Read bura-pabir Kəth Apos 13 Bible Online

Kəth Apos 13 - bura-pabir bible

Kəth Apos 13

¹Akwa ikələziya na ahar Antakiya ni, naɓiyayeri kəga maləmayeri aɗi, apa Barnabas, ka Siman natə mda ana kəga ni Mənggəl, ka Lukiyus na mdər Sayirin, ka Manayin na kəla adzə Kuthli Hirudus, ka Shawulu.

²Sakatə da akwa vəngkər səli aka Mthlaku ka hara asham, antə Mambəl na Ɓɗakkarkara pəla ala ɗa, “Ka giri pwi ali Barnabas ka Shawulu, kamnyar kəthlər natə I kəga ɗa kamnyari.”

³Aghəla sakatə da ku hara asham ka hara adduwa, antə da pungkər tsiya ɗa ata kəra ɗa, ka thlentə ɗa.

⁴Sakatə Mambəl na Ɓɗakkarkara ku thlentə Barnabas ka Shawulu, antə da mwari ahar Selukiya, ka ləkwa shar anda ka mwari ahar Saiprus.

⁵Sakatə da mzhitə Salamis, antə da ngkər ndərər Hyel akwa mbwar vəngkər səli. Tsuwa Yahwana adzə ɗa, kamnyar dlar ɗa akwa kəthlər.

⁶Sakatə da ku dlarhə ɗəɗəgəl ni shang, har ka mzhitə Pafos, antə da si adzə mdər Yahudi laga na ana hakdzi, tsa an naɓi na ana thlandər, ka thləmari Bar Yesu.

⁷Tsa ana kəthlər ata vəi duku ka gwamna Sergiyus Bulus, tsuwa tsa mdə na ɗəɗu. Antə gwamna ni kəga Barnabas ka Shawulu kamnyar ka tsa nggatə ndərər Hyel akəla ɗa.

⁸Amma Elimas na ɗeagha ni bara ngkatə gwamna ni ta tsa asə hamta jiri. Elimas ni an thləma Bar Yesu ni akwa mnya Helleni.

⁹Amma Shawulu natə mda ana kəga ni Bulus, na nghyinghyari ka Mambəl na Ɓɗakkarkara, ku wul ni njingnga,

¹⁰ka pəla, “Gə ɓzər Shatan! Gə dawar shanga su na ka jirkur! Gə hir thlandər ka shanga su na ɗimi ɗimi kamta! Ga aɗi ata zhar mbaləmta lakur Mthlaku na dwaɗu nə wa ko?

¹¹Antə kulini Mthlaku ata ɗi nga! Ga ata ndzi mdlyang, antə ga ata ɗarndzi kula gə wutə parakər pci.” Təng təkəma tsa nggatə su laga apa ɗuza ka kuthlu hartə ncari, tə tsa ləkwa mwa ka tətəm su, akwa bara mdə na ata kəsi tsiyari ka pwar ni.

¹²Sakatə gwamna ni wutə su na ku hara, antə tsa hamta jiri, kamnyar tsa ku ndatədzi ka duna ata kəra surthlipə ngəni ata kəra Mthlaku ni.

¹³Antə Bulus kəga mjir mwarni ləkwa shar ahar Pafos ka mwari ahar Perga akwa tsəɗi Pamfiliya. Antə Yahwana zhar ɗa anda ka ngka ahar Urushalima.

¹⁴Amma arɗa da thlata anda ahar Perga ni ka mwari ahar Antakiya na akwa Pisidiya. Akwa Vir Ghərəmtaghəra antə da ləkwa mbwar vəngkər səli ka ndzəndzi.

¹⁵Aghəla sakatə mdə ku karata akwa tsawur Musa ka akwa kakaɗayeri ar naɓiyayeri, antə mji na ol'olər mbwar vəngkər səli ni thlentə ala ɗa akwa pəla, “Maɗaməma, ma giri ka sauri tə giri ata hamta aka mji ngəni, giri ata mzhi hamtari kulini.”

¹⁶Antə Bulus thlata, ka gari ka tsiyari akwa pəla, “Mjir Israila, ka shanga giri na ana thlivər ɗəffa Hyel, psi thləm!

