Read bura-pabir Kəth Apos 12 Bible Online

Kəth Apos 12 - bura-pabir bible

Kəth Apos 12

¹Akwa saka na antə Kuthli Hirudus baɗitə hara bwani aka mji laga akwa ikələziya.

²Tsa tsi Yakub na ɓzərma' Yahwana ka katsakar.

³Sakatə tsa ku wuta abbər su ngəni ku ndzi msəra aka mjir Yahudi, antə tsa ləkəma kəgari, ka ngkəi Bitrəs tsuwa. Su ngəni hara akwa sakar Kucalər Buradi Na Kula Yist.

⁴Sakatə da ku ngkəi Bitrəs, antə da vu ni akwa pərsəna, ka vu ni akwa tsiya mjir gadi kumnya ngkwa, na ndəkəidzi akwa zarayeri nfwar, akwa gadi ni. Antə Hirudus ku thlamta akwa ɗəffari abbər aghəla susəmər Kucalər Fəlɓəla Kəi ni tsa ata si səntə Bitrəs akəma mji.

⁵Antə mdə ku kəsi Bitrəs akwa pərsəna, amma mjir ikələziya ku hara adduwa ka jirkur aka Hyel kamnyar ni.

⁶Amma tsu aviri tə ma vir ni ku kuri Hirudus ata mwantə ni akəma alkaliyayeri ni, təng Bitrəs mbwambwari ka canayeri suɗa, akwa daɓwa sojayeri suɗa, akwa ləkəma ka henərni. Nggədza tsuwa mjir gadi aɗi akwa nyarfur pərsəna ni akwa gadi.

⁷Təng mdərthlentər Mthlaku si kula səndər ɗa, antə parakəu laga mbəlantə kutambwa natə tsa akwa ni. Antə mdərthlentərhyel ni tsarar Bitrəs ata pathlahari, ka thlentə ni, akwa pəla alari, “Thlatə taktar.” Təkəma antə canayeri ni pumtadzi ata tsiya Bitrəs.

⁸Antə mdərthlentərhyel ni pəla, “Hatə kariyir nga, ka ra hatə ɓaɓiyir nga.” Antə Bitrəs ku hara apatə mdə pəla alari. Antə tsa ni pəla aka mdə ni, “Hangkər ləptər nga, ka gə nu ra.”

⁹Antə Bitrəs nutə ni tə da ləɓəla, amma təng tsa akwa nggari apa tsa akwa suni daci. Tsa aɗi nggaɓəla abbər su tə mdərthlentərhyel akwa harari ni ata ndzi jiri wa.

¹⁰Sakatə da ku təramta mdər gadi na ntangkəma ka na suɗkur, ka si adzə nyarfur liya na aləbwar kuta bərni ni, antə nyarfu ni kəlardzi ala ɗa ka kərari surni. Antə da ləɓəla. Sakatə da ku ləɓəla ka nutə lakur kuta di laga, təng təkəma mdərthlentərhyel ni təra kazhar ni.

¹¹Sakatə Bitrəs ngka akwa hangkalari, antə tsa pəla, “Kulini I ku nggaɓəla abbər su ni jiri! Mthlaku an thlentə mdərthlentərni ka tsa si msərantə ra akwa Hirudus, ka shanga ɗimikur tə mjir Yahudi akwa bara hara ali.”

¹²Sakatə tsa ku nggaɓəla apani antə tsa ku mwari ahar Maryamu, na mama' Yahwana na ka thləm gyalərni Markus, akwa vəi tə mji tsaptədzi hang akwa hara adduwa kamnyar ni.

¹³Sakatə Bitrəs tsarar nyarfu, antə ɓzərngkwa laga ka thləmari Ruda si ka tsa nggatə suari.

¹⁴Amma sakatə tsa nggaɓəla abbər kuraka Bitrəs, antə ɗəffari ndzi msəra alari ka duna, har tə tsa ngka avi ka hwi, kula tsa kəlar nyarfu ni, kamnyar kucali. Antə tsa pəla ala ɗa, “Bitrəs diya an aɓəla akwa nyarfu ni!”

¹⁵Antə da pəla, alari, “Gə ka cicu ya!” Amma tsa ndzangkir akwa pəlari abbər jiri. Antə da pəla, “Sakani mdərthlentərni.”

¹⁶Amma Bitrəs ləkəma ka tsa nyarfu ni. Sakatə da si ka kəlar nyarfu ni, təng da wutə ni, antə da ndatədzi.

¹⁷Amma tsa gari ala ɗa ka tsiyari abbər ka da ndzi ɗiɗi, antə tsa baɗitə ngkərɓəla ala ɗa laku Mthlaku kəɓəla ni akwa pərsəna ni. Antə tsa pəla, “Ka giri pəla ndər ngəni aka Yakub, ka mambila mjir nuwa.” Antə tsa zhar ɗa ka təra mwari akwa vəi damwa.

¹⁸Sakatə viri ku kuri, aɗi thlentə hangkal na raka an thlata akwa daɓwa sojayeri ni ata kəra su na wutə Bitrəs nə wa.

¹⁹Sakatə Hirudus ku pakə ni, amma tsa aɗi wutə ni wa, antə tsa yuwa mjir gadi ni, ka tsawa abbər ka mdə tsəgəi ɗa. Aghəla nda antə Hirudus zhar tsəɗi Yahudiya, ka mwari ahar Kaisariya ka ndzəndzi anda.

²⁰Akwa saka nda, ɗəffa Hirudus ɓzəɓzari ata kəra mjir Taya ka mjir Sidon. Antə da mwari adzə ni ata kəma duku kamnyar kəɓa ka tsa. Tsuwa da ku ndəkərtə hangkala Bilastus, olər mjir kəthlər aka kuthli, abbər ka tsa dlar ɗa. Antə da ku mwari adzə Hirudus ka yu ni abbər ka da shwalatədzi, kamnyar da ana wutə susəmər ɗa akəla tsəɗiyir kuthli ni.

²¹Akwa vir tə da carɓəla abbər da ata kəɓa ni, antə Hirudus hatə ləptər kuthlikurərni, ka ndzəndzi ata kəra dəkəl kuthlikurərni, ka gari ala ɗa.

²²Antə mji ni putə kuraku abbər, “Ngəni kuraka hyel, aɗi kuraka mdə wa!”

²³Təkəma təng mdərthlentər Mthlaku tsa ni, kamnyar tsa aɗi nar səli aka Hyel wa. Antə kulamnyayeri ləkwa ɓɗəɓɗə ni har tə tsa mta.

²⁴Amma ndərər Hyel ku jakjaka ka ləkəma ka titilidzi.

²⁵Sakatə Barnabas ka Shawulu ku kuri kəthlərər ɗa, antə da zhar Urushalima ka ngka avi, tsuwa da si kəga Yahwana natə mda ana kəga ni Markus.