Read bura-pabir Kəth Apos 18 Bible Online

Kəth Apos 18 - bura-pabir bible

Kəth Apos 18

¹Aghəla ngəni antə Bulus zhar Athlen ka mwari ahar Korinthli.

²Antə tsa wutə mdər Yahudi laga ka thləmari Akila, mdə yaɓəla ni ahar Pontus. Akila ka mwalankiɗa Priska haɗa thlata ahar Italiya, kamnyar Klaudiyus ku tsawa ala ɗa abbər ka shanga mjir Yahudi ləɓəla ka zhar Rom. Antə Bulus ku mwari adzə ɗa,

³ka ndzəndzi adzə ɗa. Antə tsa kəthlər kəga da kamnyar tə kəthlərər ɗa jili duku, kəthlər nam tent.

⁴Antə tsa kəɗar gari aka mjir Yahudi kəga mjir Helleni akwa mbwar vəngkər səli tədəku Vir Ghərəmtaghəra, abbər ka tsa ndəkərtə hangkala ɗa.

⁵Sakatə Sila ka Timothli thlata ahar Makidoniya ka si adzə Bulus, antə tsa hamta shanga sakarni akwa ngkər ndərər Hyel, akwa ngkərɓəla aka mjir Yahudi abbər Yesu an Kristi ni.

⁶Amma sakatə da nggəlar ndərərni ka nggənggəltə ni, antə tsa ɓumta ləptərni ka pəla ala ɗa, “Ka watsəɓər bikər giri ngka ata kəra giri! Arna I kula biku. Baɗitə ka kulini I ata mwari adzə mji na aɗi mjir Yahudi wa.”

⁷Antə tsa zhar vəi nda ka mwari aviyar mdə laga ka thləmari Titus Yustus na ana vəngkər səli aka Hyel. Kəyirni kudzəhə ka mbwar vəngkər səli ni.

⁸Antə Krispus na olər mbwar vəngkər mbwar səli ni hamta jiri aka Mthlaku, shanga ɗa kəga mjir kutakəyirni ata kəma duku. Tsuwa hang akwa nca mjir Korinthli na ku nggatə Bulus, ku hamta jiri aka Mthlaku, antə mdə ku hara ala ɗa baptizma.

⁹Vir laga aviri, Mthlaku pəla aka Bulus akwa wulsu abbər, “Ga aɗiya thlivər wa. Ləkəma ka ngkər ndərər Hyel, ga aɗiya zhari wa.

¹⁰Kamnyar I adzə nga, antə mda aɗi na ata lətə kəra ga ka mpa, wala dəkəi ngə wa. Kamnyar I ka mji hang akwa di ngəni.”

¹¹Antə Bulus ku ndzi anda məva pal ka thliya ngkwa, akwa thlipə ndərər Hyel akwa nca ɗa.

¹²Amma sakatə Galiyo ndzi gwamnar tsəɗi Akaya, antə bwadukwa mjir Yahudi tsaptədzi, ka ngkəi Bulus ka mwantə ni akwa shariya,

¹³akwa pəla, “Mdə ngəni akwa ndəkər hangkala mji ka da vəngkər səli aka Hyel akwa laku tə tsawu ku ngkata.”

¹⁴Sakatə Bulus ku ɗəmhədzi abbər tsa ata gari, antə Galiyo pəla aka mjir Yahudi abbər, “Ma an abbər tsa ɓzamtə su wala hara biku laga ola, ata ndzi kalkal kəi psi thləm ala giri.

¹⁵Amma təng tə tsa beɗi daci ata kəra ndərayeri ka thləmayeri, ka ata kəra tsawur giri ni, kuri giri ka giri sur giri. I aɗi ata hara shariya ata kəra suayeri na apani wa.”

¹⁶Antə tsa kədləɓəla ɗa akwa mbwar shariya ni.

¹⁷Antə shanga ɗa ngkəi Swasthlenes na olər mbwar vəngkər səli ni, ka dlaɓu ni akəma mbwar shariya ni. Amma Galiyo aɗi damitədzi ata kəra suayeri ngəni wa.

¹⁸Aghəla ngəni antə Bulus jaktə hara virayeri hang ahar Korinthli, kambəla tsa salamtə ɗa. Antə tsa, ka Priska, ka Akila, ləkwa shar ka təra mwari ahar Siriya. Amma akəmata tsa thlata ahar Kengkreya akwa shar ni, tsa shimta kərari kamnyar alkawal tə tsa kəta.

¹⁹Sakatə da mzhitə Afisa antə Bulus zhar Priska ka Akila anda, ka mwari akwa mbwar vəngkər səli, ka gari aka mjir Yahudi.

²⁰Antə da kiɗə ni abbər ka tsa jaktə ɗarndzi adzə ɗa, amma tsa aɗi hir wa.

²¹Amma sakatə tsa akwa təra kazhar ɗa antə tsa pəla ala ɗa, “Ma Hyel ku hir I ata jaktə ngka adzə giri.” Antə tsa ləkwa shar ahar Afisa ka təra.

²²Sakatə Bulus ku ləɓəla akwa shar ahar Kaisariya, antə tsa ləmta ahar Urushalima ka thlawar mjir ikələziya na anda, kambəla tsa ləghəi ahar Antakiya.

²³Aghəla tə tsa ku ɗarndzi anda raka, antə tsa təra ka mwari akwa diyayeri zumzum akwa tsəɗiyir Galatiya ka Firijiya, akwa dunautə shanga mjir nu na anda.

²⁴Vir laga mdər Yahudi laga ka thləmari Apollos, tə mdə yaɓəla ni Alekzandəriya, si ahar Afisa. Tsa mdə na asəndə gari, na ku səndə kuta kakaɗər Hyel swaiswai.

²⁵Mdə ku thlipa alari su ata kəra lakur Mthlaku. Shanga su tsa ana hara ka jirkur, tsa ana gari ka thlipə su na gwangari ata kəra Yesu. Amma təng baptizmar Yahwana daci tə tsa sənda.

²⁶Antə Apollos baɗitə gari kula thlivəra akwa mbwar vəngkər səli ni. Amma sakatə Priska ka Akila nggatə gariyirni, antə da kətə ni ka ɗar sharardzi ka tsa, ka jaktə ngkərɓəla alari su ata kəra Hyel akwa laku na kalkalari.

²⁷Sakatə Apollos pəla tsa akwa bara mwari ahar Akaya, antə mjir nu ni dunautə ni, ka rəbuta aka mjir nuwa na ahar Akaya ni abbər ka da dlu ni ka tsi suɗsuɗa. Sakatə tsa mzhitə di ni, tsa ku dlar mji na hamta jiri atar ɓɗakkur tə hyel hara ala ɗa,

²⁸kamnyar tsa ku gari ka duna ka nggyari mjir Yahudi akəma mji, atar ngkərɓəla ala ɗa akwa kakaɗər Hyel abbər Yesu an Kristi ni.