”

¹⁶Antə mji laga akwa nca mjir Farisi ni pəla, “Mdə na hara su ngəni tsa aɗi thlata adzə Hyel wa, kamnyar tsa aɗi ana ɓəla Vir Ghərəmtaghəra wa.” Amma mji laga pəla, “Apa madi tə mdər biku ata mzhi hara surndatayeri apani ri?” Antə da ku ndəkəidzi ka bwa suɗa.

¹⁷Antə da jaktə yu mdə ni abbər, “Ar ngə man tə gə pəla ata kərari ri, təng tə ga antə tsa kəlar nca gə ni?” Antə mdə ni pəla, “Tsa an naɓi.”

¹⁸Amma mji na ol'olər mjir Yahudi aɗi mbərsa abbər mdə ngəni ku ɗar ndzi mdlyang, kambəla ncari kəlardzi wa. Antə da thlentə ka mdə kəga ala ɗa mjir yar mdə na ɗar ndzi mdlyang ni.

¹⁹Antə da yu ɗa abbər, “Ngəni an ɓzər giri tə giri ana pəla mdə yaɓəla ni mdlyang ni ya? Ka, apa madi tə kulini tsa akwa mzhi wutə su nə ri?”

²⁰Antə mji na ya ni ni shinau ka pəla, “Ar yeru su tə yeru sənda an abbər ngəni ɓzər yeru, tsuwa mdə yaɓəla ni mdlyang.

²¹Amma laku tə tsa akwa mzhi wutə su kulini, yeru aɗi ka səndə su ata kər wa. Tsuwa yeru aɗi səndə mdə na kəlar ncari ni wa. Yu giri ni, ai tsa ku mzhi mda, tsa ata mzhi gari ka kərari.”

²²Mjir yarni pəla apani ni kamnyar da akwa thlivər mjir Yahudi. Kamnyar mjir Yahudi ku kurtə ɗəmha abbər kəlara mdə na ku pəla abbər Yesu an Kristi, to mda ata kədləɓəla ni akwa mbwar vəngkər səli ni.

²³An su na hara tə mjir yarni ni pəla, “Tsa ku mzhi mda, yu giri ni” ni.

²⁴Antə da jaktə kəga mdə na yaɓəladzi mdlyang ni, ka pəla alari, “Kahyel abbər ga ata ngkər ala yeru jirkur! Ar yeru, yeru asənda abbər mdə ngəni mbantə ngə ni tsa mdər biku.”

²⁵Antə mdə ni pəla, “Wala tsa mdər biku, wala tsa aɗi mdər biku wa, arna I aɗi səndə wa. Su duku tə I sənda an abbər hwatu I mdlyang, amma kulini I akwa wutə su.”

²⁶Antə da yu ni, “Man tə tsa hara ala gə ri? Tsa kəlar nca ga ni məmə ri?”

²⁷Antə tsa pəla ala ɗa, “I ku kurtə pəla ala giri hwatu, amma giri aɗi psi thləm wa. Kamnyar mi tə giri akwa bara jaktə nggatari ri? Nənga giri akwa bara ndzi mjirthlipərni tsu ri?”

²⁸Antə da nggəl ni ka pəla, “Tar gə ja an mdərthlipərni ni! Ar yeru, yeru mjirthlipər Musa diya!

²⁹Yeru ku sənda abbər Hyel ku gari aka Musa, amma ar mdə ngəni ni, yeru aɗi səndə vəi tə tsa thlata akwa wa.”

³⁰Antə mdə ni shinau ala ɗa ka pəla, “Məi, nggə sur ndatə ja mara! Ka mdə ngəni kəlar nci, amma har giri asəndə vəi tə tsa thlata akwa wa!

³¹Mburu asənda abbər Hyel aɗi ana psi thləm aka mjir biku wa, tar mji na ana vəngkər səli alari, ka hara su tə tsa hira.

³²Təng akwa baɗitər duniya, mda aɗi ɗar nggata abbər mdə laga ku kəlar nca mdə na yaɓəladzi mdlyang wa.

³³Antə ma mdə ngəni aɗi thlata adzə Hyel wa, tsa aɗi ata mzhi hara su ngəni wa.”

³⁴Antə da shinau ka pəla alari, “Gə na kəlkəla akwa biku bwakəma ka bwahili! Antə ga an ata thlipa ala yeru su tsu ya?” Antə da kədləɓəla ni akwa mbwar vəngkər səli ni.

³⁵Yesu ku nggata abbər da ku kədləɓəla mdə ni. Apani sakatə tsa wutə ni, antə tsa yu ni abbər, “Ga ku hamta jiri aka Ɓzər Mdə ya?”

³⁶Antə mdə ni shinau alari ka pəla, “Tsan wa ri, zanuwa? Pəla ali mdari kamnyar kəi hamta jiri alari.”

³⁷Antə Yesu pəla alari, “Ga ku wutə ni, kamnyar tsa an akwa gari ka gə ni.”

³⁸Antə mdə ni pəla, “Mthlaku, I ku hamta jiri!” Antə tsa vəngkər səli alari.

³⁹Antə Yesu pəla, “I si akwa duniya ni kamnyar hara shariya, abbər ka mji na mdlyang wutə su, ka mji na akwa wutə su ndzi mdlyang tsuwa.”

⁴⁰Sakatə mjir Farisi laga adzə ni nggatə gari ngəni, antə da yu ni abbər, “Wala yeru ma, yeru mdlyang ya?”

⁴¹Antə Yesu pəla ala ɗa, “Ma giri an mdlyang, sakani giri aɗi ka biku wa. Amma təng tə giri pəla abbər giri akwa wutə su ni, bikər giri ni tsu aɗi.”