Read bura-pabir Kəth Apos 11 Bible Online

Kəth Apos 11 - bura-pabir bible

Kəth Apos 11

¹Tsuwa aposəlayeri ka mambila mjir nuwa na akwa tsəɗi Yahudiya ku nggata abbər mji na aɗi mjir Yahudi wa ku dlu ndərər Hyel tsuwa.

²Sakatə Bitrəs mwari ahar Urushalima, antə mjir Yahudi na ol'ola akwa nuwa, na ana pəla dwali ka mdə thla kaciya ni, ku pəlangkər alari.

³Da pəla, “Kamnyar mi tə gə mwari adzə mji na kula kaciya, har ka gə səm susəm kəga da ri?”

⁴Antə Bitrəs baɗitə ngkərɓəla ala ɗa su na hara, ata ata, abbər,

⁵“I akwa hara adduwa akwa bərni Yoppa, təng su laga kəlar nci, tə I wutə su laga apa zhaɓi na ola ka kuɗəma nfwar, thlata amtazi akwa səghəi, ka si adzə ra.

⁶Sakatə I akwa wul su ni njingnga, təng I wutə mwaɓiyayeri ar kəi, ka mwaɓiyayeri ar mtaku, ka suayeri na ana mwa ka yimər kuta ɗa ata di apa pwapu kəga tawula, ka ɗikayeri ar mtaku.

⁷Antə I nggatə kuraku akwa pəla ali, ‘Bitrəs, thlata, ka gə tsi, ka gə ɓɗa!’

⁸Amma I pəla, ‘Awa, Mthlaku wa! Kamnyar su aɗi na ka diɗi, wala na dlimbur na ku ɗar ləkwa mnyi wa.’

⁹Antə I jaktə nggatə kuraku na suɗkurari akwa pəla, ‘Su tə Hyel ku kəcimta, ga aɗiya pəla abbər tsa ka diɗi wa.’

¹⁰Su ngəni hara ka makər, antə mdə jaktə kətə su ni ka ləmtazi kəgari.

¹¹Tsu ata saka nda antə mji laga makər si ka thləthlata anyarfur kəi tə yeru akwa ni, da thlata ahar Kaisariya, mdə thlentə ɗa adzə ra.

¹²Antə Mambəl ni pəla ali abbər ka yeru mwari kəga da, I aɗiya ndzi tihtihha abbər kamnyar tə da dur gapani wa. Antə mji nu ngəni ngkwa ni tsuwa ku pwar ra, har tə yeru səvi akwa kəyir mdə ni.

¹³Antə tsa pəla ala yeru laku tə tsa wutə mdərthlentərhyel athləthlata aviyar ngkiɗa, akwa pəla, ‘Thlentə mda ahar Yoppa ka tsa ra si ka Siman natə mda ana kəga thləmari Bitrəs.

¹⁴Tsa ata ngkər ala gə ndər na ata hara ka gə wutə mbantədzi, ga ka shanga mjir kutakəyir nga.’

¹⁵Sakatə I baɗitə gari ni, antə Mambəl na Ɓɗakkarkara si ata kəra ɗa tsu apatə tsa si ata kəra mburu akwa baɗitari ni.

¹⁶Antə I ɗangtə ndər tə Mthlaku pəla abbər, ‘Yahwana ku hara baptizma ka yimi, amma ar giri mda ata sə hara ala giri baptizma ka Mambəl na Ɓɗakkarkara.’

¹⁷Antə ma Hyel ku hamta ala ɗa cauta tsu apatə tsa hamta ala mburu akwa sakatə mburu hamta jiri aka Mthlaku Yesu Kristi nda, I wa ri, tə I ata mzhi ngkatə Hyel ni!”

¹⁸Sakatə da nggatə ndər ni, antə mjir Yahudi ni dləɓ səri, ka ləkwa hu Hyel akwa pəla, “Azha wala dur gapani Hyel ku na ɗa lakur tubi tə ka da wutə mpika.”

¹⁹Tsuwa mji laga akwa nca mjir nuwa na titiləmtadzi kamnyar bwani na thlata kamnyar tsi Istifanus, ku təra ciju har ka mzhitə Finikiya, ka Saiprus, ka Antakiya, akwa ngkər aka mjir Yahudi daci.

²⁰Amma mjir aɗi tsuwa na thlata ahar Saiprus, ka Sayirin, na ku mwari ahar Antakiya ka gari aka mjir Helleni, akwa ngkər ala ɗa labar na msəra ata kəra Mthlaku Yesu.

²¹Tsuwa Mthlaku ku ndzi adzə ɗa, antə mji hang ku hamta jiri, ka nu Mthlaku.

²²Sakatə ndər ngəni mzhitə ikələziya na ahar Urushalima, antə da thlentə Barnabas ahar Antakiya.

²³Sakatə tsa si ka wutə laku tə Hyel hara ɓɗakkur aka mji na anda, su ni ku ndzi msəra alari. Antə tsa jaktə dunautə shanga ɗa abbər ka da ndzi ka jirkur aka Mthlaku ka ɗəffa ɗa shang.

²⁴Kamnyar tə Barnabas an mdə na pwa, mdə na nghyinghyari ka Mambəl na Ɓɗakkarkara, ka hamta jiri, antə mji hang ku dlu Mthlaku akwa ɗəffa ɗa.

²⁵Antə Barnabas ku mwari ahar Tarsus kamnyar bara Shawulu.

²⁶Sakatə tsa wutə ni, antə tsa səntə ni ahar Antakiya. Antə da hara məva pal cur akwa tsaptədzi kəga mjir ikələziya, ka thlipa aka mji dlama dlama. Azi ahar Antakiya antə mji baɗitə kəga mjir nuwa abbər mjir Krishan.

²⁷Tsuwa akwa nda naɓiyayeri ana thlata ahar Urushalima ka ləghəi ahar Antakiya.

²⁸Antə pal akwa nca ɗa na ka thləmari Agabus, ku thlata, ka gari ka dunar Mambəl na Ɓɗakkarkara, abbər mi na mwavər ata sə hara akwa shanga duniya. Antə su ngəni ku sə hara akwa zamanər Klaudiyus.

²⁹Antə mjir nuwa ni ɗəmha abbər ka waskəi səntə su apatə dunari amzha, kamnyar dlar mjir nuwa na ahar Yahudiya.

³⁰Antə da ku hara apani, ka sə thlentə kwaba ni aka mji olˈola ar ikələziya atar Barnabas ka Shawulu.