Read bura-pabir Kəth Apos 17 Bible Online

Kəth Apos 17 - bura-pabir bible

Kəth Apos 17

¹Antə Bulus ka Sila nu Amfipolis ka Apolloniya, ka sə mwari ahar Thlassalonika, akwa vəi tə mbwar vəngkər səli aɗi.

²Antə Bulus ku ləmbwa adzə ɗa apatə tsa ana hara hwatu, ka hara sati makər akwa beɗi kəga da ata kəra suayeri na akwa kakaɗər Hyel.

³Tsa akwa ngkərɓəlari ala ɗa, ka ncaɓəla ala ɗa abbər ndzi dwali ka Kristi ɗar bwani, ka jaktə thlata akwa mtəmta. Bulus pəla, “Yesu ngəni tə I akwa ngkər ala giri ni an Kristi ni.”

⁴Antə mji laga akwa nca ɗa ku hamta jiri aka su tə Bulus ka Sila akwa ngkərari ni, ka paktədzi kəga da. Tsuwa mjir Helleni laga aɗi hang na ana thlivər Hyel, kəga mwanki laga na ol'ola akwa kəthlər yiɗauwa, na ku mbərsa ka gariyir ɗa ni, ka paktədzi kəga da.

⁵Amma mjir Yahudi ku səlkər ɗa, antə da mwari akwa tasha, ka fatə maɗa' shambar laga na kəmanggar, ka tsaptə ɗa dlama dlama, tə da ləkwa haptə hangkala mjir kuta di ka kurakər mpa. Antə da mwari ka pungkərdzi aka kəyir Yason, tə da akwa paka Bulus ka Sila kamnyar ka da sə səntə ɗa aɓəla aka mji.

⁶Amma sakatə da aɗi wutə ɗa wa, antə da ku ndəkər Yason ka mjir nuwayeri laga akəma mji na ka kuthlikur ar bərni ni, tə da hara kuraku abbər, “Mji nayeri ni ana səntə bwani akwa kəlara vəi madi! Antə kulini da ku si akwa diyir mburu,

⁷antə Yason ku ɗuwar ɗa aviyar ngkiɗa. Tsuwa shanga ɗa ana fəlɓəla tsawayeri ar Kaisar, tə da ana pəla abbər, kuthli damwa aɗi na ka thləmari Yesu.”

⁸Sakatə dlamar mji kəga mji na ka kuthlikur ar bərni ni ku nggatə ndərayeri ngəni, antə hangkala ɗa ku thlata.

⁹Antə mji na ka kuthlikur ar bərni ni ku vu Yason ka mji na damwa ni, tə da ku ntəmta kwaba laga natə mdə ku thlamta ala ɗa, kambəla mdə ku psi ɗa tə da təra.

¹⁰Təkəma sakatə viri ku hara, antə mjir nuwa ku thlentə Bulus ka Sila ahar Biriya. Sakatə da ku mzhitə di ni, antə da ku mwari akwa vəi vəngkər səli ar mjir Yahudi.

¹¹Tsuwa Hyel hara tə mjir Yahudi na azi ni ku təramta mji na ahar Thlassalonika ni ka hangkalkur, kamnyar da ku dlu ndər ni ka tsi suɗsuɗa, tə da ləkwa karatə kakaɗər Hyel tədək viri kamnyar ka da wuta abbər su tə Bulus ku pəla ni an apani jiri.

¹²Antə mji hang akwa nca ɗa ku hamta jiri. Kamnyar hang akwa nca mwankir Helleni na olˈola akwa kəthlər kəga mji shili laga rakər su ku hamta jiri.

¹³Amma sakatə mjir Yahudi na ahar Thlassalonika nggata abbər Bulus ku ngkər labar ndərər Hyel ahar Biriya tsuwa, antə da mwari anda ka baɗitə hakər aka mji ka thlentə hangkala ɗa ka ndərayeri na gapangapani.

¹⁴Antə mjir nuwa ni pwarɓəla Bulus kula shamta sakatə tsa mwari ata mnya manda, amma ar Sila ka Timothli da ndzi tsu anda katagu.

¹⁵Antə mji na pwar Bulus ni mwantə ni har ahar Athlen. Sakatə ata ngka antə Bulus thlentə ɗa adzə Sila ka Timothli, abbər ka da ra wutə ni ahar Athlen ni kula shamta saka.

¹⁶Sakatə Bulus ahar Athlen akwa sək Sila ka Timothli, antə ɗəffari ɓza sakatə tsa wuta abbər bərni Athlen ni nghyinghyari ka haptayeri.