¹⁷Hyelər mjir Israila ku carɓəla kəkayeri ar mburu ka namtə ɗa tə da ndzi hang akwa sakatə da mətəpi akwa Masar. Aghəla nda antə Hyel fwaɓəla ɗa akwa Masar atar dunar kuthlikurərni.

¹⁸Antə tsa mbwi ɗəffari ka da mnyar məva nfwarkumari akwa mtaku.

¹⁹Sakatə tsa ku shamta durayeri murfa akwa tsəɗiyir Kanana, antə tsa kətə tsəɗi ni ka hamta aka mjirni ka tsa ndzi apa kifər ɗa.

²⁰Shanga su ngəni kətə apa məva aru nfwar ka ntəfkumari. “Aghəla nda antə tsa hamta ala ɗa alkaliyayeri har ka vədza aka sakar naɓi Samiwal.

²¹Antə da kiɗa abbər ka mdə vəi ala ɗa kuthli, antə Hyel hamta ala ɗa Shawulu ɓzər Kish, na akwa nyarmbwar Benjamin, antə tsa hara kuthlikur mnyar məva nfwarkumari.

²²Sakatə Hyel kəɓəla ni, antə tsa sə vəi Dauda ka tsa ndzi kuthlir ɗa. Hyel pəla ata kəra Dauda abbər, ‘I ku wutə abbər Dauda na ɓzər Yesse ni an mdə na ku kəɓatə kəri. Tsa ata hara shanga su tə I hira.’

²³Atar durər mdə ngəni, antə Hyel sənta aka Mdər mbantə laga, ka thləmari Yesu apatə tsa ku hara alkawalari.

²⁴Amma akəmata Yesu asi, Yahwana ku ngkər aka mjir Israila abbər ka da tubi, ka mdə hara ala ɗa baptizma.

²⁵Sakatə Yahwana abaka kuri kəthlərərni, antə tsa pəla, ‘Giri akwa dzama abbər I wa ri? Diya, I aɗi an tsa mai. Amma tsa akwa lakur si aghəli, natə ɓɗakkurərna aɗi mzhi kəi mpəli səwur ɓaɓiyir səlari wa.’

²⁶“Maɗaməma, giri na akwa nyarmbwar Ibrahim, ka tsuwa giri na dur gapani, na ana thlivər ɗəffa Hyel, ala mburu shang antə mdə thlentə labar mbantədzi ngəni ni!

²⁷Kamnyar mji akwa Urushalima ka mjir ɗa na ol'ola aɗi nggaɓəla abbər tsa an Mdər Mbantə nə wa, wala nggaɓəla ndərayeri tə naɓiyayeri rəbutə tə mda ana karatə tədəku Vir Ghərəmtaghəra nə wa. Amma da nghyaɓəla ndərayeri ngəni atar thlamta alari shariya mta.

²⁸Wala tə da aɗi wutə su tə ka da tsi ni kamnyari wa, tsu da ku kiɗə kəra Bilatus abbər ka mdə tsi ni.

²⁹Aghəla tə da ku nghyaɓəla shanga suayeri tə mdə rəbuta ata kərari akwa kakaɗu, antə da kəli ni kazhar udzəm kadləkadlə ni, ka vu ni akwa kula.

³⁰Amma Hyel ku thlentə ni akwa mtəmta.

³¹Antə tsa hara vir hang akwa ncantə kərni aka mji na thlata ahar Galili har ka mwari ahar Urushalima ata kəma duku kəga tsa, natə kulini da an seɗayeri arni aka mji ni.

³²“Antə yeru ku sənta ala giri labar na msəra ni, abbər su tə Hyel hara alkawalari aka kəkayeri ar mburu ni,

³³tsa ku nghyaɓəla ala mburu, mburu na kəkayeri arɗa atar thlentə Yesu ka mpika, tsu apatə mdə rəbuta akwa Zabura na suɗkur abbər, “ ‘Ga an Ɓzərna, ashina I ku ndzi Təddar nga.’ ”

³⁴“Tsuwa təng tə Hyel ku thlentə ni akwa mtəmtə ni, tsa aɗi ata jaktə mtə kəra wa, zhar ka dzari hiɗa wa. Kamnyar Hyel ku pəla, “ ‘I ata hamta ala gə barkayeri ngəni barkayeri na ɓɗakkarkara ka na jiri, natə I kətə alkawalari aka Dauda.’ ”

³⁵“Kamnyar tsa ku pəla akwa Zabura laga tsuwa abbər, “ ‘Ga aɗi ata zhar Mdər nga na Ɓɗakkarkara ka tsa hiɗa wa.’ ”

³⁶“Kamnyar aghəla tə Dauda ku hara kəthlər aka mjir Hyel akwa zamanərni, antə tsa ku mti, tə mdə ku harəmta ni adzə kəkayeri arni, tə dzari ku hiɗa.

