Read bura-pabir Kəth Apos 15 Bible Online

Kəth Apos 15 - bura-pabir bible

Kəth Apos 15

¹Amma mji laga aɗi na thlata ahar Yahudiya ka si ahar Antakiya akwa thlipa aka mjir nuwa abbər, “Giri amzhi wutə mbantədzi wa, tar ma mdə ku thla ala giri kaciya apatə tsawur Musa ku pəla.”

²Sakatə Bulus ka Barnabas ku kəɗar beɗi kəga da ata kəra ndər ngəni, antə da sə thlamta abbər ka Bulus, ka Barnabas, ka mji laga na ahar Antakiya, mwari ahar Urushalima, ka da kəɓa kəga aposəlayeri kəga mji na ol'olər ɗa ata kəra wujir ngəni.

³Antə mjir ikələziya ku vu ɗa akwa laku, antə da təramta akwa Finikiya ka Samariya, akwa hamta labar ata kəra laku tə durayeri damwa tubi ka dlu ndərər Hyel. Antə shanga mjir nuwa na akwa diyayeri ni ku nggatə msərakur labar ni.

⁴Sakatə da ku mzhitə Urushalima, antə mjir ikələziya, ka aposəlayeri, ka mji na ol'ola, ku dlu ɗa ka kucali. Antə Bulus ka Barnabas ngkər ala ɗa shanga su tə Hyel hara atar ɗa.

⁵Amma mjir nu laga na akwa nca mjir Farisi, thlatə ka pəla, “Dwali ka da thla kaciya, tsuwa ka mdə tsawa ala ɗa ka da ɓəla tsawur Musa.”

⁶Antə aposəlayeri ni kəga mji na ol'ola ku tsaptədzi ata kəma duku kamnyar dzama ata kəra wujir ngəni.

⁷Aghəla sakatə mji ku gari hang ata kər, antə Bitrəs thlatə ka pəla, “Maɗaməma, giri ku sənda abbər akwa saka na təramta Hyel ku carɓəla ra akwa nca giri, kəi ngkər labar na msəra ni aka durayeri damwa, kamnyar ka da nggata, ka hamta jiri akari.

⁸Antə Hyel na asəndə su na akwa ɗəffa mda, ku ncanta abbər tsa ku dlu ɗa, ka hamta ala ɗa Mambəl na Ɓɗakkarkara tsu apatə tsa hamta ala mburu.

⁹Tsa aɗi ncantə zumzumkur akwa daɓwa mburu kəga da wa, amma tsa ku kəcimta ɗəffa ɗa ata kəra hamta jirər ɗa.

¹⁰Antə kulini, kamnyar mi tə giri akwa bara ngkərtə Hyel atar vəngkər kəl na ata nggyar mda ata kəra mjir nu nə ri, kəl natə wala kəkayeri ar mburu, ka mburu ka kəra mburu aɗi mzhi kətari wa ni?

¹¹Amma mburu ku hamta jiri abbər mburu ata wutə mbantədzi atar ɓɗakkur tə Mthlaku Yesu hara ala mburu, tsu apatə da ata wutari.”

¹²Antə shanga mji na tsaptədzi ku dləɓ səri, ka psi thləm aka Barnabas ka Bulus, sakatə da akwa ngkər ala ɗa jili seɗayeri kəga surndatayeri tə Hyel hara atar ɗa akwa nca durayeri damwa ni.

¹³Sakatə da ku kuri gari ni, antə Yakub pəla, “Ka giri psi thləm ali, mjir yeru.

¹⁴Siman ku ngkərɓəla ala mburu apatə Hyel ncantə hirkurərni na ntangkəma aka durayeri damwa, atar carɓəla mji laga akwa nca ɗa ka da ndzi mjirni.

¹⁵Antə ndərayeri ngəni ku kəɓa ka su tə naɓiyayeri pəla ni, apatə mdə ku rəbuta abbər,

¹⁶“‘Aghəla ngəni I ata jaktə ngka, kəi jaktə həntə kəyir Dauda na ndlamtadzi ni. I ata jaktə həntə shanga vəyayeri na ku huzamtadzi, kəi jaktə namtə ɗa apa na hwatu.

¹⁷Kamnyar ka mambila mji sə bara ra, I na Mthlaku, watau shanga durayeri damwa tə I ku kəga ɗa ka da sə ndzi arna.

¹⁸Apani antə Mthlaku pəla, tsa na ku ngkərɓəla suayeri ngəni təng waci.’ ”

¹⁹Antə arna su tə I wuta an abbər mburu aɗiya hara bwani aka durayeri damwa na ku dlu ndərər Hyel ni wa.

²⁰Amma ka mburu rəbuta ala ɗa abbər da aɗiya səm su na ka diɗi wa, watau susəm tə mdə ku hamta aka haptayeri, wala hara karwakur wa, wala ɓɗə kumər kəlara mwaɓi tə mdə ku ndwaləmta wulyari wa, wala səm kum na ka mamshi tsu akwa wa.

