Read bura-pabir Kəth Apos 19 Bible Online

Kəth Apos 19 - bura-pabir bible

Kəth Apos 19

¹Sakatə Apollos ahar Korinthli, antə Bulus dlarhə lardayeri na akwa kutakutari har ka mwari ahar Afisa. Antə tsa ku wutə mjir nuwa laga anda.

²Antə tsa pəla ala ɗa, “Giri ku dlu Mambəl na Ɓɗakkarkara sakatə giri hamta jiri ya?” Antə da pəla, “Awa. Yeru aɗi ɗar nggata abbər Mambəl na Ɓɗakkarkara aɗi ma shang wa.”

³Antə Bulus pəla, “Jili baptizma madi antə giri dlu ri?” Antə da pəla abbər, “Baptizmar Yahwana.”

⁴Antə Bulus pəla, “Yahwana akwa hara baptizmar tubi, akwa pəla aka mji ka da hamta jiri aka mdə na ata si aghəlari, watau Yesu.”

⁵Sakatə da nggata apani antə mdə hara ala ɗa baptizma akwa thləma Mthlaku Yesu.

⁶Sakatə Bulus ku vəngkər tsiyari ata kəra ɗa, antə Mambəl na Ɓɗakkarkara si ata kəra ɗa, tə da gari akwa kyanggyarayeri zumzum, ka hara naɓikur.

⁷Shanga ɗa mji kumnya suɗa.

⁸Antə Bulus ləkwa mbwar vəngkər səli, ka hara thliya makər akwa gari aka mji kula thlivəra, akwa beɗi kəga da, akwa ndəkər hangkala ɗa ata kəra suayeri na abwar kuthlikurər Hyel.

⁹Amma sakatə Bulus wuta abbər mji laga aɗi akwa nca ɗa na ka kəra ɗa ɓəɓal, na aɗi hir hamta jiri wa, tsuwa akwa mnya ɗimi ata kəra Laku ni akəma shanga mji antə tsa ləɓəla kazhar ɗa. Tsa fatə mjir nuwa adzə ni ka təra, ka mwari akwa mbwar thlipə su na ar Tirannus, akwa gari ala ɗa tədək viri.

¹⁰Da hara apani har məva suɗa, kamnyar ka shanga mji na akwa tsəɗi Asiya nggatə ndərər Mthlaku, mjir Yahudi ka mji na aɗi mjir Yahudi wa shang.

¹¹Antə Hyel ku hara surndatayeri tə mda aɗi tsəli ka wutari wa atar Bulus,

¹²natə har ma mji ku dlu hangkəcifayeri arni wala zhaɓayeri na ku tsəkwar dzari, ka mwanta aka mji na nggawa nggawa, shilkər ɗa ana kura, tsuwa mambəlayeri na ɗimi ɗimi ana ləɓəla akwa dza ɗa.

¹³Antə mjir Yahudi laga aɗi na ana mwa mwa, akwa kədləɓəla mambəlayeri na ɗimi ɗimi tsuwa, na kəthlər ka thləma Mthlaku Yesu ata kəra mambəlayeri na ɗimi ɗimi ni. Da akwa pəla, “Yeru akwa tsawa ala giri akwa thləma Yesu natə Bulus akwa ngkərari ni.”

¹⁴Maɗashili laga murfa na maɗa' mdər Yahudi laga na prist na ola, ka thləmari Seva, na akwa hara su ngəni ni.

¹⁵Amma mambəl na ɗimi ni pəla ala ɗa abbər, “I asəndə Yesu, tsuwa I asəndə Bulus, amma ar giri ni, giri wa ri?”

¹⁶Antə mdə na ka mambəl na ɗimi ni fəla ka pwa ata kəra ɗa ka mpa, ka dədəktə ɗa, ka nggyari shanga ɗa, har tə puɓəladzi akwa kəi ni, ka hwi dura, kəga mbəlku ata dza ɗa.

¹⁷Antə shanga mjir Yahudi ka mji na aɗi mjir Yahudi wa na ahar Afisa ku nggata ata kəra su ngəni, tə shanga ɗa ku thlivəra ka duna, har tə da haptə thləma Mthlaku Yesu.

¹⁸Mji hang tsuwa akwa nca mji ndaga na tubi kulini, ku si akəma mji, akwa jika mnya ɗa ka ngkərɓəla surharar ɗa.

¹⁹Tsuwa hang akwa nca mji na ana hakdzi ni ku səntə kakaɗayeri arɗa, ka mbantə ɗa shang ata kəma duku nca shang mji. Sakatə da jikaɓəla kwabar masər kakaɗayeri ni, da wuta abbər kwabar masari ku mwantə kwabar mdər kəthlər ar vir dəpu ntəfkumari.[4]

²⁰Apani antə ndərər Mthlaku ku ləkəma ka titiləmtadzi akwa kəlara bwa, ka ndzi ka duna swaiswai.

²¹Aghəla su nayeri ngəni, antə Bulus ku ɗəmha akwa ɗəffari abbər ma tsa ku dlarhə tsəɗi Makidoniya ka Akaya, tsa ata mwari ahar Urushalima. Tsa pəla tsuwa, “Aghəla tə I ku mwari anda, ata ndzi dwali kəi mwari ahar Rom tsuwa.”