³⁷Amma ar Yesu natə Hyel ku thlentə ni, tsa aɗi hiɗa wa.

³⁸Antə apani maɗaməma, ka giri sənda abbər atar Yesu ngəni tə yeru akwa psəmnya ni ni, antə mdə ata tifəmta ala giri bikər giri.

³⁹Tsuwa atar ni antə kəlara mdə na ku hamta jiri alari, ata msərantədzi ta shanga bikayeri tə tsawur Musa aɗi mzhi msərantə ni akwa wa.

⁴⁰Antə ka giri hara hangkal ta su tə naɓiyayeri pəla ni asə wutə giri abbər,

⁴¹“ ‘Wul giri, giri na ana mnya ɗimi! Giri ata ndatədzi ka mtəgəmtadzi! Kamnyar I ata hara su akwa sakar giri, natə wala ma mdə pəla ala giri, giri aɗi ata mbərsatari wa’ ”

⁴²Sakatə Bulus ka Barnabas akwa ləɓəla akwa mbwar vəngkər səli ni, antə mji ni kiɗə ɗa abbər ka da sə jaktə ngkər ala ɗa Vir Ghərəmtaghəra na ata si.

⁴³Sakatə mji ku titila akwa tsaptədzi ni, mjir Yahudi aɗi hang kəga durayeri damwa na ləkwa addinər mjir Yahudi ka jirkur, na nutə Bulus ka Barnabas. Antə aposəlayeri ni ku dunautə ɗa abbər ka da ləkəma ka ndzi ata kəra ɓɗakkur tə Hyel akwa hara ala ɗa.

⁴⁴Sakatə Vir Ghərəmtaghəra ku jaktə si, abaka shanga mji na akwa di ni an tsaptədzi kamnyar nggatə ndərər Hyel.

⁴⁵Amma sakatə mjir Yahudi wutə mji na tsaptədzi ni, antə da ləkwa səlka, ka beɗi ata kəra su tə Bulus pəla, har ka nggənggəl ni.

⁴⁶Amma Bulus ka Barnabas ku gari kula thlivəra abbər, “Ku ndzi dwali abbər tar ka mdə ngkər ndərər Hyel ala giri ntangkəma. Amma təng tə giri ku nggəlari, ka namtə kəra giri abbər giri aɗi mzhi ka giri wutə mpikə na akur wa wa, antə yeru zhar giri ka mwari adzə durayeri damwa.

⁴⁷Kamnyar apani antə Mthlaku ku tsawa ala mburu abbər, “ ‘I ku namtə nga ka gə ndzi parakəu aka durayeri damwa, kamnyar ka gə mwantə mbantədzi har ba akwa datər duniya.’ ”

⁴⁸Sakatə mji na dur gapani ku nggata apani antə da hara kucali, ka hu ndərər Hyel. Antə vir nda mji hang tə mdə ku ɗəmha ala ɗa mpikə na akur wa, ku hamta jiri.

⁴⁹Antə ndərər Mthlaku ku titiləmtadzi akwa shanga tsəɗi nda.

⁵⁰Amma mjir Yahudi ku mbwantə ɗəffa mwanki na ol'ola na akwa nu Hyel ka jirkur, kəga mji na ol'olər bərni ni, har tə da baɗitə hara bwani aka Bulus ka Barnabas, ka kədləɓəla ɗa kazhar tsəɗiyir ɗa.

⁵¹Antə aposəlayeri ni ku ɓumta bərbər na ata səla ɗa ka ndzi seɗa ata kəra ɗa, ka təra mwari ahar Ikoniya.

⁵²Antə mjir nu na ahar Antakiya ku nghyi ka kucali ka tsuwa Mambəl na Ɓɗakkarkara.