Read bura-pabir Kəth Apos 1 Bible Online

Kəth Apos 1 - bura-pabir bible

Kəth Apos 1

¹Aka Thliyofilus: Tsu akwa kakaɗu na ntangkəma nda, antə I ku rəbuta ata kəra shanga suayeri natə Yesu ku hara ka thlipə tsu akwa sakatə tsa ku baɗitə kəthlərərni,

²har ka vədza aka saka natə mdə ku sə kətə ni ka ləmtazi ka tsa. Amma akəmata mda akətə ni ka ləmtazi ka tsa, antə tsa ku hamta tsawa atar dunar Mambəl na Ɓɗakkarkara aka mji natə tsa ku carɓəla ɗa ka da ndzi aposəlayeri arni.

³Tsuwa akwa virayeri nfwarkumari aghəla thlatərni akwa mtəmta, antə tsa ku ncantə kərni ala ɗa akwa lakwayeri na zumzum hang, kamnyar ka da mbərsa kula nuhum abbər tsa ka mpika. Da ku wutə ni, antə tsa ku gari ala ɗa ata kəra kuthlikurər Hyel.

⁴Sakatə da ku tsaptədzi ata kəma duku, antə tsa tsawa ala ɗa abbər, “Giri aɗiya zhar Urushalima wa, amma ka giri səkə nghyaɓəladzər alkawal tə Təddarna hara ala giri ni katagu, apatə I pəla ala giri abbər,

⁵Yahwana ku hara baptizma ka yimi, amma aghəla saka laga raka, mda ata sə hara ala giri baptizma ka Mambəl na Ɓɗakkarkara,” ni.

⁶Sakatə aposəlayeri ku tsaptədzi kəga Yesu, antə da ku yu ni abbər, “Mthlaku, akwa saka ngəni antə ga ata jaktə hamta kuthlikur aka Israila ya?”

⁷Antə Yesu pəla ala ɗa, “Təddarna shini an ka dunar ɗəmhə sakayeri ka zamanayeri, amma giri mda aɗi tura ka giri səndə suayeri ngəni wa.

⁸Amma giri ata sə dlu duna, sakatə Mambəl na Ɓɗakkarkara ku si ata kəra giri, antə giri ata sə ndzi mjir seɗarna akwa Urushalima, ka akwa Yahudiya, ka Samariya, har kəl ka datər duniya.”

⁹Aghəla sakatə tsa ku pəla ngəni, antə mdə ku kətə ni akwa ləmtazi ka tsa, tə da akwa wul ni. Antə tsa ku sha ala ɗa akwa dlamba, tə da aɗi wutə ni kəra wa.

¹⁰Amma sakatə da tsu akwa wul ni ata ləmtazi, antə nggədza mji suɗa aɗi athləthlata adzə ɗa hahari ka ləptayeri na mwapmwapu,

¹¹antə da pəla, “Giri na mjir Galili, kamnyar mi tə giri athləthlata akwa wul amtazi ri? Yesu ngəni, mdə kəta adzə giri akwa ləmtazi ka tsa ni, ata jaktə si tsu apatə giri ku wutə ni akwa ləmtazi ni.”

¹²Sakatə aposəlayeri ku sə zhar Gar Zaitun ka ngka ahar Urushalima, natə daɓwa ɗa an apa saɓəlkur mwar Vir Ghərəmtaghəra, watau kilomita pal.

¹³Sakatə da ləkwa bərni ni, antə da mwari ka ləkwa mbwa na amta tə da ndzəndzi akwa nda. Mji na mwari ni an Bitrəs, ka Yahwana, ka Yakub, ka Andrawus, ka Filibus, ka Thlomas, ka Barthlolomiu, ka Mathliyu, ka Yakub na ɓzər Halfa, ka Siman na ka thləm gyalərni Mdər hir tsəɗiyirni, ka Yahuda na ɓzər Yakub.

¹⁴Shanga mji ngəni ni ku mnya duku ka hamta kərɗa akwa hara adduwa tədəku, ata kəma duku kəga mwanki laga, ka Maryamu na mama' Yesu, kəga maɗama'ni tsuwa.

¹⁵Tsu akwa virayeri ndaga, antə mjir nuwa ku tsaptədzi ata kəma duku, tə hangkurər ɗa shang ku hara apa aru pal ka sərkumari. Antə Bitrəs thlata akwa nca ɗa ka pəla,

¹⁶“Maɗaməma,[1] ku ndzi dwali ka su tə Mambəl na Ɓɗakkarkara pəla aka Dauda ata kəra Yahuda akwa kakaɗər Hyel ni, nghyaɓəladzi, watau abbər Yahuda an ata pwar mji ka da ngkəi Yesu ni.

¹⁷Kamnyar sakanda Yahuda akwa nca mburu, har mdə ku hamta alari bwar kəthlər arni.”

¹⁸Nggədza kulini, tsa ku mastə vəi laga ka kwabar kəmanggarkur ni. Antə tsa ndla ka ncir kərari, tə busari ndəlamtadzi ata ɗəffu, har tə shanga su na akwa busari ni puɓəladzi.

¹⁹Tsuwa shanga mjir Urushalima ku nggatə su ata kər, antə apani ana kəga thləma vəi ngəni akwa mnyar ɗa abbər Akeldama, natə karapwari an, Fakər Mamshi.

²⁰“Kamnyar mdə ku rəbuta akwa kakaɗər Zabura abbər, “ ‘Ka kəyirni ndzi kula mda, Mda aɗiya mbilar mda akwa wala duku wa.’ Tsuwa mdə rəbuta abbər, ‘Ka mdə damwa kətə vəi kəthlərərni.’ ”

²¹“Antə apani ku ndzi dwali ka mdə carɓəla mdə laga akwa nca mji ngəni, mji na akwa nu mburu tədəku akwa kəlara sakatə Mthlakər mburu Yesu akwa ləɓəla ka səvi ni.

²²Kalkal ka tsa ndzi abbər mdari ku ndzi ata kəma duku ka mburu təng sakatə Yahwana akwa hara baptizma, har ka mwanta aka sakatə Yesu Hyel kətə Yesu adzə mburu ka ləmtazi ka tsa. Tsuwa kalkal mdari ku wutə thlatərni akwa mtəmta.”

²³Apani antə səntə thləma mji suɗa, Yusuf natə mda ana kəga ni Barsaba, wala tsuwa Yustus, ka Mathliyas.

²⁴Antə da hara adduwa abbər, “Mthlaku, gə na asəndə ɗəffa shanga mji, ncaɓəla ala yeru mdə tə gə carɓəla akwa nca mji ngəni suɗə ni,

²⁵ka tsa ndzi mdər ngkər labarər nga, ka tsa kətə vəi ndzəndziyir Yahuda, na shinadzə bwahili ka mwari akwa vəi na ar kərari ni.”

²⁶Antə da ku hara cara akwa daɓwa mji suɗə ni, antə car ni ku kətə Mathliyas. Antə tsa ləkwa nca aposəlayeri ngəni kumkantang ni.