²¹Kamnyar təng waci mdə ana karatə tsawur Musa akwa vəi vəngkər səli akwa Vir Ghərəmtaghəra, tsuwa mda ana karatə ni akwa mbwar vəngkər səli tədəku Vir Ghərəmtaghəra.

²²Apani aposəlayeri, ka mji na ol'ola, ka shanga mjir ikələziya, wuta abbər kuji ka da carɓəla mji laga akwa nca ɗa, ka da thlentə ɗa ahar Antakiya ata kəma duku kəga Bulus ka Barnabas. Antə da carɓəla Yahuda natə mda ana kəga ni Barsaba, ka Sila, natə da an mjir nuwa na ol'ola, ka thlentə ɗa

²³ka wasika ngəni na akwa pəla, “Yeru na aposəlayeri ka mji na ol'ola, na maɗama' giri, akwa thlentə thlawardzər yeru ala giri shang na maɗama' yeru na dur damwa, na ahar Antakiya, ka Siriya, ka Kilikiya.

²⁴Təng tə yeru ku nggata abbər mji laga akwa nca yeru ku mwari adzə giri akwa damitə giri ka ndərayeri laga, ka ndəndatə hangkala giri kula yeru an pəla ala ɗa,

²⁵antə yeru wuta abbər kalkal ka yeru mnya duku, ka carɓəla mji laga, ka thlentə ɗa ala giri. Da akwa mwari ata kəma duku ka Barnabas ka Bulus, mji tə yeru hirhira,

²⁶mji na ku psəmta mpika ɗa kamnyar thləma Mthlakər mburu Yesu Kristi.

²⁷Antə yeru ku thlenta ala giri Yahuda ka Sila, na ata pəla ala giri ndərayeri ngəni ka mnya ɗa sur ɗa.

²⁸Kamnyar yeru wuta abbər ku ndzi kalkal aka Mambəl na Ɓɗakkarkara ka ala yeru tsuwa, abbər mda aɗiya vəngkər ala giri kəla na olta suayeri ngəni na ku ndzi dwali nə wa,

²⁹abbər giri aɗiya səm susəm tə mdə ku hamta aka haptayeri wa, wala ɓɗə kum na ka mamshi tsu akwa wa, wala ɓɗə kumər mwaɓi tə mdə ku ndwaləmta wulyari wa, wala hara karwakur wa. Ma giri ku ɓəlatə kər giri ta suayeri ngəni, giri ku kəɗari. Sai saka damwa.”

³⁰Antə mdə ku salamtə ɗa, tə da ku təra ləghəi ahar Antakiya. Sakatə da ku tsaptə shanga mjir nuwa antə da hamta ala ɗa wasika ni.

³¹Sakatə da karatə kakaɗə ni, antə da hara kucali ata kəra sauri ni.

³²Antə Yahuda ka Sila, na naɓiyayeri ka kərɗa, ku hara gari na saɓəl saɓəl akwa ntsətə mjir nu na anda ni ka dunautə ɗa.

³³Antə aghəla tə da ɗar pi anda, antə mjir nu ni sə pwarɓəla ɗa, tə da ngka adzə mji na thlentə ɗa ni.[3]

³⁵Amma ar Bulus ka Barnabas da ku sə ɗarndzi ahar Antakiya, ata kəma duku kəga mji damwa hang, tə da ku thlipa, ka ngkər labar ar Mthlaku.

³⁶Aghəla virayeri laga antə Bulus ku pəla aka Barnabas abbər, “Kuji mwa ngka akwa shanga diyayeri tə mwa ngkər ndərər Hyel akwa ni, ka mwa wuli maɗama' mburu na anda, ka wutə laku tə da akwa ləkəma akwa.”

³⁷Antə Barnabas ku bara ka da kətə Yahwana natə mda ana kəga ni Markus ni adzə ɗa.

³⁸Amma Bulus wuta abbər aɗi kalkal ka da kətə mdə na ku hwi ka təra kazhar ɗa akwa tsəɗi Pamfiliya wa, kamnyar tsa aɗi ndzi adzə ɗa har tə da kuri kəthlərər ɗa wa.

³⁹Antə tur nggaɓəladzi ku thlata akwa daɓwa ɗa ka duna har tə da ku ndəkəmtadzi. Antə Barnabas ku kətə Markus, tə da ləkwa shar ka mwari ahar Saiprus.

⁴⁰Amma Bulus ku carɓəla Sila. Aghəla tə mjir nu na anda ku hara adduwa ka hamta ɗa akwa tsiya Hyel abbər ka Hyel ɓəlatə ɗa, antə da tamtə laku.

⁴¹Antə Bulus ku təra akwa tsəɗi Siriya ka Kilikiya, akwa dunautə mjir ikələziyayeri na anda.