²²Antə tsa thlentə mji suɗa akwa nca mji na ana dlar ni, Timothli ka Erastus ahar Makidoniya, amma arni tsa jaktə ɗarndzi raka akwa tsəɗi Asiya.

²³Tsu akwa saka na nda antə mji laga tə bwari ata kəra Laku ni.

²⁴Kamnyar mdə laga ka thləmari Demetiriyus na ana ɓdlə liyar adzərfa, na ana nam dludzər mashiɗayeri ar Artemis ka adzərfa ni, ana səntə riɓa hang aka mjir kəthlərər tsi ni.

²⁵Antə tsa kəga ɗa shang ata kəma duku, kəga mji damwa na ka jili kəthlərər ɗa ni, ka pəla ala ɗa, “Mjir yeru, giri ku sənda abbər atar kəthlər ngəni antə mburu ana wutə gəna.

²⁶Tsuwa giri ku wuta ka nggata abbər aɗi akwa tsəɗi Afisa daci wa, amma abaka akwa shanga tsəɗi Asiya, mdə ngəni Bulus ni akwa ndəkərəmta mji hang kazhar mburu. Tsa akwa nggwa hyelayeri tə mdə nam ka tsiya mda aɗi hyel wa.

²⁷Antə asar na aɗi, aɗi abbər təng kasəkur mburu an ata hil wa, amma wala mbwar vəngkər səli ar Artemis hyel mwala na ol ni ata sə ndzi kula ampani. Antə mda ata mzhi ndəkəmta ni ka darajarni, tsa tə shanga mjir tsəɗi Asiya ka duniya purəm akwa vəngkər alari səli.”

²⁸Sakatə da nggatə ndər ngəni antə ɗəffa ɗa ɓzi ka duna, tə da haptə kuraku akwa pəla, “Ga an olta shang, Artemis ar Afisa.”

²⁹Antə da ndəndatə hangkala shanga mji na akwa di ni, tə mji hwi ka pudzi akwa bəbalər gyali, akwa ndəkər Gayus ka Aristarkus, mjir Makidoniya na pazhir mwar Bulus.

³⁰Bulus ku bara ka tsa ləkwa nca dlamar mji ni, amma mjir nuwa aɗi zhar ni wa.

³¹Tsuwa mji laga na ol'ola akwa tsəɗi Asiya, na pazhirni, ku thlenta alari akwa kiɗə kərari abbər tsa aɗiya tsaf pəla tsa ata ləkwa nca mji na tsaptədzi akwa vəi gyali nə wa.

³²Tsuwa hangkala mji na tsaptədzi vəi gyal ni ku ndəndatədzi, kamnyar mji laga akwa haptə kuraku ka pəla su laga, mji laga tsuwa akwa pəla su damwa zum. Bwar ola ɗa aɗi səndə su na tsaptə ɗa wa.

³³Antə mji laga kəta abbər su ni thlata ata kəra Alekzanda natə mjir Yahudi ndzangkir alari abbər ka tsa mwari akəma ni. Antə Alekzanda haptə tsiyari abbər ka mji dləɓ səri kamnyar ka tsa ngkərɓəla ala ɗa laku tə su ni akwa.

³⁴Amma sakatə da nggaɓəla abbər tsa mdər Yahudi, antə shanga ɗa putə kuraku akwa pəla su duku har mnyar awur suɗa abbər, “Ga an olta shang, Artemis ar Afisa!”

³⁵Aghəla tə sakatariyir kuta di ni vu tə da ndzi ɗiɗi, antə tsa pəla, “Giri na mjir Afisa, wa an kula ama sənda abbər bərni Afisa an ka mbwar vəngkər səli ar Artemis na ola, ka pela na ɓɗakkarkara na təri akwar amtazi ri?

³⁶To təng tə mda aɗi na amzhi kampikər suayeri ngəni wa, kalkal ka giri mbwi ɗəffa giri, giri aɗiya hara su ka huvə wa.

³⁷Kamnyar giri səntə ku mji ngəni azi, amma da aɗi həl su akwa mbwar vəngkər səli aka hyel mwala ar mburu wa, wala mnya ɗimi ata kərari wa.

³⁸Ai ma Demetiriyus ka mjir kəthlər tsi na ata kəma duku ka tsa, an ka damitədzi ata kəra mdə laga, nggədza nyarmbwar shariya kəlarkəlarari bwang ka alkaliyayeri ni ambwa, ka da mwantə tuwar ɗa ni anda.

³⁹Amma ma su laga aɗi zum tə giri akwa barari, mda amzhi ngkərhari akwa majalisa ni.

⁴⁰Kamnyar asar akwa su ngəni diya! Kamnyar mda amzhi burkatə mburu abbər mburu nthləi mpa ashina, tsuwa su aɗi na jirari tə mburu asə mzhi pəlari na ata kəra su ngəni ka nciɓəla mburu.”

⁴¹Sakatə tsa ku kuri gari ngəni, antə tsa salamtə mji ni.