¹⁷Antə tsa kəɗar gari aka mjir Yahudi kəga durayeri damwa na ana thlivər ɗəffa Hyel akwa mbwar vəngkər səli ni, kəga akwa kasəku tədək viri aka mji tə tsa wuta anda.

¹⁸Tsuwa tsa ku kəɓa ka mji laga akwa nca mjir nu thlipər Epikurus, ka mjir nu thlipər mjir Zeno, watau maləmayeri na ku karatə ka duna, ka gari ka da. Mji laga pəla, “Man su tə mdə ngəni akwa bara pəlari ri?” Mji laga tsuwa pəla, “Apa tsa mdər psəmnya hyelayeri laga zum.” Da pəla apani kamnyar tə Bulus akwa ngkər labar na msəra ata kəra Yesu ka thlata akwa mtəmta.

¹⁹Antə da kətə Bulus ka mwantə ni akəma majalisar Areyopagus, ka pəla, “Ga ata mzhi ngkər ala yeru thlipə na bilən tə ga akwa thlipari ni ya?

²⁰Kamnyar yeru aɗi ɗar nggatə jili suayeri ngəni wa, tsuwa yeru akwa bara ka yeru nggaɓəla karapur ɗa.”

²¹Tsuwa shanga mjir Athlen ka mətəpiyayeri na anda ana hir shamta shanga sakar ɗa akwa ngkər su bilən wala ngga su na bilən, təramta shanga su.

²²Antə Bulus thləthlata akəma majalisa ni ka pəla, “Mjir Athlen, I wuta abbər giri mji na hir nu addin akwa kəlara bwa.

²³Kamnyar sakatə I akwa mwa akwa diyir giri, ka wutə suayeri tə giri ana vəngkər səli ala ɗa, har ka karəngkər aka bagaɗi laga na ka rəbuta ata abbər, ‘Aka Hyel natə mda aɗi səndə wa.’ To, Hyel ngəni tə giri ana vəngkər səli alari tə giri aɗi səndə ni wa ni, tsa antə I akwa bara kə ngkərɓəla ala giri ni.

²⁴Hyel na namtə duniya ka shanga su na akwa, tsa na Mthlakər vəi na amtazi ka duniya, tsa aɗi ana ndzi akwa mbwar vəngkər səli tə mdə nam ka tsi wa.

²⁵Tsuwa tsa aɗi ana bara ka mdə hadza alari tsi wa, kamnyar tsa aɗi ana tur su wa, təng tə tsa ka kərari an mdər hamta mpika, ka shambar, ka shanga su aka mda.

²⁶Tsuwa atar mdə duku antə tsa an namtə shanga mji na ata kəra duniya, ka thlamta saka aka kəlara mji ka kəla bwa tə ka waskəi ndzi akwa.

²⁷Tsa hara apani kamnyar ka da bara ni, nuhum da ata sə tətəmta ka da wutə ni, wala tə tsa aɗi ciju ta kəlara mda akwa nca mburu wa.

²⁸Kamnyar, “ ‘Atar ndzi duku ka tsa antə mburu ka mpika, tə mburu akwa mwa ka ndzi aɗi.’ ” “Tsu apatə bwadukwa mjir giri na ana hara ha ku pəla, “ ‘Jiri mburu an maɗa'ni.’ ”

²⁹“Antə təng tə mburu an maɗa' Hyel, aɗi kalkal ka mburu dzama abbər Hyel ni dludzi ka dinar, wala adzərfa, wala pela, natə mda an namtə ka ɗəɗukurərni wa.

³⁰Kamnyar Hyel aɗi jikau bikayeri tə mji hara waci akwa sakayeri tə mji aɗi səndə wa wa. Amma kulini tsa ku tsawa aka shanga mji akwa kəlara bwa ka da tubi.

³¹Kamnyar tsa ku ɗəmhə vir tə tsa ata sə hara shariya ar jirkur aka shanga duniya atar mdə tə tsa ku carɓəla. Tsuwa Hyel ku ncaɓəla abbər jiri tsa ata haratə su ngəni atar thlentə mdə ngəni ni akwa mtəmta!”

³²Sakatə da nggata gari ata kəra thlata akwa mtəmtə ni, antə mji laga kumshi ni, amma mji laga pəla, “Yeru ata hir ka yeru jaktə nggatə su tə ga ata pəlari ata kəra ndər ngəni.”

³³Antə apani Bulus ku ləɓəla akwa nca ɗa.

³⁴Amma mji laga akwa nca ɗa paktədzi ka tsa, ka hamta jiri, akwa nca ɗa an Diyonisiyus na mdər majalisa ka mwala laga ka thləmari Damaris, ka mji damwa.